ລົດໄຟລາວ-ຈີນ ຍົກລະດັບໃຫ້ ລາວ ໄດ້ຮັບໂອກາດສໍາຄັນຫລາຍດ້ານ
ໂອກາດຈາກທາງ ລົດໄຟລາວ-ຈີນ ຍົກລະດັບໃຫ້ ສປປ ລາວ ມີໂອການໃນການພັດທະນາເສດຖະກິດ-ສັງຄົມ
ລົດໄຟລາວ-ຈີນ ນັບວ່າເປັນຊ່ອງທາງອັນສຳຄັນໃນການພັດທະນາ ສປປ ລາວ ໃນປະຈຸບັນ ເຊິ່ງນັບແຕ່ເປີດໃຫ້ບໍລິການເສັ້ນທາງລົດໄຟລາວ-ຈີນໃນທ້າຍປີ 2021 ຜ່ານມາ ເຊິ່ງບໍ່ພຽງແຕ່ປ່ຽນສະຖານະພາບຂອງ ສປປ ລາວ ຈາກປະເທດທີ່ບໍ່ມີຊາຍແດນຕິດກັບທະເລກາຍ ເປັນປະເທດເຊື່ອມໂຍງເຊື່ອມຈອດ ພາກພື້ນ-ສາກົນ ຄັ້ງປະຫວັດສາດເທົ່ານັ້ນຫາກ ມັນຍັງຊ່ວຍຍົກລະດັບເຮັດໃຫ້ ສປປ ລາວ ໄດ້ຮັບໂອກາດສໍາຄັນ ໃໝ່ໆປະກອບສ່ວນ ເຂົ້າໃນການພັດທະນາເສດຖະກິດ-ສັງຄົມ ແລະ ຄວາມຈະເລີນຮຸ່ງເຮືອງ ຮອບດ້ານພາຍໃນປະເທດ, ຂົງພາກພື້ນ ແລະ ສາກົນອີກດ້ວຍ.
ດັ່ງທີ່ຮູ້ນໍາກັນ ປີ 2023 ນີ້, ທາງລົດໄຟລາວ-ຈີນ ໄດ້ສະແດງໃຫ້ເຫັນທ່າອ່ຽງການພັດທະນາ ດ້ານການບໍລິການໂດຍສານ ແລະ ການຂົນສົ່ງຢ່າງຟົດຟື້ນ ໃນນັ້ນໄຕມາດທີ 1, ທາງລົດໄຟລາວ-ຈີນ ໄດ້ຂົນສົ່ງຜູ້ໂດຍສານທັງໝົດ 4.620.000 ຄົນ, ທຽບໃສ່ໄລຍະ ດຽວກັນຜ່ານມາແມ່ນເພີ່ມຂຶ້ນ 185%; ຈໍານວນການຂົນສົ່ງສິນຄ້າ 5.160.000 ໂຕນ ແມ່ນ ເພີ່ມຂຶ້ນ 215%; ສິນຄ້າຂ້າມແດນບັນລຸເຖິງ 1.100.000ໂຕນ, ເພີ່ມຂຶ້ນ 290% ເຊິ່ງເຫັນວ່າທາງລົດໄຟລາວ-ຈີນ ດັ່ງກ່າວແມ່ນທາງລົດໄຟ ທີ່ມີຄວາມສຳຄັນສາຍໜຶ່ງ ທີ່ຈີນ ແລະ ລາວ ສອງປະເທດຮ່ວມມືກັນກໍ່ສ້າງ, ແລະ ຖືກຂະໜານນາມວ່າເປັນ ” ໄຂ່ມຸກແຫ່ງການຮ່ວມມືລະຫວ່າງ ສປ ຈີນ- ສປປ ລາວ ແລະ ເສັ້ນທາງຄໍາແຫ່ງແຫລມອິນດູຈີນ “.
ການເປີດທາງລົດໄຟ ລາວ-ຈີນ
ເປັນສັນຍາລັກແຫ່ງການຮ່ວມມື ດ້ານການຄົມມະນາຄົມ ລະຫວ່າງສອງຊາດລາວ-ຈີນ ໃຫ້ກ້າວເຂົ້າສູ່ໄລຍະໃໝ່, ການສໍາເລັດການກໍ່ສ້າງທາງລົດໄຟລາວ-ຈີນ ນັ້ນ ມັນບໍ່ພຽງແຕ່ເປັນເງື່ອນໄຂ ເອື້ອອໍານວຍຄວາມສະດວກສະບາຍ ຍິ່ງໆຂຶ້ນໃຫ້ແກ່ການໄປມາຫາສູ່ກັນ ຂອງປະຊາຊົນສອງຊາດເທົ່ານັ້ນ, ຫາກຍັງໄດ້ຊຸກຍູ້ການແລກປ່ຽນ ດ້ານເສດຖະກິດ ແລະ ການພັດທະນາ ລະຫວ່າງສອງປະເທດຢ່າງໜັກແໜ້ນອີກດ້ວຍ.
