ອະທິບາຍຄໍາວ່າ “ຖ່າຍ” ມີຄວາມໝາຍແນວໃດ?

ຄໍາວ່າ “ຖ່າຍ” ໝາຍເຖິງການປ່ຽນແທນ ເອົາອັນເກົ່າອອກໄປແລ້ວເອົາອັນໃໝ່ມາ ເຊັ່ນ: ການຖ່າຍໂອນກໍາມະສິດທີ່ດີນ, ການຖ່າຍຄຽນສິນຄ້າ ຫຼື ການຖ່າຍຂົນສິນຄ້າ ຫຼື ການເອົາສິນຄ້າອອກຈາກບ່ອນນຶ່ງໄປບ່ອນນຶ່ງ, ການຖ່າຍເລືອດ ຫຼື ໃສ່ເລືອດ ຫຼື ເຕີມເລືອດ, ການຖ່າຍຂົນຂອງສັດປີກ, ການຖ່າຍເທໝາຍເຖິງການເອົາໄປຖີ້ມ ຫຼື ເທ ອອກໄປ ເປັນຕົ້ນ.

ພ້ອມກັນນີ້, ຍັງໝາຍເຖິງການປົດທຸກອອກຈາກຮ່າງກາຍ ເຊັ່ນ: ຖ່າຍໜັກ (ຂີ້) ແລະ ຖ່າຍເບົາ (ຍ່ຽວ) ແຕ່ຖ້າຖ່າຍທ້ອງ ແມ່ນໝາຍເຖິງການເຈັບທ້ອງ ແລະ ທຽວຂີ້ເລື້ອຍໆ. ອີກຄວາມໝາຍ ນຶ່ງໝາຍເຖິງການຖ່າຍທອດສຽງ, ການກະຈາຍສຽງ, ຖ່າຍທອດສົດຜ່ານທາງວິທະຍຸ ຫຼື ໂທລະພາບ. ນອກຈາກນີ້, ຍັງໝາຍເຖິງການຖ່າຍຮູບ, ຖ່າຍພາບ ຫຼື ຖ່າຍວິດີໂອ.

ສະນັ້ນ ເພື່ອໃຫ້ເຂົ້າໃຈການນໍາໃຊ້ຄໍາດັ່ງກ່າວໃຫ້ຖືກຕ້ອງຕາມຫຼັກໄວຍະກອນ ເຮົາມາເບິ່ງລາຍລະອຽດດັ່ງລຸ່ມນີ້:

ຄຳວ່າ “ຖ່າຍ”.

“ຖ່າຍ” (1. ຄໍານາມ)

(1. ຄໍາກິລິຍາ) ເອົາອັນເກົ່າອອກແລ້ວເອົາອັນໃໝ່ແທນ, ຖ່າຍໂອນ, ຄຽນອອກໄປ, ປ່ຽນ, ປ່ຽນແທນ, ຖ່າຍເທ. (2. ຄໍາກິລິຍາ) ປົດທຸກ, ອຸຈະລະ, ຂີ້, ຍ່ຽວ. (3. ຄໍາກິລິຍາ) ເອົາອອກຈາກບ່ອນນຶ່ງແລ້ວໄປອອກອີກບ່ອນນຶ່ງ, ການກະຈາຍສຽງ ຫຼື ແພ່ພາບທີ່ຮັບຈາກສະຖານີນຶ່ງໄປອີກສະຖານີນຶ່ງ. ຈໍາລອງ ຫຼື ບັນທຶກຮູບພາບ.

ຕົວຢ່າງ:

ເວລາໄກ່ ຫຼື ນົກຖ່າຍຂົນ (ປ່ຽນຂົນ) ໃໝ່ໆ ສ່ວນໃຫຍ່ຈະຂົນງາມດີ ແລະ ສີກໍແຈ້ງ.
ເນື່ອງຈາກບົນທຸກສິນຄ້າຄັນນຶ່ງເພ ຈິ່ງໄດ້ຂົນຖ່າຍໄປໃສ່ຄັນໃໝ່ທີ່ກະກຽມມາຮັບ ເພື່ອສົ່ງລູກຄ້າໃຫ້ທັນເວລາ.
ຄູ-ອາຈານ ແມ່ນພໍ່ແມ່ຜູ້ທີສອງ ເພາະເພີ່ນສອນຄົນໃຫ້ເປັນຄົນດີຂອງສັງຄົມ, ຖ່າຍທອດຄວາມຮູ້ ແລະ ສິ່ງທີ່ຄົ້ນຄວ້າມາທັງຊີວິດໃຫ້ແກ່ນັກຮຽນ ນັກສຶກສາ ເພື່ອໃຫ້ເກັ່ງ ແລະ ເປັນຄົນດີ.
ໂຊເຟີຊ່ວຍຈອດປໍ້ານໍ້າມັນໃຫ້ແດ່ປວດເບົາແຮງໆ ຂໍຖ່າຍເບົາຈັກນ້ອຍກ່ອນໄດ້ບໍ່? ອີກຢ່າງນຶ່ງກໍເປັນການພັກເຊົາເມື່ອຍອີກດ້ວຍ.
ກິລາບານເຕະໂລກ ໄດ້ມີການຖ່າຍທອດສົດ ໄປທົ່ວທຸກທະວີບ ແລະ ມີຜູ້ຊົມຜູ້ເຊຍຈໍານວນຫຼວງ ຫຼາຍ.
ວິທະຍຸກະຈາຍສຽງແຫ່ງຊາດລາວ ໄດ້ຖ່າຍທອດສຽງການປະຊຸມສະພາແຫ່ງຊາດຕາມວາລະກອງປະ ຊຸມດັ່ງກ່າວ.
ການຖ່າຍຮູບຕິດບັດ ເພື່ອຄວາມເປັນເອກະພາບແມ່ນໃຫ້ເອົາພື້ນສີຟ້າ ແລະ ໃສ່ເສື້ອສີຂາວ.
ເອກະສານການນໍາເຂົ້າສິນຄ້າແມ່ນໃຫ້ສໍາເນົາ ຫຼື ຖ່າຍ (copy ໄວ້ໜຶ່ງຊຸດ ເພື່ອໃຫ້ຮູ້ເວລາໄປກວດ ນັບວ່າຄົບຕາມຈໍານວນບໍ່.

ສະຫຼຸບ.

ຄໍາວ່າ “ຖ່າຍ” ໝາຍເຖິງການປ່ຽນແທນອັນເກົ່າດ້ວຍອັນໃໝ່ເປັນຕົ້ນການຖ່າຍຂົນຂອງໄກ່, ເປັດ, ນົກ. ການເອົາຈາກບ່ອນນຶ່ງໄປບ່ອນນຶ່ງ ການຖ່າຍສິນຄ້າຈາກຕູ້ລົດໄຟ ໄປໄວ້ສາງ. ໝາຍເຖິງການປົດທຸກ ດ້ວຍການໜັກ ຫຼື ເບົາ. ໝາຍເຖິງການກະຈາຍສຽງ ຫຼື ແພ່ພາບ. ນອກຈາກນັ້ນ, ຍັງໝາຍເຖິງການຖ່າຍ ຮູບ ຫຼື ຈໍາລອງຮູບ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo