ແຂວງພາກໃຕ້ 2 ແຂວງ ໄດ້ຮັບການຊີ້ນຳວຽກງານຈາກ ອອປສ
ອົງການ ໄອຍະການປະຊາຊົນສູງສຸດ ລົງຊີ້ນຳວຽກງານຢູ່ 2 ແຂວງພາກໃຕ້ ລະຫວ່າງ 19-20 ມິຖຸນາ 2023
ແຂວງພາກໃຕ້ ເປັນແຂວງທີ່ມີການພັດທະນາໄປໄວຫລາຍ, ແຕ່ແນວໃດກໍດີການປະຕິບັດໜ້າທີ່ຕ່າງໆກໍຕ້ອງໄດ້ປະຕິບັດໄປຢ່າງຖືກຕ້ອງ ແລະ ຊັດເຈນໂດຍສະເພາະອົງການໄອຍະການປະຊາຊົນສູງສຸດ, ໃນວັນທີ 19-20 ມິຖຸນາ 2023 ຜ່ານມາ, ທ່ານ ບຸນທັນ ບຸນທະວິໄລ ຮອງຫົວໜ້າອົງການ ໄອຍະການປະຊາຊົນສູງສຸດ (ອອປສ) ພ້ອມຄະນະ ລົງເຄື່ອນໄຫວພົບປະໂອ້ລົມ ສະມາຊິກພັກ, ພະນັກງານ-ລັດຖະກອນ ອົງການໄອຍະການປະຊາຊົນ ແຂວງຄຳມ່ວນ ແລະ ແຂວງສະຫວັນນະເຂດ, ພ້ອມທັງ ເຂົ້າຮ່ວມເປັນ ປະທານ ການປະກາດການຈັດຕັ້ງໂຄງປະກອບບຸກຄະລາກອນຂອງ ອົງການໄອຍະການປະຊາຊົນ ຢູ່ສອງແຂວງດັ່ງກ່າວ.
ໂອກາດນີ້, ທ່ານ ບຸນທັນ ບຸນທະວິໄລ ໄດ້ເນັ້ນໜັກຫລາຍບັນຫາສຳຄັນ ແລະ ໃຫ້ທິດຊີ້ນໍາ ຕໍ່ສະມາຊິກ ພັກ, ພະນັກງານ-ລັດຖະກອນ ອົງການໄອຍະການປະຊາຊົນຢູ່ 2 ແຂວງ ໂດຍສະເພາະ ວຽກງານສຶກສາອົບຮົມ ການເມືອງແນວຄິດ, ເພີ່ມທະວີຄວາມສາມັກຄີພາຍໃນ ແລະ ຊ່ວຍເຫລືອເຊິ່ງກັນ ແລະ ກັນ, ປັບປຸງແບບແຜນວິທີ ເຮັດວຽກມີຫລັກການສູນລວມປະຊາທິປະໄຕ, ຕົກລົງເປັນໝູ່ຄະນະ
ສືບຕໍ່ປັບປຸງວຽກງານວິຊາສະເພາະໃຫ້ມີບາດ ກ້າວອັນໃໝ່, ວຽກງານກວດກາສະມາຊິກພັກ-ພະນັກງານ, ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງສູນກາງພັກ, ແຜນພັດທະນາເສດຖະກິດ-ສັງຄົມແຫ່ງຊາດ ເຂົ້າສູ່ວຽກງານໄອຍະການປະຊາຊົນ
ການຜັນ ຂະຫຍາຍມະຕິກອງປະຊຸມໃຫຍ່ຂອງອົງຄະນະພັກ ອົງການໄອຍະການປະຊາຊົນສູງສຸດ ຄັ້ງທີ V, ການປະຕິບັດ ມະຕິກອງປະຊຸມໃຫຍ່ຂອງອົງຄະນະພັກແຂວງ ແລະ ມະຕິກອງປະຊຸມໃຫຍ່ຂອງໜ່ວຍພັກ ອົງການໄອຍະການ ປະຊາຊົນ ໃນການປະຕິບັດສິດ ແລະ ໜ້າທີ່ ຂອງພະນັກງານໄອຍະການປະຊາຊົນ ໃຫ້ປະຕິບັດຕາມກົດໝາຍ ແລະ ລັດຖະທໍາມະນູນ ຢ່າງເຂັ້ມງວດ
ເປັນຕົ້ນ ແມ່ນການຜັນຂະຫຍາຍວາລະແຫ່ງຊາດ ກ່ຽວກັບການແກ້ໄຂບັນຫາຢາ ເສບຕິດ, ການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ, ການຕິດຕາມກວດກາການປະຕິບັດ ກົດໝາຍທົ່ວໄປ; ສ້າງກົນໄກປະສານງານໃຫ້ຄ່ອງຕົວດີຂຶ້ນ ໂດຍສະເພາະ ກົນໄກການປະສານງານ ລະຫວ່າງ ອົງການໄອຍະການປະຊາຊົນ ກັບອົງການສືບສວນ-ສອບສວນເຈົ້າໜ້າທີ່ຕຳຫລວດ, ເຈົ້າໜ້າທີ່ພາສີ, ປ່າໄມ້ ແລະ ອົງການສືບສວນ-ສອບສວນອື່ນໆ ຢ່າງກົມກຽວ ດ້ວຍການສ້າງບົດບັນທຶກຮ່ວມ.
ພ້ອມນີ້, ທ່ານ ບຸນທັນ ບຸນທະວິໄລ ພ້ອມຄະນະ ຍັງໄດ້ເຂົ້າພົບປະກັບ ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ ແລະ ທ່ານ ພູວັງ ເກດແກ້ວພົມພອນ ຮອງເລຂາພັກແຂວງ, ຜູ້ຊີ້ນໍາວຽກງານການເມືອງ-ແນວຄິດ ແລະ ວຽກງານພັກ-ພະນັກງານ ແຂວງສະວັນນະເຂດ ເພື່ອແຈ້ງຈຸດປະສົງ ຂອງການລົງເຄື່ອນໄຫວວຽກ ງານໃນຄັ້ງນີ້
ພ້ອມທັງ ເຄື່ອນໄຫວວຽກງານ ຢູ່ຫ້ອງການອົງການໄອຍະການປະຊາຊົນເຂດ I ປະຈຳເມືອງ ຫີນບູນ ແຂວງ ຄໍາມ່ວນ ແລະ ອົງການໄອຍະການປະຊາຊົນເຂດ I ປະຈຳເມືອງໄຊບູລີ ແຂວງ ສະຫວັນນະເຂດ ຕື່ມອີກ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ Lao insight
ຂອບໃຈແຫຼ່ງຂໍ້ມູນຈາກ: ຂປລ.