ການເປີດເສັ້ນທາງລົດໄຟ ລາວ-ຈີນ ໄດ້ສົ່ງມີຜົນດີທີ່ສຸດຕໍ່ຈີນ, ລາວ ແລະ ບັນດາ ປະເທດແຫລມອິນດູຈີນ ໃນການຈັດຕັ້ງປະຕິບັດ ແລະ ການດໍາເນີນການເຊື່ອມໂຍງເຊື່ອມຈອດ ເຂົ້າສູ່ລວງເລິກ, ປະກອບສ່ວນຊຸກຍູ້ຢ່າງແຂງແຮງເຂົ້າ ໃນການພັດທະນາເສດ ຖະກິດ-ສັງຄົມ, ການຄ້າ, ການລົງທຶນ, ການຄົມມະນາຄົມ, ການບໍລິການ, ການໄປມາຫາສູ່ກັນ ແລະ ອື່ນໆໃນຂົງພາກພື້ນ ແລະ ສາກົນ.
ໃນປີນີ້, ອີງຕາມການປັບປຸງມາດຕະການການປ້ອງກັນ ແລະ ຄວບຄຸມສະພາບການແພ່ລະບາດຂອງພະຍາດໂຄວິດ-19 ໂດຍໄດ້ຮັບການຜ່ອນຜັນ ແລະ. ເປີດປະເທດນັ້ນເຫັນວ່າ ການບໍລິການຜູ້ໂດຍສານ ແລະ ຂົນສົ່ງສິນຄ້າທາງລົດໄຟ ລາວ-ຈີນ ໄດ້ສະແດງ ໃຫ້ເຫັນທ່າອ່ຽງການເຕີບໂຕຢ່າງວ່ອງໄວ.
ຕົວຢ່າງການຂົນສົ່ງດ້ານການທ່ອງທ່ຽວ, ການໄປມາຫາສູ່ກັນລະຫວ່າງປະຊາຊົນ, ຍາດພີ່ນ້ອງ, ການໄຫລວຽນຂອງແຮງງານ ໄດ້ມີທ່າອ່ຽງເພີ່ມຂຶ້ນຄຶກຄື້ນຢ່າງໜ້າສົນໃຈ ໃນນັ້ນ ໃນໄລຍະບຸນກຸດຈີນ, ຈຳນວນຂົນສົ່ງຜູ້ໂດຍສານ ໄດ້ ເພີ່ມຂຶ້ນສູງເປັນເວລາຫລາຍມື້ຕິດຕໍ່ກັນ, ເປັນຜົນງານທີ່ດີທີ່ສຸດນັບແຕ່ເປີດບໍລິການ.
ນັບແຕ່ເດືອນມັງກອນຫາເດືອນມີນາປີນີ້, ເສັ້ນທາງລົດໄຟ ລາວ-ຈີນ ໄລຍະທາງຢູ່ລາວໄດ້ຂົນສົ່ງຜູ້ໂດຍສານ 670.000 ຄົນ, ທຽບໃສ່ໄລຍະດຽວກັນໃນຜ່ານມາ ແມ່ນເພີ່ມຂຶ້ນ 480.000 ຄົນ, ເພີ່ມຂຶ້ນ 260%. ຄຽງຄູ່ກັນນັ້ນ, ທາງລົດໄຟລາວຈີນ ຂະບວນລົດໄຟຂົນສົ່ງສິນຄ້າສາກົນ “ແມ່ນ້ຳຂອງ-ແມ່ນໍ້າລ້ານຊ້າງ, ເສັ້ນທາງ ລົດໄຟລາວ-ຈີນ + ທາງລົດໄຟຈີນ-ເອີຣົບ, ທາງລົດໄຟລາວ-ຈີນ + ເສັ້ນທາງລົດໄຟທາງບົກທາງທະເລອັນ ໃໝ່ສູ່ຕາເວັນ ຕົກ” ເຊິ່ງທາງສາມຮູບແບບການຂົນສົ່ງສາກົນ ສືບຕໍ່ຂະຫຍາຍຕົວຢ່າງໜັກແໜ້ນ, ຕະຫລາດຂົນສົ່ງສິນຄ້າຂ້າມແດນ ມີສະຖານນະພາບທີ່ດີຫລາຍ, ຊຸກຍູ້ການແລກປ່ຽນດ້ານເສດ ຖະກິດລະຫວ່າງລາວ-ຈີນຢ່າງຫລວງຫລາຍ.
