ອະທິບາຍຄໍາວ່າ “ກົມ” ມີຄວາມໝາຍແນວໃດ?

ຄໍາວ່າ “ກົມ” ແມ່ນມີຫຼາຍຄວາມໝາຍເປັນຊື່ເພັງ ຫຼື ລາຍການດົນຕີດັງບູຮານ. ໝາຍເຖິງກົມກອງຂອງ ກະຊວງໃດຫນຶ່ງ ຊຶ່ງໃນນຶ່ງກະຊວງຈະແບ່ງອອກມີຫຼາຍກົມຕາມພາລະບົດບາດຂອງແຕ່ລະກະຊວງຕົວຢ່າງເຊັ່ນ: ກົມຈັດຕັ້ງ, ກົມການເງິນ, ກົມແຜນການ, ກົມກວດກາ, ກົມວິຊາການ, ກົມກໍາລັງພົນ, ກົມສູ້ຮົບ, ກົມໃຫຍ່ເຕັກນິກ, ກົມໂຄສະນາ ແລະ ກົມອື່ນໆ.

ພ້ອມນັ້ນຄໍາວ່າກົມຍັງນໍາໄປປະສົມກັບຄໍາອື່ນເປັນຕົ້ນ: ກົມກຽວ, ກົມມະທັນ, ກົມກ່ອມ, ກົມກືນ, ກົມກຽວ, ກົມການເມືອງ, ກົມອຸ້ມລຸ້ມ ແລະ ອື່ນໆ. ອີກນຶ່ງຄວາມໝາຍແມ່ນສິ່ງທີ່ກົມມົນບໍ່ເປັນລ່ຽມ ຊຶ່ງເຫັນໄດ້ຈາກການເອີ້ນ: ທໍ່ກົມ, ທ້ອງກົມ, ແມ່ທ້ອງກົມ.

ສະນັ້ນ ເພື່ອໃຫ້ເຂົ້າໃຈ ການນໍາໃຊ້ຄໍາດັ່ງກ່າວໃຫ້ຫຼາຍຂຶ້ນ ເຮົາມາເບິ່ງລາຍລະອຽດດັ່ງລຸ່ມນີ້:

ຄຳວ່າ “ກົມ”

“ກົມ” (1. ຄໍານາມ) ຊື່ເພັງ ຫຼື ລາຍການດົນຕີບູຮານລາຍນຶ່ງຮຽກວ່າ “ກົມ” ໃຊ້ລະນາດ ແລະ ຟາດຄ້ອງຕີເສບ. (2. ຄໍານາມ) ໝວດ, ໝູ່, ກອງ, ພະແນກໃຫຍ່ຂອງລັດຖະການ ຮອງຈາກກະຊວງລົງມາ. (3. ຄໍາກິລິຍາ) ມີລັກສະນະບໍ່ເປັນລ່ຽມ, ກົງກັນຂ້າມກັບລ່ຽມ.

ຕົວຢ່າງ:

ເພັງກົມແມ່ນດົນຕີແບບບູຮານ ຊອກຟັງໄດ້ຍາກ, ແຕ່ເມື່ອໄດ້ຟັງແລ້ວເຮັດໃຫ້ຮູ້ສຶກຢ້ອນກັບໄປໃນອາ ດິດ.
ກະຊວງການເງິິນແມ່ນມີຫຼາຍກົມ ແລະ ສະຖາບັນ ເພາະເປັນກະຊວງໃຫຍ່ ເຊັ່ນ: ກົມຈັດຕັ້ງ ແລະ ພະນັກງານ, ກົມກວດກາ, ກົມການເງິນຕ່າງປະເທດ, ກົມພາສີ, ກົມສ່ວຍສາອາກອນ, ກົມບັນຊີ, ກົມນະໂຍບາຍການເງິນ ແລະ ນິຕິກໍາ, ກົມງົບປະມານແຫ່ງລັດ, ກົມຄຸ້ມຄອງວິສາຫະກິດລັດລົງທຶນ ແລະ ປະກັນໄພ, ກົມຄຸ້ມຄອງຊັບສິນແຫ່ງລັດ ແລະ ອື່ນໆ.
ທໍ່ນໍ້າແມ່ນເປັນຮູບກົມ ຜະລິດຈາກພະລາສະຕິກ, ເຫຼັກ ແລະ ອື່ນໆ ເພື່ອໃຫ້ຫຼາກຫຼາຍ ແລະ ສະດວກໃນການນໍາໃຊ້.
ໂຮງງານເຫຼັກ VKK ຜະລິດເຫຼັກຫຼາຍຊະນິດມີທັງ ເຫຼັກຮູບທໍ່ກົມ, ເຫຼັກສີ່ລ່ຽມ, ເຫຼັກຮູບໂຕວີ, ເຫຼັກຮູບໂຕຫັດ ແລະ ຜະລິດໂລຕ່າງໆ.
ລາວມານລູກໄດ້ 7 ເດືອນແລ້ວ ທ້ອງກົມອຸ້ມລຸ້ມ ເບີ່ງແລ້ວຄືໄດ້ 9 ເດືອນນີ້ລະ.