ອະທິບາຍພາສາລາວຄໍາວ່າ: ເງິນເຟີ້ ແລະ ເງິນຝືດ
ຄໍາວ່າ: ເງິນເຟີ້ ແລະ ເງິນຝືດ ມີຄວາມໝາຍຢ່າງໃດ ?
ໃຜທີ່ອ່ານຂ່າວ ຫຼື ຟັງຂ່າວກ່ຽວກັບເສດຖະກິດການເງິນໄລຍະນີ້ກໍ່ອາດຈະຮູ້ວ່າປັນຫາເລື່ອງເສດຖະກິດຂອງໂລກບໍ່ວ່າຈະເປັນປະເທດໃດກໍ່ຕາມລ້ວນແລ້ວແຕ່ພົບກັບວິກິດການທາງດ້ານເສດຖະກິດຕົກຕໍ່າ ສະນັ້ນ, ປະເທດລາວຍັງເປັນປະເທດທີ່ນຳຫຼັງຫລາຍໆປະເທດພໍສົມຄວນ ແລະ ປະຈຸບັນນີ້ເງິນກີບກໍ່ຖືວ່າຕ່ຳລົງຫລາຍ, ທັງຍັງເປັນບັນຫາທີ່ພະນັກງານຫລາຍຄົນທັກທ້ວງກັນຢູ່ເນື່ອງຈາກຄ່າເງິນກີບທີ່ເຟີ້ ແລະ ຄ່າຄອງຊີບທີ່ນັບມື້ນັບສູງຂື້ນຖືວ່າລາວເຮົາກໍາລັງພົບກັບບັນຫາທາງດ້ານເງິນເຟີ້ຫລາຍເຕີບ.
ສະນັ້ນໃນນີ້ເຮົາຈະມາເວົ້າ ແລະ ມາອະທິບາຍກ່ຽວກັບຄຳສັບທີ່ວ່າ ເງິນເຟີ້ ແລະ ເງິນຝືດກັນ, ດັ່ງທີ່ໄດ້ເວົ້າມາແລ້ວ, ດ້ວຍລາຍຮັບໜ້ອຍ ແຕ່ ລາຍຈ່າຍຫຼາຍ ຄ່າຄອງຊີບສູງ ຄ່າແຮງງານໃນບັນດາໂຮງຈັກໂຮງງານ ແມ່ນແຕ່ພະນັກງານຂອງລັດເອງກໍ່ຖືວ່າຍັງຕໍ່າຢູ່ສ່ວນຄ່າເງິນໂດລາ ແລະ ເງິນບາດຂອງໄທສູງຂື້ນຫລາຍກໍ່ເລີຍເກີດສະພາວະເງິນກີບຕ່ຳລົງ ເອີ້ນວ່າ “ເງິນເຟີ້” ແລະ ເຮັດໃຫ້ການຈັບຈ່າຍຂອງປະຊາຊົນຕ້ອງໄດ້ປະຫຍັດມະທະຢັດຈົນເຮັດໃຫ້ກາຍເປັນສະພາບເອີ້ນວ່າ “ເງິນຝືດ” ເກີດຂຶ້ຍຢ່າງໃນປັດຈຸບັນ ສະນັ້ນ, ເຮົາມາຮູ້ຈັກຄວາມໝາຍຂອງເງິນເຟີ້ ແລະ ເງິນຝືດນໍາກັນເລີຍ.
- ເງິນເຟີ້ ຄື:
ພາວະການທີ່ລະດັບລາຄາສິນຄ້າ ແລະ ການບໍລິການໂດຍທົ່ວໄປເພີ່ມຂຶ້ນຢ່າງຕໍ່ເນື່ອງ ຫາກເງິນເຟີ້ເພີ່ມຂຶ້ນແຕ່ພຽງເລັກນ້ອຍ ເປັນປົກກະຕິຈະສ້າງແຮງຈູງໃຈແກ່ຜູ້ປະກອບການ. ແຕ່ເພີ່ມຂຶ້ນຫຼາຍ ແລະ ຜັນຜວນ ກໍ່ຈະສ້າງຄວາມບໍ່ແນ່ນອນ ແລະກໍ່ໃຫ້ເກີດປັນຫາຕໍ່ລະບົບເສດຖະກິດໂດຍສະເພາະການຄອງຊີບຂອງປະຊາຊົນ ແລະ ການຂາດສະຖຽນລະພາບທາງເສດຖະກິດ ເຊິ່ງເປັນອຸປະສັກຕໍ່ການພັດທະນາເສດຖະກິດ.