ສິນຄ້າຄຸນນະພາບສູງໃນທ້ອງຖິ່ນຈາກຈີນ ແລະ ລາວນັບມື້ນັບຫລາຍຂຶ້ນ ໄດ້ເຂົ້າສູ່ກໍາມື, ບ້ານເຮືອນຂອງປະຊາຊົນທົ່ວໄປ ຂອງສອງປະເທດສາມາດຊົມໃຊ້ ຢ່າງມີປະສິດທິຜົນປະກອບສ່ວນ ປັບປຸງສ້າງອໍານວຍຄວາມສະດວກ, ຍົກລະດັບຊີວິດການເປັນຢູ່ໃຫ້ ປະຊາຊົນ ຄ່ອຍໆຫລຸດພົ້ນ ອອກຈາກຄວາມທຸກຍາກຢ່າງຕັ້ງໜ້າ ໂດຍຜ່ານການຂົນສົ່ງສິນຄ້າສາກົນທາງລົດໄຟ, ເຮັດໃຫ້ຊີວິດການເປັນຢູ່ ຂອງປະຊາຊົນສອງປະເທດ ນັບມື້ນັບອຸດົມສົມບູນຂຶ້ນ ແລະ ການພັດທະນາທີ່ເຂັ້ມແຂງ ຢ່າງຕໍ່ເນື່ອງຈະຍົກລະດັບ ໃຫ້ມີອະນາຄົດ ທີ່ດີ.
ແຕ່ເຖິງແນວໃດກໍດີ ນັບຕັ້ງແຕ່ເປີດເສັ້ນທາງລົດໄຟລາວ-ຈີນ ເປັນຕົ້ນມາ, ສື່ຕາເວັນຕົກບາງພາກສ່ວນ ທີ່ຕິດຕາມປະເທດລາວ ໃນແຕ່ລະວັນໄດ້ເລີ່ມສ້າງຂ່າວ ໃນລັກສະນະບິດເບືອນຄວາມຈິງ ແລະ ປັ້ນນໍ້າໃຫ້ເປັນຕ່ອນຊ້ຳໆວ່າ “ລາວຕົກຢູ່ໃນກັບດັກໜີ້ສິນ” ໂດຍອ້າງວ່າລາວກາຍເປັນ “ປະເທດລູກໜີ້ທີ່ມີຄວາມສ່ຽງສູງ”, ແລະ ຜະເຊີນໜ້າກັບຄວາມສ່ຽງດ້ານ “ງົບປະມານບໍ່ພຽງພໍທີ່ຈະຊໍາລະໜີ້ສິນ” ເນື່ອງຈາກວ່າທາງລົດໄຟລາວ-ຈີນ ເປັນໂຄງການທີ່ເປັນສັນຍະລັກ ໃນຂໍ້ລິເລີ່ມ”ໜຶ່ງແລວທາງໜຶ່ງເສັ້ນທາງ”, ຈຶ່ງເຮັດໃຫ້ກຸ່ມຄົນ ບໍ່ຫວັງດີເສກສັນ ປັ້ນແຕ່ງສ້າງກະແສຂ່າວບໍ່ດີທັບຖົມ ແລະ ສ້າງຄວາມເສຍຫາຍຢ່າງຫລວງຫລາຍ. ສະນັ້ນ ການພັດທະນາທີ່ເຂັ້ມແຂງ ຢ່າງຕໍ່ເນື່ອງຂອງທາງລົດໄຟລາວ-ຈີນ ໄດ້ລົບລ້າງຂ່າວລືທີ່ບໍ່ດີດັ່ງກ່າວ ແລະ ໄດ້ສະທ້ອນໃຫ້ເຫັນໝາກຜົນ ຄວາມສໍາເລັດຕົວຈິງເປັນ ຮູບປະທໍາ.
