ເຂດເສດຖະກິດບຶງທາດຫຼວງຈະຊ່ວຍໃຫ້ມີນັກທ່ອງທ່ຽວເຂົ້າມາລາວຫລາຍຂື້ນ.
ພາບ: suelao.com
ສປປ ລາວຈະມີນັກທ່ອງທ່ຽວຫລາຍຂື້ນຫລັງຈາກເຂດເສດຖະກິດພິເສດບຶງທາດຫລວງສຳເລັດ.
ດັ່ງທີ່ໄດ້ເຫັນກັນທີ່ນະຄອນຫລວງວຽງຈັນບຶງທາດຫລວງທີ່ກ່ຳລັງກໍສ້າງຂື້ນເປັນຮູບເປັນຮາງເລັກນ້ອຍຕິດກັບສູນການຄ້າລາວໄອເຕັກ, ຫາກວ່າການກໍສ້າງສຳເລັດຕາມແບບແຜນແລ້ວຖືວ່າຈະເປັນເມືອງໜຶ່ງທີ່ສວຍງາມທີ່ສຸດໃນນະຄອນຫລວງວຽງຈັນ, ພ້ອມກັບຫລາຍໆທຸລະກິດທີ່ຈະເກີດຂື້ນຫລາຍຈາກນັ້ນ.
ໂຄງການພັດທະນາເຂດເສດຖະກິດພິເສດບຶງທາດຫລວງນີ້ ຕັ້ງຢູ່ໃຈກາງຕົວເມືອງນະ ຄອນຫລວງວຽງຈັນ ທີ່ຈະພັດທະນາເປັນຕົວເມືອງໃໝ່ທັນສະໄໝ ຄາດວ່າຈະສຳເລັດການກໍ່ສ້າງທັງໝົດພາຍໃນປີ 2030 ແລະ ຈະສາມາດດຶງດູດບັນດານັກທ່ອງທ່ຽວເຂົ້າມາ ສປປ ລາວ ນັບມື້ນັບຫລາຍຂຶ້ນຢ່າງຕໍ່ເນື່ອງ.
ທ່ານ ຟູຈ້ຽນ ແລະ ທ່ານ ນາງ ຫວງ ຊີວເຫວີນ ຜູ້ພັດທະນາໂຄງການເຂດເສດຖະກິດພິເສດ ບຶງທາດຫລວງ ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 25 ສິງຫາ 2020 ນີ້ວ່າ: ການພັດທະນາໂຄງການດັ່ງກ່າວ, ແມ່ນເລີ່ມມາແຕ່ປີ 2012 ແລະ ມາຮອດປັດຈຸບັນ ໄດ້ສຳເລັດການກໍ່ສ້າງຫລາຍຢ່າງ ເຊັ່ນ:
ການປັບໜ້າດິນພື້ນທີ່ໂຄງການທັງໝົດ, ການກໍ່ສ້າງເສັ້ນທາງ 30 ກິໂລແມັດພາຍໃນເຂດ, ການກໍ່ສ້າງພື້ນຖານໂຄງລ່າງໃຕ້ດິນທັງໝົດ, ສໍາເລັດການກໍ່ສ້າງອາພາດເມັ້ນບຶງທາດຫລວງ, ຕະຫລາດກະສິກໍາ, ຖະໜົນການຄ້າ ແລະ ອື່ນໆ.
ເຂດດັ່ງກ່າວມີເນື້ອທີ່ທັງໝົດ 365 ເຮັກຕາ, ເຊິ່ງການພັດທະນາປະກອບ ມີ: ອາຄານຫ້ອງການ, ຮ້ານຊັບພະສິນຄ້າ, ໂຮງແຮມ, ສະຖານທີ່ບັນເທີງ, ທີ່ພັກອາໄສ, ໂຮງໝໍ, ໂຮງຮຽນ, ວັດວາອາຮາມ, ສະຖາບັນການເງິນ, ສະຖານທີ່ພັກຜ່ອນ ແລະ ອື່ນໆຕາມອົງປະກອບຂອງຕົວເມືອງໃໝ່ສາກົນທັນສະໃໝ່ ທີ່ ກົມກືນກັບວັດທະນະທຳທ້ອງຖິ່ນ. ພາຍຫລັງສຳເລັດການກໍ່ສ້າງ ຈະສາມາດຮອງຮັບຄົນເຂົ້າມາພັກອາໄສ, ມາເຮັດວຽກ ແລະ ເຮັດທຸລະກິດຢູ່ເຂດນີ້ເຖິງ 3 ແສນກວ່າຄົນ.
ພ້ອມກັນນ້ັນ, ກໍຈະສາມາດສ້າງວຽກເຮັດງານທໍາເຖິງ 5.000-10.000 ຕຳແໜ່ງ. ຂະນະດຽວກັນ, ກໍຈະສາມາດດຶງດູງນັກທ່ອງທ່ຽວ ກໍຄື ນັກທຸລະ ກິດຕ່າງປະເທດ ເຂົ້າມາທ່ອງທ່ຽວ ແລະ ລົງທຶນຢູ່ ສປປ ລາວ ນັບມື້ນັບຫລາຍຂຶ້ນ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: suelao.com
