ສປປ ລາວ ຮ່ວມກັນຫາລືບັນຫາສົ່ງສິນຄ້າອອກ ສປ ຈີນ
ໜັງສືພິມປະຊາຊົນ
ທັງພາກລັດ ແລະ ທຸລະກິດລາວ ປືກສາຫາລືການສົ່ງສິນຄ້າໄປ ສປ ຈີນ ໃຫ້ຄ່ອງຕົວ.
ໃນນັ້ນ, ທ່ານ ລັດຖະມົນຕີໄດ້ສະເໜີວິທີແກ້ໄຂຄື: ໃຫ້ຄະນະສະເພາະກິດ ທີ່ຮັບຜິດຊອບແກ້ໄຂບັນຫາລົດອັ່ງອໍ ຢູ່ດ່ານບໍ່ເຕັນ ລະຫວ່າງ ສປປ ລາວ ແລະ ສປ ຈີນສືບຕໍ່ເຈລະຈາຊອກຫາວິທີການແກ້ໄຂບັນຫາ ຢູ່ດ່ານບໍ່ເຕ່ນໂດຍໄວ ເປັນຕົ້ນ: ການເພີ່ມພະນັກງານຂັບລົດເສື້ອຂາວ, ເພີ່ມການອະນຸຍາດໃຫ້ ລົດຂົນສົ່ງສິນຄ້າເຂົ້າ-ອອກດ່ານໃຫ້ມີຈຳນວນຫຼາຍຂຶ້ນກວ່າເກົ່າ ແລະການເພີ່ມເວລາເຮັດວຽກຂອງເຈົ້າໜ້າທີ່ຢູ່ດ່ານ; ສະເໜີກະຊວງການຕ່າງປະເທດ ສົມທົບພາກສ່ວນທີ່ກ່ຽວຂ້ອງ ຢູ່ຂັ້ນສູນກາງ ແລະຂັ້ນແຂວງ ເພື່ອເຈລະຈານໍາຝ່າຍຈີນ ກ່ຽວກັບການເປີດດ່ານ ປາງໄຮ (ເມືອງສິງ)-ຊ້າເຫີ (ເມືອງຫຼາ), ດ່ານສາກົນ ລານຕຸ້ຍ (ຜົ້ງສາລີ)-ເມືອງຄໍາ (ພູເອີ), ດ່ານທາງນໍ້າ (ນໍ້າຂອງ) 240 ແລະຊ່ອງທາງການຂົນສົ່ງສິນຄ້າສະເພາະຢູ່ດ່ານບໍ່ເຕ່ນ-ບໍ່ຫານ; ສະເໜີກະຊວງໂຍທາທິການ ແລະຂົນສົ່ງ ລະດົມທຸລະກິດ, ຜູ້ປະກອບການຂົນສົ່ງ ໃຫ້ສາມາດຕອບສະໜອງ ລົດຂົນສົ່ງສິນຄ້າສົ່ງອອກຂອງລາວ ໃຫ້ພຽງພໍ ແລະໄດ້ມາດຕະຖານ ເພື່ອຊ່ວຍລະບາຍລົດອັ່ງອໍຢູ່ດ່ານສາກົນບໍ່ເຕ່ນ.
ສຳລັບ ວຽກງານການເຈລະຈາພືດສົ່ງອອກ ສະເໜີກະຊວງກະສິກໍາ ແລະປ່າໄມ້ ສືບຕໍ່ຄົ້ນຄວ້າອອກນິຕິກໍາຜັຂະຫຍາຍ ແລະເຜີຍແຜ່ ກ່ຽວກັບລາຍການພືດສົ່ງອອກໄປ ສປ ຈີນ ເປັນແຕ່ລະຊະນິດ (ທຸກໆໂຄງການ ການຮ່ວມມືກັບ ສປ ຈີນ) ພາຍຫຼັງສໍາເລັດການລົງນາມອະນຸສັນຍາການສົ່ງອອກພືດທີ່ໄດ້ຕົກລົງກັນ ລະຫວ່າງ ສປປ ລາວ ແລະ ສປ ຈີນ ເພື່ອເປັນຂໍ້ມູນໃຫ້ບັນດາຫົວໜ່ວຍທຸລະກິດທີ່ມີຄວາມສົນໃຈປູກພືດເພື່ອສົ່ງອອກໄປ ສປ ຈີນ.
ທ່ານຍັງໄດ້ກ່າວຕື່ມວ່າ: ບັນດາຄຳເຫັນຕ່າງໆຂອງຜູ້ເຂົ້າຮ່ວມກອງປະຊຸມໃນຄັ້ງນີ້ ຈະໄດ້ສັງລວມ ເພື່ອກະກຽມເນື້ອໃນລາຍງານຕໍ່ລັດຖະບານ ແລະປະກອບເນື້ອໃນເຂົ້າກອງປະຊຸມຄະນະກໍາມະການອໍານວຍຄວາມສະດວກທາງດ້ານການຄ້າທົ່ວປະເທດ ຄັ້ງທີ IV ທີ່ຈະຈັດຂຶ້ນໃນເດືອນ ມັງກອນ 2022.
ຂ່າວຈາກ: ໜັງສືພິມປະຊາຊົນ
