ການນຳໃຊ້ ມື້ ແລະ ວັນ ໃຫ້ຖືກຕ້ອງໃນພາສາລາວ
ຄໍາວ່າ ມື້ ແລະ ວັນ ມີຄວາມໝາຍອັນດຽວກັນບໍ່ໃນພາສາລາວ?
ຫລາຍໆຄົນອາດຈະຍັງບໍ່ເຂົ້າໃຈດີກັບຄຳວ່າ ມື້ ແລະ ວັນ, ເຊືອແນວ່າການນຳໃຊ້ສອງຄຳນີ້ ຍັງຄົງເປັນຂໍ້ສົງໄສກັນຢູ່ວ່າຄວນໃຊ້ຄຳໃດແທ້ໃນພາສາລາວ ຈິ່ງຈະເໝາະສົມ ແລະ ຈະໃຊ້ໃນເວລາໃດໃຫ້ຖືກຕ້ອງຕາມຫລັກໄວຍາກອນຂອງພາສາລາວນັ້ນເຮົາຈະມາຮູ້ຈັກ ແລະ ເວົ້າລາຍລະອຽດພ້ອມຍົກຕົວຢ່າງໃຫ້ເຫັນໄປນຳກັນເລີຍ.
ໃນພາສາລາວຄຳວ່າ ມື້ ແລະ ວັນ ມີຄວາມໝາຍຄ້າຍຄືກັນ, ທັງສອງຄຳນີ້ລ້ວນແຕ່ເປັນຄຳລາວເດີມ ແລະເປັນຄຳຮ່ວມຄວາມໝາຍ ແຕ່ກໍບໍ່ສາມາດໃຊ້ແທນກັນໄດ້ໃນທຸກກໍລະນີ. ແຕ່ບາງຄວາມໝາຍສາມາດໃຊ້ແທນກັນໄດ້ເຊິງອິງໃສ່ ບາງສ່ວນຈາກວັດຈະນານຸກົມພາສາລາວ ມາເປັນບ່ອນອິງໃສ່ເພື່ອອະທິບາຍ ແລະ ເພື່ອທໍາຄວາມເຂົ້າໃຈຢ່າງເລິກເຊິ່ງກ່ຽວກັບຄໍາສັນນີ້ ໃຫ້ລະອຽດຂື້ນຕືມ
ຄຳວ່າ ມື້.
ເປັນຄຳນາມ ມີຄວາມໝາຍ ມື້ ໝາຍເຖິງ ຍາມ, ຕອນ,… ແລະ ຍັງໝາຍເຖິງ ເວລາ 24 ຊົ່ວໂມງ ທັງກາງເວັນແລະກາງຄືນ, ລວມທັງໄລຍະເວລາ 12 ຊົ່ວໂມງ ເຊັ່ນ ມື້ເວັນ, ມື້ຄືນ.
ຕົວຢ່າງ:
- ມື້ຄືນນີ້ມີງານລ້ຽງຢູ່ຫ້ອງການ
- ມື້ອື່ນຂ້ອຍຈະໄປວັງວຽງມີຜູ້ໃດສົນໃຈຢາກໄປນຳບໍ່?
- ມື້ນີ້ຈະໄປຫລິ້ນກັບໝູ່ກ່ອນ ລູກລາວເກີດໄດ້ສາມມື້ແລ້ວ.
ຄຳວ່າ ວັນ.
ເປັນຄຳນາມ ມີຄວາມໝາຍດຽວກັນກັບມື້ແຕ່ບາງຢ່າງກໍນຳໃຊ້ຕ່າງກັນໄປເລັກນ້ອຍ, ມີຄວາມໝາຍວ່າ ໄລຍະເວລາໃນຕອນກາງເວັນ, ໃຊ້ເປັນຊື່ຂອງວັນທັງ 7 ຄື ວັນອາທິດ ວັນຈັນ ວັນອັງຄານ ວັນພຸດ ວັນພະຫັດ ວັນສຸກ ວັນເສົາ ແລະ ໃຊ້ເອີ້ນເປັນຊື່ຂອງມື້ວັນສຳຄັນຕ່າງໆ.
ຕົວຢ່າງ:
- ແມ່ຂ້ອຍໄປທ່ອງທ່ຽວກັບທົວເຂົາ ສາມວັນສອງຄືນ.
- ວັນທີ່ 2 ທັນວາ ແມ່ນວັນສະຖາປະນາຊາດລາວ
- ແຮງງານກຳມະກອນສ່ວນຫລາຍເຂົາເຈົ້າພັກວັນສິນ.
ສະຫຼຸບ.
ໃນພາສາລາວຄຳວ່າມື້ ໝາຍເຖິງ ຍາມ, ຕອນ, ມື້ໜຶ່ງ 24ຊົວໂມງ, ສ່ວນຄຳວ່າ ວັນ ມີຄວາມໝາຍດຽວກັນກັບມື້ແຕ່ບາງຢ່າງກໍນຳໃຊ້ຕ່າງກັນໄປເລັກນ້ອຍ, ມີຄວາມໝາຍວ່າ ໄລຍະເວລາໃນຕອນກາງເວັນ, ໃຊ້ເປັນຊື່ຂອງວັນທັງ 7 ຄື ວັນອາທິດ ວັນຈັນ ວັນອັງຄານ ວັນພຸດ ວັນພະຫັດ ວັນສຸກ ວັນເສົາ ແລະ ໃຊ້ເອີ້ນເປັນຊື່ຂອງມື້ວັນສຳຄັນຕ່າງໆ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo