ມາຮູ້ຈັກກັບຄໍາວ່າ “ຫາບ” ການນໍາໃຊ້ ແລະ ຄວາມໝາຍໃນພາສາລາວ
ອະທິບາຍເນື້ອໃນຂອງຄໍາວ່າ “ຫາບ” ມີຄວາມໝາຍແນວໃດ?
ປະຈຸບັນນີ້, ການຂົນເຄື່ອງຂອງຕ່າງໆເພື່ອຍົກຍ້າຍຈາກອີກບ່ອນໜຶ່ງໄປຫາອີກບ່ອນໜຶ່ງ ສ່ວນຫລາຍແມ່ນມີອຸປະກອນທີ່ທັນສະໄໝແລ້ວໃນການຍົກຍໍຂົນເຄື່ອງຕ່າງໆ, ແຕ່ຫາກໄປເບິ່ງຢູ່ທ້ອງຖິ່ນເຂດຫ່າງໄກແລ້ວຍັງຄົງໃຊ້ເຄື່ອງມືແບບປະຖົມປະຖານ ຫລື ປະດິດຂື້ນມານຳໃຊ້ເອງ, ໂດຍຈະມີໄມ້ຄານທີ່ຈະໃຊ້ຂົນເຄື່ອງສິ່ງຂອງຕ່າງໆນັ້ນ ເຊິ່ງຈະເອີ້ນວ່າການຫາບ ນັ້ນເອງ.
ໃນບົດນີ້ເຮົາຂໍຍົກເອົາບາງຄໍາສັບຂຶ້ນມາ ເພື່ອອະທິບາຍວິທີການນໍາໃຊ້ ແລະ ແປຄວາມໝາຍຂອງມັນ, ເຊິ່ງເຮົາຈະເວົ້າກ່ຽວກັບຄໍາວ່າ ຫາບ ຄໍາສັບນີ້ອາດມີການນຳໃຊ້ ໃນທົ່ວໄປແຕ່ສ່ວນຫຼາຍແລ້ວຈະເຫັນ ແລະ ໄດ້ຍິນຢູ່ໃນບາງທ້ອງຖິ່ນ ແລະ ບາງຄົນອາດຈະບໍ່ຮູ້ຈັກຄວາມໝາຍຂອງມັນຢ່າງຖອງແທ້ຫາກວ່າເປັນຊາວຕ່າງຊາດທີ່ຮ່ຳຮຽນພາສາລາວ.
ສະນັ້ນ ເພື່ອໃຫ້ເຂົ້າໃຈ ການນໍາໃຊ້ຄໍາດັ່ງກ່າວໃຫ້ຫຼາຍຂຶ້ນ ເຮົາມາເບິ່ງລາຍລະອຽດ, ໂດຍອີງຕາມຂໍ້ມູນຂອງວັດຈະນະນຸກົມພາສາລາວ ສະບັບຄົ້ນຄວ້າ ແລະ ຮຽບຮຽງ ໂດຍ ດຣ. ທອງຄໍາ ອ່ອນມະນີ ເຮົາສາມາດອະທິບາຍຄວາມໝາຍ ແລະ ວິທີການນໍາໃຊ້ສອງຄໍາສັບດັ່ງກ່າວ ໄດ້ດັ່ງນີ້:
ຄຳວ່າ ຫາບ.
ຄໍາວ່າ ຫາບ ເປັນຄໍາກໍາມະ ມີຄວາມໝາຍວ່າເປັນການເອົາສິ່ງຂອງສອງສິ່ງຫ້ອຍໃສ່ປາຍໄມ້ຄານສອງສົ້ນ ແລ້ວເອົາເຄິ່ງກາງໄມ້ຄານມາໃສ່ບ່າເພື່ອຂົນສິ່ງຂອງ ຫລື ສິ່ງອື່ນໆຍ້າຍຈາກອີກຈຸດໜຶ່ງໄປຫາອີກຈຸດໜຶ່ງ ເອີ້ນວ່າ ຫາບ.
ຕົວຢ່າງ:
ຂ້ອຍລຸກໄປຫາບນໍ້າຢູ່ແມ່ນໍ້າໃຫຍ່ທາງຫົວໝູ່ບ້ານໃນທຸກໆເຊົ້າ ເພື່ອເອົາມານໍາໃຊ້ໃນຄົວເຮືອນ ເພາະວ່າຢູ່ຊົນນະບົດບໍ່ມີນໍ້າປະປາໃຊ້ແບບສະດວກສະບາຍຄືຢູ່ໃນເມືອງ.
ແມ່ປ້າອ່ອນສີ ລາວມັກຫາບຂອງກິນມາເລາະຂາຍຢູ່ໜ້າບ້ານເຮົາທຸກມື້.
ສະຫຼຸບ.
ຄໍາວ່າ ຫາບ ມີຄວາມໝາຍແມ່ນການເອົາສິ່ງຂອງສອງສິ່ງຫ້ອຍໃສ່ປາຍໄມ້ຄານສອງສົ້ນ ແລ້ວເອົາເຄິ່ງກາງໄມ້ຄານມາໃສ່ບ່າເພື່ອຂົນສິ່ງຂອງ ຫລື ສິ່ງອື່ນໆຍ້າຍຈາກອີກຈຸດໜຶ່ງໄປຫາອີກຈຸດໜຶ່ງ ເອີ້ນວ່າ ຫາບ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo