ອະທິບາຍຄວາມຄືກັນ ແລະ ຕ່າງກັນ ຂອງຄຳວ່າ ກຸ້ມ ແລະ ຄຸ້ມ
DooDiDo
ຄຳວ່າ ກຸ້ມ ແລະ ຄຸ້ມ ມີຄວາມໝາຍອັນດຽວກັນບໍ່?
ໃນພາສາລາວຫລາຍໆຄຳມີຄວາມໝາຍແຕກຕ່າງກັນ ແລະ ຫລາຍໆຄຳກໍມີຄວາມໝາຍທີ່ໃກ້ຄຽງກັນສະນັ້ນການທີ່ຈະນຳໃຊ້ໃຫ້ຖືກຕ້ອງແທ້ກໍຕ້ອງໄດ້ສືກສາລົງເລີກອີກກວ່າປົກກະຕິ, ວ່າເຮົາຄວນໃຊ້ຄຳໃດແທ້ໃນພາສາລາວ ຈິ່ງຈະເໝາະສົມ ແລະ ຈະສະກົດຄຳແບບໃດໃຫ້ຖືກຕ້ອງຕາມຫລັກໄວຍາກອນຂອງພາສາລາວ.
ໃນພາສາລາວຄຳວ່າກຸ້ມ ແລະ ຄຸ້ມ ມີທັງຄວາມໝາຍທີ່ແຕກຕ່າງກັນ ແລະ ມີຄວາມໝາຍຄ້າຍຄືກັນເລັກນ້ອຍ ແລະ ບາງຄວາມໝາຍສາມາດໃຊ້ແທນກັນໄດ້ ເຊິງອິງໃສ່ບາງສ່ວນຈາກວັດຈະນານຸກົມພາສາລາວມາເປັນບ່ອນອິງໃສ່ເພື່ອອະທິບາຍ ແລະ ເພື່ອທໍາຄວາມເຂົ້າໃຈຢ່າງເລິກເຊິ່ງກ່ຽວກັບຄໍາສັນນີ້ ໃຫ້ລະອຽດ.
ຄຳວ່າ ກຸ້ມ.
- ເປັນຄໍານາມ ກອງເຂົ້າເປືອກທີ່ຟາດເອົາເຟືອງອອກ ແລ້ວເອີ້ນວ່າ: ກຸ້ມເຂົ້າ.
- ແມ່ນເຂົ້າກໍາລັງອອກຮວງໃກ້ຊິສຸກແລ້ວຮວງມັນກ່ອງລົງ ເອີ້ນວ່າ: ເຂົ້າກຸ້ມ.
- ກຸ້ມກວມ ຊ່ວຍເຫຼືອ ເອົາຕົວເອງລອດໄດ້
- ກຸ້ມ ຄວາມໝາຍອີກຢ່າງຄື: ຄວາມອຸກອັ່ງ ຄວາມເສຍໃຈ ເຫງົາໃຈ ນ້ອຍໃຈ ມັກເອີ້ນວ່າ: ກຸ້ມ
- ເວົ້າເຖິງອາຍຄວັນກຸ້ມກົ້ວໄປທົ່ວ ເຊັ່ນ: ຄວັນກຸ້ມ, ໝອກກຸ້ມ…
ແຕ່ຄວາມຈິງແຕ່ລະຄໍາຍັງມີອີກຄວາມໝາຍຍ່ອຍອີກຫຼາຍແຕ່ເຮົາຄັດເອົາສະເພາະເນື້ອໃນ ແລະ ຄວາມໝາຍອັນທີ່ເຄີຍໃຊ້ໃນສັງຄົມປັດຈຸບັນມາເວົ້າ ມາຊີ້ແຈງໃຫ້ຄວາມໝາຍກະຈ່າງແຈ້ງຂຶ້ນຕື່ມອີກ.
ຕົວຢ່າງ:
- ກຸ້ມພີ່ກຸ້ມນ້ອງ ມີຄວາມໝາຍວ່າ ເອົາຕົວເອງລອດແລ້ວ ຍັງສາມາດຊ່ວຍເຫຼືອພີ່ນ້ອງໄດ້.
- ຮຽນຈົບປະລິນຍາມາຫາລ້ຽງຍັງບໍ່ກຸ້ມກິນ.
- ລະດູໜາວຢູ່ທາງພາກເໜືອມີໝອກກຸ້ມທົວບໍລິເວນ.
ຄຳວ່າ ຄຸ້ມ.
ມີຄວາມໝາຍວ່າ ກັນ, ປ້ອງກັນ, ພໍ, ພໍສົມຄວນ, ເໝາະສົມ, ໃຊ້ເປັນປະໂຫຍດ, ໃຊ້ໄດ້ທຸກຢ່າງ, ຍາວນານ, ຫລື ທາງທຸລະກິດກໍຄື ບໍ່ຂາດທືນ, ອີກຄວາມໝາຍໜຶ່ງກໍຄື ເຂດໃດໜຶ່ງ, ໃຊ້ເປັນຊື່ເອີ້ນເຂດໃດເຂດໜຶ່ງ.
ຕົວຢ່າງ:
- ບ້ານຂ້ອຍຢູ່ຄຸ້ມລຸ່ມ ສ່ວນເຮືອນພໍ່ແມ່ຂ້ອຍແມ່ນຢູ່ຄຸ້ມເທິງ.
- ແຖວນີ້ແມ່ນມີກອງຫລອນບ້ານຄຸ້ມກັນຢູ່.
- ຂ້ອຍຊື້ເກີບຄູ່ນີ້ມາຄຸ້ມຄ່າແທ້ໆ, ໃຊ້ຈົນຂາດ.
ສະຫລຸບ.
ຄຳວ່າ ກຸ້ມ ໝາຍເຖິງ ຊ່ວຍເຫຼືອ ເອົາຕົວເອງລອດໄດ້, ກຸ້ມອີກຄວາມໝາຍໜຶ່ງໝາຍເຖິງອຸກອັງໃນໃຈ, ສ່ວນຄຳວ່າ ຄຸ້ມ ມີຄວາມໝາຍວ່າ ກັນ, ປ້ອງກັນ, ພໍ, ພໍສົມຄວນ, ເໝາະສົມ, ໃຊ້ເປັນປະໂຫຍດ, ໃຊ້ໄດ້ທຸກຢ່າງ, ຍາວນານ, ຫລື ທາງທຸລະກິດກໍຄື ບໍ່ຂາດທືນ, ອີກຄວາມໝາຍໜຶ່ງກໍຄື ເຂດໃດໜຶ່ງ, ໃຊ້ເປັນຊື່ເອີ້ນເຂດໃດເຂດໜຶ່ງ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
