ກະຊວງອຸດສາຫະກຳ ແລະ ການຄ້າ ປະ​ຊຸມ​ຕົວ​ແທ​ນ​ສະ​ມະ​ຊິກ​ພັກ.

ເພື່ອສະຫຼຸບຕີລາຄາການຈັດຕັ້ງປະຕິບັດວຽກງານ 5 ປີຜ່ານມາ ແລະ ທິດທາງແຜນການນໍາພາໃນ 5 ປີ ຂອງອົງຄະນະພັກກະຊວງ ອຄ, ກະຊວງອຸດສາຫະກຳ ແລະ ການຄ້າ ( ອຄ ) ໄດ້ເປີດກອງປະຊຸມຕົວແທນສະມາຊິກພັກຂອງອົງຄະນະພັກກະຊວງ ອຄ ຂຶ້ນ.

ຈະ​ໄດ້​ປ່ອນ​ບັດເລືອກຕັ້ງເອົາຜູ້ແທນສົມບູນ ແລະ ສຳຮອງເຂົ້າຮ່ວມກອງປະຊຸມໃຫຍ່ ຄັ້ງທີ XI ຂອງພັກ ໂດຍການເປັນປະທານຂອງສະຫາຍ ນາງ ເຂັມມະນີ ພົນເສນາ ກໍາມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງ ອຄ; ມີຄະນະບໍລິຫານພັກກະຊວງ, ບັນດາສະຫາຍເລຂາໜ່ວຍພັກ, ຜູ້ແທນສົມບູນ ແລະ ລັດວິສາຫະກິດອ້ອມຂ້າງກະຊວງ ອຄ ເຂົ້າຮ່ວມ.

ສະຫາຍ ນາງ ເຂັມມະນີ ພົນເສນາ ກ່າວວ່າ: ການຈັດກອງປະຊຸມແມ່ນຢູ່ໃນໄລຍະມ້ວນທ້າຍສະໄໝການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມແຫ່ງຊາດ 5 ປີ ຄັ້ງທີ VIII ແລະ ມະຕິ X ຂອງພັກ ເຊິ່ງຈະກາຍເປັນພື້ນຖານໃຫ້ແກ່ກອງປະຊຸມໃຫຍ່ຜູ້ແທນອົງຄະນະພັກກະຊວງ ອຄ ຄັ້ງທີ V ເພື່ອກ້າວເຂົ້າສູ່ການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມແຫ່ງຊາດ 5 ປີ ຄັ້ງທີ IX ແລະ ມະຕິ XI ຂອງພັກ.

ກອງປະຊຸມຄັ້ງນີ້ ຍັງເປັນການປະຕິບັດຕາມແຈ້ງການຂອງຄະນະເລຂາທິການສູນກາງພັກ ໂດຍມີຄຳສັ່ງໃຫ້ບັນດາກະຊວງ – ອົງການຂອງພັກ – ລັດ, ແນວລາວສ້າງຊາດ ແລະ ອົງການຈັດຕັ້ງມະຫາຊົນຈຳນວນໜຶ່ງ ລວມທັງໝົດ 19 ພາກສ່ວນ, ໃນນັ້ນລວມມີ ກະຊວງ ອຄ ໃຫ້ເລື່ອນການຈັດກອງປະຊຸມໃຫຍ່ຜູ້ແທນອົງຄະນະພັກຂັ້ນຕົນ ແລະ ໃຫ້ຈັດພາຍຫຼັງສຳເລັດກອງປະຊຸມໃຫຍ່ ຜູ້ແທນທົ່ວປະເທດ.

ດ້ວຍເຫດນີ້, ກະຊວງ ອຄ ຈຶ່ງໄດ້ເລື່ອນການຈັດກອງປະຊຸມໃຫຍ່ຜູ້ແທນອົງຄະນະພັກ ກະຊວງ ອຄ ຄັ້ງທີ V ໄປຈັດໃສ່ພາຍຫຼັງສໍາເລັດກອງປະຊຸມໃຫຍ່ ຄັ້ງທີ XI ຂອງພັກ.

ສະຫາຍ ນາງ ເຂັມມະນີ ພົນເສນາ ກ່າວຕື່ມອີກວ່າ:

ໂດຍປະຕິບັດຕາມເນື້ອໃນຈິດໃຈຂອງແຈ້ງການດັ່ງກ່າວ, ກອງປະຊຸມໃນຄັ້ງນີ້ ຈຶ່ງມີຈຸດປະສົງເພື່ອຜ່ານບົດສະຫຼຸບຕີລາຄາການຈັດຕັ້ງປະຕິບັດໜ້າທີ່ວຽກງານນຳພາຂອງອົງຄະນະພັກ ກະຊວງ ອຄ ໄລຍະ 5 ປີ ແຕ່ 2016 – 2020 ແລະ ທິດທາງແຜນການ 5 ຕໍ່ໜ້າ ແຕ່ 2021 – 2025 ເຊິ່ງບັນດາສະຫາຍທັງໝົດໄດ້ພ້ອມກັນປະກອບຄຳເຫັນລົງປະຊາມະຕິ ເພື່ອຮັບຮອງບົດລາຍງານດັ່ງກ່າວ.

ພ້ອມທັງໄດ້ປ່ອນບັດເລືອກຕັ້ງເອົາບຸກຄະລາກອນ ເພື່ອເປັນຜູ້ແທນຂອງອົງຄະນະພັກ ກະຊວງ ອຄ ໄປຮ່ວມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ເຊິ່ງມີບັນດາສະຫາຍຜູ້ແທນລົງສະໝັກ 11 ສະຫາຍ, ປ່ອນບັດຄັດເລືອກເອົາຜູ້ແທນສົມບູນ 6 ສະຫາຍ ແລະ ສຳຮອງ 2 ສະຫາຍ ເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ.

ຕິດຕາມ​ຂ່າວການ​ເຄືອນ​ໄຫວທັນ​​ເຫດ​ການ ເລື່ອງທຸ​ລະ​ກິດ ແລະ​ ເຫດ​ການ​ຕ່າງໆ ​ທີ່​ໜ້າ​ສົນ​ໃຈໃນ​ລາວ​ໄດ້​ທີ່​ DooDiDo

ຂອບ​ໃຈແຫລ່ງ​ທີ່​ມາ​: laoedaily.com.la