ມາຮູ້ຈັກກັບຄໍາວ່າ “ຫຼີກ” ການນໍາໃຊ້ ແລະ ຄວາມໝາຍໃນພາສາລາວ
ອະທິບາຍເນື້ອໃນຂອງຄໍາວ່າ “ຫຼີກ” ມີຄວາມໝາຍແນວໃດ?
ໃນສະຖານທີ່ຕ່າງໆບໍ່ວ່າຈະເປັນເສັ້ນທາງການສັນຈອນໄປມາ, ຕາມສະຖານທີ່ແອອັດ, ຕະຫລາດ ຫລື ໃນຮ້າງຮ້ານ ແລະ ສະຖານທີ່ອື່ນໆ, ການທີ່ມີສິ່ງກີດກັນຕ່າງໆນັ້ນ ແນນອນເຮົາຕ້ອງໄດ້ມີການຍ້າຍ, ການເວັ້ນ, ການອອກຫ່າງອອກມາ ຫລື ລົບຫລີກອອກມາ ເພື່ອໃຫ້ສະດວກໃນການສັນຈອນ ຫລື ການກະທຳໃດໆໃຫ້ສະດວກສະບາຍ ແລະ ບໍ່ມີອຸປະສັກຂວາງກັ້ນໄວ້.
ສະນັ້ນ, ໃນບົດນີ້ຈະຍົກເອົາຄຳວ່າ: ຫຼີກ ມາອະທິບາຍໃຫ້ເຂົ້າໃຈໃນການທີ່ຈະນຳໃຊ້ກັບສະຖານະການ ຫລື ເຫດການທີ່ໄດ້ເອີຍມາຂ້າງເທິງນັ້ນ, ແລະ ຈະເວົ້າໃຫ້ເຂົ້າໃຈໃນຄວາມໝາຍຂອງ ຄໍາວ່າ ຫຼີກ ນີ້, ໂດຍອີງຈາກຂໍ້ມູນບາງສ່ວນໃນວັດຈະນານຸກົມພາສາລາວ ສະບັບຄົ້ນຄວ້າ ແລະ ຮຽບຮຽງ ໂດຍ ທອງຄຳ ອ່ອນມະນີສອນ, ເພື່ອມາອະທິບາຍຄວາມໝາຍຄໍາສັບດັ່ງກ່າວ ດັ່ງນີ້:
ຄຳວ່າ ຫຼີກ.
ຫຼີກ ເປັນຄໍາກໍາມະ ໝາຍເຖິງ ເວັ້ນ, ຜິກ, ຫຍັບອອກຈາກທາງ (ກໍລະນີວັດຖຸນັ້ນຢູ່ກັບທີ່ແລ້ວເຮົາບໍ່ຢາກກະທົບໃສ່ມັນ ເຮົາເອົາຕົວຫຍັບອອກ ເອີ້ນວ່າ ຫຼີກ) ຫຼື ຫຼີກລ່ຽງ ກໍວ່າໄດ້.
ຕົວຢ່າງ:
ປະເທດລາວໄດ້ຮັບການເປັນເຈົ້າພາບຂອງກອງປະຊຸມສາກົນ, ລົດຜູ້ນຳຂອງປະເທດຕ່າງໆໄດ້ເຂົ້າມາ ແລະ ມີລົດນຳຂະບວນເພື່ອສະດວກໃນການເດີນທາງໄປປະຊຸມ ແລະ ປະຊາຊົນຜູ້ທີ່ສັນຈອນຕາມເສັ້ນທາງຕ້ອງໄດ້ ຫຼີກ ທາງໃຫ້.
ຂ້ອຍຂັບລົດລັອກແລັກໄປມາກໍຍ້ອນຫຼີກຂຸມ, ເພາະວ່າຫົນທາງບ້ານຂ້ອຍມີຂຸມຫຼາຍ.
ຂ້ອຍຫຼີກລ້ຽງການໃຊ້ຖະໜົນສາຍຫຼັກໃນຍາມໂມງການ ເພາະມັນລົດຕິດຫຼາຍ.
ສະຫຼຸບ.
ຄໍາວ່າ ຫຼີກ ແມ່ນມີຄວາມໝາຍວ່າ ເວັ້ນ ຫຼື ຫຍັບອອກຈາກທາງ, ຫຼີກລ່ຽງ ບໍ່ໃຫ້ຕົວໄປຖືກກັບວັດຖຸນັ້ນ..
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo