ເມືອງຄົງເຊໂດນເຜີຍແຜ່ມະຕິກອງປະຊຸມຂອງສະພາແຫ່ງຊາດຊຸດທີ IX
ປະຊາຊົນເມືອງຄົງເຊໂດນຮ່ວມໃຈຮັບຟັງການເຜີຍແຜ່ມະຕິກອງປະຊຸມສະໄໝສາມັນເທື່ອທີ 3 ຂອງ ສພຊ
ອີງຕາມການລາຍງານຂອງແຫລ່ງຂ່າວຈາກ ແຂວງສາລະວັນ ໃຫ້ຮູ້ວ່າ: ປະຊາຊົນຜູ້ມີສິດເລືອກຕັ້ງບ້ານບຶງກາງ ແລະ ບ້ານຄົງໃຫຍ່ ເມືອງຄົງເຊໂດນ ໄດ້ຮັບຟັງການເຜີຍແຜ່ມະຕິກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ(ສພຊ) ຊຸດທີ IX ແລະ ສະພາປະຊາຊົນແຂວງສາລະວັນ(ສພຂ) ຊຸດທີ II ຕິດພັນກັບການເຜີຍແຜ່ພາລະບົດບາດ, ສິດ ແລະ ໜ້າທີ່ ຂອງສະພາແຫ່ງຊາດ, ສະພາປະຊາຊົນຂັ້ນແຂວງ ກໍຄື ສພຊ ແລະ ສພຂ
ໃນການປະຕິບັດພາລະບົດບາດ, ສິດ ແລະ ໜ້າທີ່ ເປັນອົງການຕົວແທນແຫ່ງສິດ ແລະ ຜົນປະໂຫຍດຂອງ ປະຊາຊົນລາວບັນດາເຜົ່າ, ເປັນອົງການນິຕິບັນຍັດ; ພິຈາລະນາຮັບຮອງເອົາການລັດຖະທໍາມະນູນ, ກົດໝາຍ ແລະ ນິຕິກໍາໃຕ້ກົດໝາຍ, ຕົກລົງບັນຫາສໍາຄັນພື້ນຖານຂອງຊາດ ແລະ ຂອງທ້ອງຖິ່ນ, ຕິດຕາມກວດການການເຄົາລົບ, ປະຕິບັດລັດຖະທໍາມະນູນ, ກົດໝາຍ ແລະ ນິຕິກໍາໃຕ້ກົດໝາຍຂອງບັນດາອົງການລັດ.
ຈາກນັ້ນ, ບັນດາ ສສຊ ແລະ ສສຂ ກໍໄດ້ຮັບຟັງການສະເໜີຂອງປະຊາຊົນ ຕໍ່ກັບບັນຫາຕ່າງໆທີ່ເກີດຂຶ້ນພາຍໃນບ້ານ ເພື່ອຊ່ວຍນຳເອົາຄຳສະເໜີຕ່າງໆ ໄປລາຍງານຕໍ່ກັບພາກສ່ວນທີ່ກ່ຽວຂ້ອງ ຮັບຮູ້ຕໍ່ບັນຫາຕ່າງໆ ແລະ ຊ່ວຍແກ້ໄຂ ເຊິ່ງລ້ວນແຕ່ເປັນຄໍາສະເໜີທີ່ເປັນປະໂຫຍດ, ຕິດພັນກັບການພັດທະນາເສດຖະກິດ-ສັງຄົມ ກໍຄື ການສ້າງສາພັດທະ ນາບ້ານເມືອງຂອງຕົນ ໃຫ້ມີຄວາມເຂັ້ມແຂງ.
ຕໍ່ກັບຄໍາສະເໜີຂອງປະຊາຊົນ, ສສຊ, ສສຂ ໄດ້ຊີ້ແຈງອະທິບາຍຕໍ່ບາງບັນຫາໃຫ້ ປະຊາຊົນໄດ້ເຂົ້າໃຈ ແລະ ບາງບັນຫາທີ່ຕິດພັນກັບຫລາຍພາກສ່ວນ ແມ່ນໄດ້ສັງຮວມເປັນຂໍ້ມູນ ເພື່ອນໍາໄປລາຍງານຄະນະປະຈໍາສະ ພາປະຊາຊົນແຂວງຄົ້ນຄວ້າ, ປຶກສາຫາລືແລະ ຊຸກຍູ້ໃຫ້ພາກສ່ວນທີ່ກ່ຽວຂ້ອງແກ້ໄຂໃນຕໍ່ໜ້າ.
ການເຄື່ອນໄຫວພົບປະຢ້ຽມຢາມໃນຄັ້ງນີ້, ນຳໂດຍ ທ່ານ ສີເຮັງ ຫອມສົມບັດ ປະ ທານຄະນະສະມາຊິກສະພາແຫ່ງຊາດ ເຂດເລືອກຕັ້ງທີ 14, ທັງເປັນປະທານສະພາປະຊາ ຊົນແຂວງ, ທ່ານ ຄຳສິງ ໄຊສົມແພງ ຮອງປະທານກຳມາທິການ ວຽກງານສະມາຊິກສະ ພາແຫ່ງຊາດ, ສສຊ ປະຈຳເຂດເລືອກຕັ້ງ14 ແລະ ພາກສ່ວນກ່ຽວຂ້ອງ ເຂົ້າຮ່ວມ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫຼ່ງຂໍ້ມູນຈາກ: ຂປລ.