ມາຮູ້ຈັກ ຄໍາວ່າ “ເກາະ” ຄວາມໝາຍໃນພາສາລາວແມ່ນຫຍັງ?
DooDiDo
ອະທິບາຍຄໍາວ່າ “ເກາະ” ມີຄວາມໝາຍແນວໃດ?
ຄໍາວ່າ “ເກາະ” ໝາຍເຖິງເນື້ອທີ່ດິນທີ່ມີນໍ້າອ້ອມ ເອີ້ນເກາະ ຫຼື ດອນ ໃນໂລກນີ້ປະກອບມີເກາະດອນນ້ອຍໃຫຍ່ ແຕກຕ່າງກັນໄປ ເຊັ່ນ: ເກາະໄຕ້ຫວັນ, ໝູ່ເກາະພາຣາເຊລ໌ ແລະ ໝູ່ເກາະສະແປດລີ ຢູ່ທະເລຈີນໃຕ້, ເກາະບາຫຼີ, ເກາະກຼີນແລນ, ໝູ່ເກາະເມົາດີບ ເປັນຕົ້ນ. “ເກາະ” ຍັງໝາຍເຖິງສີ່ງທີ່ປ້ອງກັນການທໍາຮ້າຍຈາກສິ່ງອື່ນ ເປັນຕົ້ນອາວຸດ ບໍ່ວ່າຊິເປັນລູກທະນູ, ລູກປືນ, ລະເບີດ ແລະ ອາວຸດອື່ນໆ, ເຊັ່ນ: ລົດຫຸ້ມເກາະ ລົດຕັງ ລົດຊາ, ເກາະປ້ອງກັນໂລກ ແມ່ນຊັ້ນໂອໂຊນ.
ພ້ອມນັ້ນ “ເກາະ” ຍັງໝາຍເຖິງຍັງໝາຍເຖິງກ່ຽວຂ້ອງ ຫຼື ຄາຢູ່ ເປັນຕົ້ນ ເກາະຜິດຊຶ່ງກັນ ແລະ ກັນ, ເກາະຕິດເຫດການ, ເກາະຕິດສະຖານະການ. ນອກຈາກນັ້ນ, ຍັງໝາຍເຖິງການຫ້ອຍ ຫຼື ແຂວນ ເຊັ່ນ: ເກາະຫ້ອຍໄວ້ຝາ, ເກາະແຂວນຢູ່ຫ້ອງ, ແມງມູມເກາະຝາ ແລະ ຍັງມີຄໍາອື່ນໆອີກເຊັ່ນ: ເກາະໄກປືນ ໝາຍເຖິງການຍິງປືນ, ເກາະກິນ ໝາຍເຖິງບໍ່ເຮັດຫຍັງຖ້າກິນແຕ່ນໍາຜູ້ອື່ນ. ອີກຄວາມໝາຍນຶ່ງໝາຍເຖິງໝາຍເກາະຂອງສານ.
ສະນັ້ນ ເພື່ອໃຫ້ເຂົ້າໃຈ ການນໍາໃຊ້ຄໍາດັ່ງກ່າວໃຫ້ຫຼາຍຂຶ້ນ ເຮົາມາເບິ່ງລາຍລະອຽດດັ່ງລຸ່ມນີ້:
ຄຳວ່າ “ເກາະ”.
“ເກາະ” (1. ຄໍານາມ) ດອນຢູ່ກາງນໍ້າ, ທະວີບ, ແຜ່ນດິນ. ເຄື່ອງປ້ອງກັນອາວຸດທໍາດ້ວຍເຫຼັກ ຫຼື ໜັງ ສຸບໃສ່ຕົວ, ເຫຼັກຫຸ້ມລົດສໍາລັບປ້ອງກັນລູກປືນ. (2. ຄໍາກິລິຍາ) ກ່ຽວຂ້ອງ, ຄາຢູ່, ເອີ້ນມາດ້ວຍຈົດໝາຍ ຫຼື ອໍານາດຂອງສານ. ຫ້ອຍ, ແຂວນ.
ຕົວຢ່າງ:
- ເກາະກຼີນແລນ ເປັນເກາະທີ່ໃຫຍ່ທີ່ສຸດໃນໂລກ ເປັນເກາະທີ່ໜາວຫຼາຍ ແຕ່ມີຊັບພະຍາກອນນັບບໍ່ຖ້ວນເຊັ່ນກັນ.
- ໝູ່ເກາະເມົາດີບ ເປັນໝູ່ເກາະທີ່ສວຍງາມອັນດັບຕົ້ນໆຂອງໂລກ ທີ່ຫຼາຍຄົນໄຝ່ຝັນຢາກໄປທ່ຽວຈັກຄັ້ງໃນຊີວິດຂອງຕົນ.
- ລົດຫຸ້ມເກາະລັດເຊຍຖືໄດ້ວ່າເປັນລົດຫຸ້ມເກາະທີ່ທັນສະໄໝອັນດັບນຶ່ງຂອງໂລກ ເພາະມີການພັດ ທະ ນາໃຫ້ທັນສະໄໝ ແລະ ສາມາດປ້ອງກັນລູກປືນໄດ້.
- ທຸກມື້ນີ້ສະຫະລັດອາເມລິກາ ແລະ ລັດເຊຍ ມັກເກາະຜິດກັນ ໂດຍມີປະເທດສົງຄາມຕົວແທນ ຊຶ່ງເຮົາເຫັນໄດ້ໃນປະຈຸບັນ ໃນຫຼາຍປະເທດ.
- ຄູ່ຮັກຂອງຄົນຕາເວັນຕົກສ່ວນໃຫຍ່ມັກເກາະແຂນ, ຈູບກັນ ຢູ່ສະຖານທີ່ສາທາລະນະ ແຕ່ຢູ່ໃນລາວຖື ວ່າເປັນສິ່ງບໍ່ຄ່ອຍງາມຕາ ເພາະມັນບໍ່ສອດຄ່ອງກັບຮິດຄອງ.
- ໝາຍເກາະຂອງສານ ແມ່ນໜັງສືທາງລັດສະການ ໃຫ້ສໍາເນົາໄວ້ ແລະ ຈົ່ງສົ່ງໃຫ້ມັນຖືກຕ້ອງຫ້າມເຮັດຕົກເຮ່ຍ.
- ຮູບຖ່າຍຄອບຄົວໃບໃຫຍ່ ໃຫ້ແຂວນ ຫຼື ເກາະໂຊໄວ້ຫ້ອງຮັບແຂກ ເພື່ອເວລາເຂົາເຈົ້າມາຢາມໃຫ້ຄອບຄົວເຮົາມີໃຜແດ່.
- ໂຕປິງເກາະຢູ່ທ້ອງໂຕຄວາຍ ດູດເລືອດຈົນອີ່ມ ເບີ່ງໂຕບັກໃຫຍ່ ເລືອດຄືຊິເຕັມທ້ອງມັນແລ້ວ.
ສະຫຼຸບ.
ຄໍາວ່າ “ເກາະ” ໝາຍເຖິງດອນ ຫຼື ທະວີບ, ໝາຍເຖິງເຄື່ອງປ້ອງກັນຈາກອາວຸດ, ໝາຍເຖິງການກ່ຽວ ຂ້ອງກັນ, ໝາຍເຖິງຈົດໝາຍຂອງສານ. ນອກຈາກນັ້ນ, ຍັງໝາຍເຖິງການເກາະຫ້ອຍ ຫຼື ການແຂວນ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
