ອະທິບາຍຄໍາວ່າ “ຂົນ” ມີຄວາມໝາຍແນວໃດ?

ຄໍາວ່າ “ຂົນ” ແມ່ນໝາຍເຖິງພາກສ່ວນໜຶ່ງຂອງຮ່າງກາຍເປັນເສັ້ນອ່ອນໆຢູ່ເທິງຜິວໜັງຂອງຄົນ ຫຼື ສັດ ແລະ ບາງເທືອເສັ້ນອ່ອນໆນ້ອຍໆ ທີ່ເກີດໃນຕົ້ນໄມ້ກໍເອີ້ນຂົນຄືກັນ. ສໍາລັບຮ່າງກາຍຂອງຄົນເຮົາເອີ້ນຂົນແຕກຕ່າງກັນຕາມບ່ອນທີ່ມັນເກີດຂຶ້ນຄື: ຂົນຄິ້ວ, ຂົນຕາ, ຂົນຫູ, ຂົນຂີ້ແຮ້, ຂົນຫຼັງ, ຂົນແຄ່ງ ຂົນຂາ, ຂົນແຂນ ເປັນຕົ້ນ. ສ່ວນສັດແມ່ນແບ່ງຕາມຊື່ເປັນສ່ວນໃຫຍ່ເຊັ່ນ: ຂົນນົກ, ຂົນມ້າ, ຂົນແກະ, ຂົນເປັດ, ຂົນໄກ່, ຂົນບົ້ງ ຍົກເວັ້ນຂົນບົ່ວ ຊຶ່ງແມ່ນຂົນທີ່ປົ່ງອອກໃໝ່ຂອງເປັດ ແລະ ໄກ່.

ນອກຈາກນັ້ນ, ຍັງໝາຍ ເຖິງການການລໍາລຽງ, ການຂົນສົ່ງສິ່ງຂອງ ຫຼື ຂົນເຄື່ອງ ຂຶ້ນເໜືອລ່ອງໃຕ້. ຄໍາວ່າ “ຂົນ” ຍັງສາມດນໍາໄປບວກກັບຄໍາອື່ນເປັນຕົ້ນ ຂົນລຸກ, ຂົນຄິງລຸກ, ຂົນຫົວລຸກ, ຂົນໜາວແຕກ, ຂົນຂວາຍ ແລະ ອື່ນໆ.

ສະນັ້ນ ເພື່ອໃຫ້ເຂົ້າໃຈ ການນໍາໃຊ້ຄໍາດັ່ງກ່າວໃຫ້ຖືກຕ້ອງຕາມຫຼັກໄວຍະກອນ ເຮົາມາເບິ່ງລາຍລະອຽດດັ່ງລຸ່ມນີ້:

ຄຳວ່າ “ຂົນ”.

“ຂົນ” (1. ຄໍານາມ) ສິ່ງທີ່ເປັນເສັ້ນປົ່ງອອກຈາກຮ່າງກາຍຂອງຄົນ ແລະ ສັດ ເວັ້ນຝ່າມື ແລະ ຝ່າຕີນ. ຂອງອື່ນໆ ທີ່ມີລັກສະນະຄ້າຍຄືຂົນ ມີຢູ່ນໍາໝາກໄມ້ ເປັນຕົ້ນ ກໍເອີ້ນຂົນ. (2. ຄໍາກິລິຍາ) ນໍາເອົາສິ່ງຂອງໄປ ຫຼື ມາ.

ຕົວຢ່າງ:

ຂົນຄິ້ວແມ່ນໃຊ້ກັນນໍ້າໄຫຼລົງໃສ່ຕາ ແຕ່ເພື່ອຄວາມງາມ ຜູ້ຍິງຫຼາຍຄົນນິຍົມແຖຂົນຄິ້ວໃຫ້ກົ່ງ ແລະ ບາງຄົນກໍແຖໝົດ ແລ້ວສັກຄິ້ວຖາວອນ.
ໃນຫຼາຍປະເທດທີ່ຢູ່ເຂດໜາວ ມັກລ້ຽງແກະ ເພາະມັນມີປະໂຫຍດຫຼາຍແນວ ຂົນແກະມີລາຄາແພງ ໃຊ້ເຮັດເສື້ອ ເຮັດພົມ, ຊີ້ນແກະ ແລະ ນົມໃຊ້ບໍລິໂພກ.
ບົ້ງແປກ (ຢູ່ຕົ້ນແປກ) ເປັນບົ້ງທີ່ມີຂົນຍາວ ຖ້າຫາກຖືກຜິວໜັງຂອງຄົນແມ່ນຄາຍຫຼາຍ ເຮັດໃຫ້ ອອກຕຸ່ມເປັນຜື່ນຕາມຈຸດທີ່ຖືກ.
ນົກຍຸງເປັນນົກທີ່ສວຍງາມ ມີຂົນຫຼາກຫຼາຍສີສັນ ແລະ ສາມາດພືຫາງຍາວຂອງມັນອອກໃຫ້ເປັນດັ່ງວີໄດ້.
ບໍລິສັດຮຸ່ງອາລຸນ ຂົນສົ່ງດ່ວນ ສົ່ງເຄື່ອງແຕ່ວຽງຈັນ ຫາ ຕ່າງແຂວງດ້ວຍຄວາມວ່ອງໄວ ພຽງຄືນດຽວກໍສົ່ງຮອດ ແລະ ລາຄາກໍຖືກອີກດ້ວຍ.
ປະຈຸບັນ ຄົນບໍນິຍົມຂີ່ລົດເມຂົນສົ່ງ ເພາະຫັນໄປຂີ່ລົດສ່ວນຕົວ ເພາະມັນສະດວກ ແລະ ວ່ອງໄວກວ່າ ເຮັດໃຫ້ຕ້ອງນໍາເຂົ້ານໍ້າມັນເປັນຈໍານວນຫຼວງຫຼາຍ ແລະ ສ້າງມົນລະພິດອີກດ້ວຍ.

ສະຫຼຸບ.

ຄໍາວ່າ “ຂົນ” ແມ່ນສິ່ງທີ່ເປັນເສັ້ນອ່ອນໆນ້ອຍໆປົ່ງອອກຈາກຮ່າງກາຍຂອງຄົນ ແລະ ສັດ ເສັ້ນນ້ອຍກວ່າ ຜົມ ແລະ ເອີ້ນກັນຕາມຈຸດພິດເສດຂອງບ່ອນມັນເກີດຂຶ້ນ ຫຼື ຕາມຊື່ຂອງສັດທີ່ມີຂົນ. ນອກຈາກນັ້ນ, ຍັງໝາຍເຖິງການລໍາລຽງ ຂົນສົ່ງສິ່ງໃດສິ່ງນຶ່ງ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo