ອະທິບາຍພາສາລາວຄວາມໝາຍຂອງຄໍາວ່າ: ຈອງ ແລະ ຈ່ອງ
DooDiDo
ຄໍາວ່າ: ຈອງ ແລະ ຈ່ອງ ມີຄວາມໝາຍແນວໃດໃນພາສາລາວ?
ໃນພາສາລາວການໃຊ້ວັນນະຍຸດກັບຄຳຕ່າງໆສ່ວນຫລາຍຈະເຮັດໃຫ້ຄວາມໝາຍຂອງຄຳດັ່ງກ່າວປ່ຽນໄປ ອາດຈະຫລາຍ ຫລື ນ້ອຍແລ້ວແຕ່ຄຳສັບນັ້ນໆເຊິງໃນນັ້ນອາດຈະຂື້ນກັບຕົວອັກສອນແດ່ເພາະອັກສອນບາງຕົວກໍບໍ່ສາມາດປ່ຽນສຽງໄດ້ຈາກການໃສ່ວັນນະຍຸດໃຫ້ມັນ.
ບົດນີ້ຈະຍົກເອົາຄຳວ່າ ຈອງ ແລະ ຈ່ອງ ມາອະທິບາຍ, ເຊິງສອງຄຳນີ້ອ່ານອອກສຽງທີ່ໃກ້ຄຽງກັນແຕ່ວັນນະຍຸດຕ່າງກັນ ແຕ່ຄົນຕ່າງຊາດກໍ່ຍັງຈຳແນກສຽງອອກຍາກຢູ່ດີ ເພາະພາສາ ສາກົນບໍ່ມີວັນນະຍຸດສ່ວນຫຼາຍຈະອ່ານອອກສຽງກາງທີ່ບໍ່ມີສຽງ ເອກ-ໂທ ຄືພາສາລາວ ກັບ ພາສາໄທ. ແຕ່ໃນນີ້ຈະຕ້ອງເນັ້ນໜັກໃນການອອກສຽງ ຄໍາວ່າ: ຈອງ ແລະ ຈ່ອງ ມັນມີຄວາມໝາຍໄປຄົນລະຢ່າງກັນ ແລະ ແຕ່ລະຄໍາກໍ່ມີຄວາມໝາຍໄປອີກຫຼາຍຢ່າງ.
ຄໍາວ່າ ຈອງ.
- ເປັນຊື່ຂອງອຸປະກອນເອົາໄວ້ສຳລັບເຄື່ອງໃຊ້ໃນຄົວ ເພື່ອໃຊ້ຕັກ,ຄົນ ຂອງກິນໃນເວລາຄົວກິນ ຫຼືຕັກໃສ່ຖ້ວຍ ໃສ່ຈານເພື່ອເອົາມາກິນມີລັກສະນະຄ້າຍຄືຊ້ວານແຕ່ມີຂະໜາດນ້ອຍກວ່າຊ້ວານແຕ່ໃຫຍ່ກວ່າບ່ວງ ແລະ ຈະມີດ້າມຈັບທີ່ເປັນໄມ້ ຫຼື ຢາງທີ່ກັນຕໍ່ຄວາມຮ້ອນໄດ້ເວລາເຮົາຈັບ.
- ໝາຍເຖິງການໝັ້ນໝາຍ,ການຈັບຈອງໄວ້,ຈ້ອງມອງໄວ້ກ່ອນ,ໝາຍໄວ້ໃນໃຈ,ຫວງແຫນໄວ້, ມັດຈຳ… ແຕ່ຍັງບໍ່ທັນໄດ້ເປັນກໍາມະສິດເຕັມຮ້ອຍ. ເຊິ່ງມີຄວາມໝາຍວ່າຖືກໃຈແລ້ວຈອງໄວ້, ອີກຢ່າງມີຄວາມໝາຍວ່າ ໃສ່ໂສ້ ຫຼື ຄາໄວ້, ໃສ່ໄວ້ໃນຂຸມຂັງ
ຕົວຢ່າງ:
ສາວຜູ້ນີ້ຂ້ອຍຂໍຈອງເດີ, ທີ່ດິນຕອນນີ້ຂ້ອຍຈັບຈອງມາກ່ອນແລ້ວ.
ເຮືອນຫຼັງນີ້ຂ້ອຍຈອງມັດຈໍາໄວ້ກ່ອນ ແຕ່ຈ່າຍເງິນບໍ່ທັນໝົດ.
ຄຳວ່າ ຈ່ອງ.
ມີຄວາມໝາຍຄື ແຂວນ, ເກາະ, ດຶງ, ທ່ວງດຶງ ມີສອງສົ້ນດຶງກັນໄວ້ດ້ວຍເສັ້ນເຊືອກ, ໜ່ຽວດຶງ, ກີດກັ້ນເຮັດໃຫ້ມີຄວາມເຄັ່ງຕຶງ…
ຕົວຢ່າງ:
ຈ່ອງອະນາຄົດ ໝາຍເຖິງເຮັດໃຫ້ອະນາຄົດຕົກຕໍ່າລົງກວ່າທີ່ຈະພັດທະນາໄປໄກກວ່ານີ້,.
ເມື່ຶອມັດເຊືອກຜູກໄວ້ສອງສົ້ນໃຫ້ເຄັ່ງແລ້ວດຶງເຄິ່ງກາງໃຫ້ກ່ອງລົງເອີ້ນວ່າການຈ່ອງ…
ສະຫລຸບ.
ຈອງ ແລະ ຈ່ອງ ມີຄວາມໝາຍຕ່າງກັນ ແຕ່ອອກສຽງຄ້າຍຄືກັນ ຈອງ ມີຄວາມໝາຍວ່າການໝັ້ນໝາຍ, ການຈັບຈອງໄວ້, ຈ້ອງມອງໄວ້ກ່ອນ. ສ່ວນຄຳວ່າ ຈ່ອງ ມີຄວາມໝາຍຄື ແຂວນ, ເກາະ, ດຶງ, ທ່ວງດຶງ .
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
