ໃນວັນທີ 17 ກຸມພາ 2023 ທີ່ຜ່ານມາ, ກອງບັນນາທິການວິທະຍຸ ປກສ ຈັດກອງປະຊຸມສະຫລຸບການປະຕິບັດວຽກງານວິຊາສະເພາະ ປະຈຳປີ 2022 ແລະ ທິດທາງແຜນການປີ 2023  ໂດຍມີ ພັທ ວັນຄຳ ສາຍຕາແກ້ວ ຮອງຫົວໜ້າກົມສື່ມວນຊົນ ປກສ, ມີຄະນະກອງບັນນາທິການວິທະຍຸ, ພະນັກງານພາຍໃນກອງ ເຂົ້າຮ່ວມ

ທ່ານ ພັທ ນາງ ວົງສະຫວ່າງ ວົງນະຈັນ ຮອງຫົວໜ້າກອງບັນນາທິການວິທະຍຸ ປກສ ໄດ້ໃຫ້ຮູ້ວ່າ: ໃນປີນີ້, ຄະນະກອງບັນນາທິການວິທະຍຸ ປກສ ຈະສືບຕໍ່ຊີ້ນຳ-ນຳພາພະນັກງານເຄື່ອນໄຫວວິຊາສະເພາະ ໃນການສືບຕໍ່ເກັບກຳຂໍ້ມູນຢູ່ບັນດາກົມກອງທ້ອງຖິ່ນ ແລະ ເຄື່ອນໄຫວວຽກງານວາລະແຫ່ງຊາດແກ້ໄຂບັນຫາຢາເສບຕິດ

ເພື່ອຜະລິດບົດ-ຂ່າວອອກສູ່ສະຖານີໃຫ້ພຽງພໍ ແລະ ຮັບປະກັນຄຸນນະພາບ, ໂຄສະນາວັນສຳຄັນຕ່າງໆຂອງພັກຂອງຊາດ, ຄຽງຄູ່ກັບການຕິດຕາມສະພາບປະກົດການຫຍໍ້ທໍ້ໃນສັງຄົມ ເຊັ່ນ: ບັນຫາຢາເສບຕິດ, ອຸບັດເຫດ, ອັກຄີໄພ, ອາຊະຍາກຳທາງລະບົບຄອມພິວເຕີ, ປຸ້ນຈີ້-ຊິງຊັບ ແລະ ອາຊະຍາກຳອື່ນໆ ເພື່ອນຳມາອອກຂ່າວທາງຄື້ນວິທະຍຸ ປກສ ສູ່ສັງຄົມໄດ້ຮັບຮູ້ຢ່າງຖືກຕ້ອງ, ຊັດເຈນ ແລະ ທົ່ວເຖິງ.

ໃນປີ 2022 ຜ່ານມາ, ວິທະຍຸ ປກສ ໄດ້ຜະລິດລາຍການອອກອາກາດ 24 ລາຍການ, ລາຍການທີ່ຜະລິດເອງ 21 ລາຍການ, ລາຍການນອກ 3 ລາຍການ, ໃນນີ້ມີລາຍການເປົ້າໝາຍ 15 ລາຍການ, ລາຍການບັນເທີງ 9 ລາຍການ, ຜະລິດລາຍການອອກສູ່ສັງຄົມໄດ້ທັງໝົດ 8.640 ຄັ້ງ ແລະ ມີ 2 ລາຍການອອກອາກາດຢູ່ສະຖານີວິທະຍຸກະຈາຍສຽງແຫ່ງຊາດ, ປະຈຳການຫ້ອງສົ່ງຕະະຫຼອດ 24 ຊົ່ວໂມງ ມີ 365 ຄັ້ງ; ພ້ອມນີ້ຍັງສາມາດເກັບກຳຂໍ້ມູນ ແລະ ຂຽນຂ່າວໄດ້ 2.396 ຂ່າວ, ຂ່າວຢູ່ກົມກອງອ້ອມຂ້າງກະຊວງ 1.074 ຂ່າວ, ຂ່າວສຳພາດ 36 ຂ່າວ, ຮັບ ແລະ ຂຽນຂ່າວຕ່າງແຂວງ 1.286 ຂ່າວ, ເຄື່ອນໄຫວຕ່າງແຂວງ 5 ຄັ້ງ, ກວດແກ້ຂ່າວ 2.396 ຂ່າວ, ກວດບົດ 2.152 ບົດ, ດັດແປງບົດອອກອາກາດ ແລະ ຂຽນບົດໄດ້ 2.152 ບົດ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo

ຂອບ​ໃຈແຫຼ່ງຂໍ້ມູນຈາກ: ຂປລ.