ຍິ່ງໄປກວ່ານັ້ນ ສື່ມວນຊົນຕ່າງປະເທດບາງພາກສ່ວນຍັງປະກາດວ່າ “ທາງລົດໄຟລາວ-ຈີນເຊື່ອງຊ້ອນຄວາມສ່ຽງຫລາຍກວ່າຜົນຕອບແທນທີ່ຈະໄດ້ຮັບ” ເຊິ່ງທັງໝົດນັ້ນເປັນເລື່ອງຂີ້ຕົວະ ເພື່ອໃສ່ຮ້າຍປ້າຍສີ ແລະ ສ້າງຄວາມແຕກແຍກໃຫ້ສອງປະເທດລວມ ທັງຄູ່ຮ່ວມມື ທີ່ຮັກຫອມການພັດທະນາ, ຮັກຄວາມກ້າວໜ້າພາຍໃນ, ພາກພື້ນ ແລະ ສາກົນ, ຄໍາເວົ້າທີ່ອ້າງເລື້ອຍໆ ຂອງກຸ່ມຄົນບໍ່ດີນັ້ນຜ່ານສື່ຕ່າງໆຍິ່ງສະແດງ ໃຫ້ເຫັນວ່າເປັນຄໍາເວົ້າທີ່ເຊື່ອຖືບໍ່ໄດ້.
ສປ ຈີນ ແລະ ສປປ ລາວລ້ວນແຕ່ ເປັນປະເທດສັງຄົມນິຍົມ, ມີຄວາມເຂົ້າໃຈຮ່ວມກັນທີ່ສຸດ ຕໍ່ການສຸມກຳລັງດ້ານເຫື່ອແຮງ, ສະຕິປັນຍາ, ປຶກສາຫາລືຮ່ວມກັນ, ມີຄວາມສາມັກຄີ ເປັນເອກະພາບປະກອບສ່ວນ ເຂົ້າໃນວຽກງານຕ່າງໆທັງນ້ອຍ ແລະ ໃຫຍ່ ຢ່າງໄກ້ຊິດ.
ຜົນຮັບຂອງທາງ ລົດໄຟລາວ-ຈີນ ໄປໃນທາງທີ່ດີ
ຫວ່າງບໍ່ດົນມານີ້, ທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ ໄດ້ໃຫ້ຄໍາເຫັນແລກປ່ຽນບາງວັກບາງຕອນວ່າ ນັ້ນມັນບໍ່ແມ່ນຄວາມຈິງທີ່ວ່າ“ ກັບດັກໜີ້ສິນ ” ແຕ່ທາງລົດໄຟລາວ-ຈີນ ແມ່ນສອດຄ່ອງກັບ ຄວາມຕ້ອງການດ້ານການພັດທະນາຂອງ ປະຊາຊົນລາວ, ຊ່ວຍສົ່ງເສີມການໄປມາຫາສູ່ ຂອງບຸກຄະລາກອນ ແລະ ການແລກປ່ຽນດ້ານການຄ້າ ໄດ້ຢ່າງຫລວງຫລາຍ,ຈະນໍາເອົາຄວາມຜາສຸກມາ ໃຫ້ແກ່ປະຊາຊົນຫລາຍຂຶ້ນໃນອະນາຄົດ
ເນື່ອງຈາກທາງລົດໄຟຈະສືບຕໍ່ ຂະຫຍາຍໄປທາງທິດໃຕ້, ເຊື່ອມຕໍ່ໄທ, ມາເລ ເຊຍ ແລະ ສິງກະໂປ, ບໍ່ພຽງແຕ່ປະເທດລາວ ຈະໄດ້ຮັບຜົນປະໂຫຍດທີ່ໃຫຍ່ຫລວງເທົ່ານັ້ນ, ແຕ່ທຸກໆປະເທດ ໃນພາກພື້ນອາຊີຕາເວັນອອກສ່ຽງໃຕ້ ແລະ ສາກົນກໍຈະພົບກັບໂອກາດໃນການພັດທະນາເຊັ່ນກັນ.
ທາງລົດໄຟ ລາວ-ຈີນ ທີ່ພັດທະນາຢ່າງຕໍ່ ເນື່ອງ ແລະ ເຂັ້ມແຂງຈະຂັບເຄື່ອນການພັດທະນາ ແລະ ຄວາມຈະເລີນຮຸ່ງເຮືອງອັນຍິ່ງ ໃຫຍ່ຂອງພາກພື້ນອາຊີຕາເວັນອອກສ່ຽງໃຕ້, ຈະກ້າວເຂົ້າສູ່ລວງເລິກຂອງການຮ່ວມມື ຈີນ-ອາຊຽນ ແລະ ບັນລຸເປົ້າໝາຍອະນາ ຄົດທີ່ສວຍງາມ ຂອງປະຊາຄົມຮ່ວມຊາຕາກໍາດຽວກັນ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ Lao insight
ຂອບໃຈແຫຼ່ງຂໍ້ມູນຈາກ: ຂປລ.