ຕາມຫຼັກທິດສະດີທາງເສດຖະສາດ ການເກີດພາວະເງິນເຟີ້ມາຈາກ 2 ປັດໃຈ ຄື:
– ປັດໃຈທີໜຶ່ງຄືແຮງດຶງທາງດ້ານອຸປະສົງເກີດຂຶ້ນຈາກລະບົບເສດຖະກິດມີຄວາມຕ້ອງການປະລິມານສິນຄ້າ ແລະ ການບໍລິການຫຼາຍກວ່າທີ່ມີຢູ່ໃນຂະນະນັ້ນໆ ຈຶ່ງດຶງໃຫ້ລາຄາສິນຄ້າເພີ່ມສູງຂຶ້ນທັງນີ້ການເພີ່ມຂຶ້ນຂອງຄວາມຕ້ອງການສິນຄ້າ ແລະ ການບໍລິການອາດມາຈາກຫຼາຍສາເຫດເຊັ່ນ: ການປ່ຽນແປງຂອງປະລິມານເງິນ ການດຳເນີນນະໂຍບາຍການຄັງຂອງລັດຖະບານ ການເພີ່ມຂຶ້ນຂອງອຸປະສົງໃນຕ່າງປະເທດ ແລະ ການປ່ຽນແປງພຶດຕິກໍາບໍລິໂພກຂອງປະຊາຊົນ.
– ປັດໃຈທີ່ສອງ ເກີດຈາກດ້ານຕົ້ນທຶນການຜະລິດສູງຂຶ້ນ ເຮັດໃຫ້ຜູ້ຜະລິດຕ້ອງປັບລາຄາສິນຄ້າຂຶ້ນ ສາເຫດທີ່ເຮັດໃຫ້ຕົ້ນທຶນການຜະລິດສູງຂຶ້ນ ເຊັ່ນວ່າການເພີ່ມຂຶ້ນຂອງຄ່າຈ້າງແຮງງານ ການເກີດວິກິດການທາງທໍາມະຊາດ ການເພີ່ມກໍາໄລຂອງຜູ້ປະກອບການ ການປ່ຽນແປງຂອງລາຄາສິນຄ້ານໍາເຂົ້າຊຶ່ງອາດເພີ່ມໄປຕາມພາວະ ຕະຫຼາດໂລກ ຫຼືຜົນຂອງອັດຕາແລກປ່ຽນ.
2.ເງິນຝືດ ຄື:
ພາວະການທີ່ລະດັບລາຄາສິນຄ້າ ແລະ ການບໍລິການຫຼຸດລົງຢ່າງຕໍ່ເນື່ອງຊຶ່ງມີຄວາມໝາຍກົງກັນຂ້າມກັບຄໍາວ່າເງິນເຟີ້ ທັງນີ້ອາດມີສາເຫດຫຼາຍປະການ ເຊັ່ນ: ການເພີ່ມຂຶ້ນຂອງອຸປະທານ ການຫົດຕົວຂອງອຸປະສົງ ການຫຼຸດລົງຂອງຕົ້ນທຶນ ຈາກປັດໃຈອັດຕາແລກປ່ຽນຫຼືມາດຕະການປັບຫຼຸດພາສີ ແລະ ການທີ່ປະລິມານເງິນໝູນວຽນມີບໍ່ພຽງພໍຕໍ່ຂະໜາດຂອງລະບົບເສດຖະກິດເປັນຕົ້ນ.
ບັນຫາທັງສອງຢ່າງນີ້ ກໍາລັງສົ່ງຜົນສະທ້ອນທາງດ້ານລົບຕໍ່ເສດຖະກິດເປັນຢ່າງໜັກໃນປັດຈຸບັນໂດຍສະເພາະປະຊາຊົນຊາວຜູ້ອອກແຮງງານ ທີ່ພົບກັບປັນຫາຄ່າຈ້າງແຮງງານຕໍ່າ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo