ຄຳວ່າ “ຫວ່າງ” ແລະ “ຫວ້າງ” ມີຄວາມໝາຍອັນດຽວກັນບໍ່?
ອະທິບາຍຄວາມໝາຍຂອງຄຳວ່າ “ຫວ່າງ” ແລະ “ຫວ້າງ”.
ຄໍາວ່າ “ຫວ່າງ” ແລະ “ຫວ້າງ” ສອງຄໍານີ້ການອອກສຽງໃກ້ຄຽງກັນຕ່າງແຕ່ສຽງສູງຕໍ່າ. ສໍາລັບຄວາມໝາຍຄໍາວ່າ “ຫວ່າງ” ແມ່ນມີຄວາມໝາຍຫຼາຍຢ່າງ ແລະ ນຶ່ງໃນນັ້ນແມ່ນມີຄວາມໝາຍຄືກັບຄໍາວ່າ “ຫວ້າງ” ທີ່ໝາຍເຖິງ ບ່ອນເປົ່າ ນັ້ນເອງ.
ຄໍາວ່າ “ຫວ່າງ” ໝາຍເຖິງ ຍາມ ຫຼື ເວລາ ເປັນຕົ້ນ: ຫວ່າງຢ່າ, ຫວ່າງກີ້, ຫວ່າງມໍ່ໆນີ້, ຫວ່າງນຶ່ງ, ຫວ່າງປີກາຍປີກ່ອນ, ຫວ່າງແລ້ວ ເປັນຕົ້ນ. ພ້ອມນັ້ນ, ຍັງໝາຍເຖິງ ຍ່ານ, ຈາກບ່ອນນຶ່ງໄປອີກບ່ອນນຶ່ງ ຫຼື ບ່ອນກາງ ເປັນຕົ້ນ ຫວ່າງກາງ, ຫວ່າງຂາ, ຫວ່າງຄິ້ວຕາ, ຫວ່າງພູ, ແມ່ນໍ້າໄຫຼຫວ່າງກາງສອງບ້ານ, ບ້ານຢູ່ຫວ່າງກາງສອງທົ່ງນາ. ນອກຈາກນີ້, ຍັງໝາຍເຖິງບ່ອນເປົ່າຄືກັນກັບ “ຫວ້າງ” ເຊັ່ນ: ຫົວໃຈຍັງຫວ່າງ, ຫວ່າງເວ (ໝາຍເຖິງບໍ່ມີຫຍັງ), ດິນເປົ່າຫວ່າງ, ທ້ອງຟ້າປອດປົ່ງ ແລະ ຫວ່າງເປົ່າ ບໍ່ມີເມກ.
ຄໍາວ່າ “ຫວ້າງ” ໝາຍເຖິງບໍ່ມີຫຍັງ, ເປົ່າ ຫຼື ບ່ອນເປົ່າ ແລະ ນອນໃນນຶ່ງຄວາມໝາຍຂອງ “ຫວ່າງ” ດັ່ງໄດ້ອະທິບາຍຂ້າງເທິງ.
ເພື່ອໃຫ້ເຂົ້າໃຈຄວາມໝາຍຂອງການນນຳໃຊ້ໃຫ້ດີຂຶ້ນກວ່າເກົ່າ ເຮົາເບີ່ງຄວາມໝາຍ ແລະ ຕົວຢ່າງດັ່ງລຸ່ມນີ້:
ຄວາມໝາຍຄຳວ່າ “ຫວ່າງ”.
“ຫວ່າງ” (1. ຄໍານາມ) ຍາມ, ເວລາ, ເທື່ອ, ຍ່ານ, ບ່ອນກາງ, ບ່ອນເປົ່າ, ລະຍະແຕ່ບ່ອນນຶ່ງໄປເຖິງບ່ອນນຶ່ງ.
ຕົວຢ່າງ:
- ເຈົ້າຊອກຫາລາວບໍ່! ຫວ່າງກີ້ລາວບອກວ່າລາວຊິໄປຊື້ປີ້ຍົນ ເພື່ອເດີນທາງໄປເຮັດວຽກຢູ່ຕ່າງແຂວງ ຄິດວ່າອີກບໍ່ດົນລາວກໍຊິກັບມາແລ້ວ ໃຫ້ເຈົ້າໂທຫາລາວເດີ.
- ປະເທດມາເລເຊຍ ແມ່ນຢູ່ລະຫວ່າງກາງປະເທດໄປ ແລະ ປະເທດສິງກາໂປ.
- ແມ່ ແລະ ເມຍ ຄຽດກັນ ອ້າຍຢູ່ຫວ່າງກາງປະພຶດຕົວຍາກ ເຮັດແນວໃດຈິ່ງຈະສາມາດໃຫ້ສອງ ຄົນນີ້ເຂົ້າໃຈກັນໄດ້.
- ມື້ນີ້ທ້ອງຟ້າຫວ່າງເປົ່າ ເປັນສີຟ້າງາມຕາດີ ບໍ່ເຫັນມີເມກຈັກນ້ອຍເລີຍ.
ຄວາມໝາຍຄຳວ່າ “ຫວ້າງ”.
“ຫວ້າງ” (1. ຄໍານາມ) ບ່ອນເປົ່າ.
ຕົວຢ່າງ:
- ດິນຕອນນີ້ຫວ້າງ ແລະ ຕິດປະກາດໃຫ້ເຊົ່າ ເບີ່ງແລ້ວເປັນທໍາເລດີ ເຊົ່າເພື່ອເຮັດກິດຈະການຄືຊິຄັກ.
- ນ້ອງສາວຫົວໃຈຍັງຫວ້າງບໍ່ ຖ້າຫວ້າງຂໍລົມເປັນຄົນຮັກ ຊິລັງກຽດກັນບໍ່ນໍ.
ສະຫຼຸບ.
ຄຳວ່າ “ຫວ່າງ” ໝາຍເຖິງຍາມ, ເວລາ, ເທື່ອ, ຍ່ານ, ບ່ອນກາງ, ບ່ອນເປົ່າ, ລະຍະແຕ່ບ່ອນນຶ່ງໄປເຖິງບ່ອນນຶ່ງ. ສ່ວນຄຳວ່າ “ຫວ້າງ” ໝາຍເຖິງບ່ອນເປົ່າ ຊຶ່ງເປັນນຶ່ງໃນຄວາມໝາຍຂອງ “ຫວ່າງ” ເທົ່ານັ້ນ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo