ພາສາລາວການນຳໃຊ້ຄຳວ່າ ທີ ແລະ ທີ່ ແລະ ຄວາມໝາຍຂອງມັນ.
ພາສາລາວອະທິບາຍການນຳໃຊ້ຄຳວ່າ “ທີ” ແລະ “ທີ່”.
ໃນພາສາລາວການໃຊ້ວັນນະຍຸດກັບຄຳຕ່າງໆສ່ວນຫລາຍຈະເຮັດໃຫ້ຄວາມໝາຍຂອງຄຳດັ່ງກ່າວປ່ຽນໄປ ອາດຈະຫລາຍ ຫລື ນ້ອຍແລ້ວແຕ່ຄຳສັບນັ້ນໆເຊິງໃນນັ້ນອາດຈະຂື້ນກັບຕົວອັກສອນແດ່ເພາະອັກສອນບາງຕົວກໍບໍ່ສາມາດປ່ຽນສຽງໄດ້ຈາກການໃສ່ວັນນະຍຸດໃຫ້ມັນ.
ໃນພາສາລາວບົດນີ້ຈະຍົກເອົາ ການຂຽນ ລວມທັງຄວາມໝາຍຂອງຄຳວ່າ “ທີ” ແລະ “ທີ່” ມີຄວາມໃກ້ຄຽງກັນ, ແລະ ມີຄວາມໝາຍ ແລະວິທີການໃຊ້ແຕກຕ່າງກັນ, ແຕ່ບາງຄົນອາດສັບສົນ ແລະ ຫລາຍຄົນໄດ້ມີການນຳໃຊ້ແບບຜິດໆຖືກໆ, ເພາະບໍ່ແນໃຈໃນການໃຊ້ ລະຫວ່າງສອງຄຳນີ້ ດ້ວຍຄວາມໝາຍຂອງມັນທີ່ໃກ້ຄຽງກັນສະນັ້ນເພື່ອຄວາມເຂົ້າໃຈທີ່ຖືກຕ້ອງ ແລະ ເປັນເອກະພາບກັນເຮົາຈະຂໍອະທິບາຍໃຫ້ເຂົ້າໃຈດີຂື້ນຕື່ມດັ່ງນີ້.
ຄຳວ່າ ທີ.
- ເປັນຄຳນາມ ໝາຍເຖິງ “ເທື່ອ, ຄັ້ງ, ຊັ້ນ, ຕຳແໜ່ງ, ລຳດັບ” ເຊັ່ນ ທີໜຶ່ງ, ທີສອງ ແລະລຳດັບເລກວັນໃນປະຕິທິນ ເຊັ່ນ ວັນທີ 1 2 3 4 5+
- ປຽບ, ກຽດ, ວາດ, ທ່າ ເຊັ່ນ ທ່າທີ, ເສຍທີ, ເຕັມທີ, ລອງທີ…
ຄຳວ່າ ທີ່.
- ເປັນຄຳນາມ ໝາຍເຖິງສະຖານທີ່, ບ່ອນ, ຈຸດໜຶ່ງ ເຊັ່ນ: ຢູ່ທີ່, ທີ່ຢູ່, ທີ່ບ້ານ, ທີ່ນີ້, ທີ່ນັ້ນ.
- ຄໍາຕໍ່ ໃຊ້ບອກຈຸດເນັ້ນ ຫຼື ເນັ້ນຈຸດນັ້ນໆເຊັ່ນ: ຜູ້ທີ່ເຈົ້າເວົ້າຫາ, ທີ່ຮັກ, ອັນທີ່ເຮົາຕ້ອງການ, ງ່າຍທີ່ສຸດ, ຄຳທີ່ໜ້າປະທັບໃຈ, ສິ່ງທີ່ຕ້ອງການ…
ການໃຊ້ໃນປະໂຫຍກດຽວກັນ
- ວັນທີ 2 ທັນວາ ແມ່ນວັນທີ່ສະຖາປະນາ ສປປ.ລາວ
- ເດືອນຕຸລາ ເປັນເດືອນທີ 10 ຂອງປີ ເປັນເດືອນທີ່ມີເຫດການປະຫວັດສາດຫຼາຍວັນເຊັ່ນ ວັນຄູແຫ່ງຊາດ, ວັນຢຶດອຳນາດ..
- ຂ້ອຍເສັງໄດ້ທີ 1 ເຊິ່ງເປັນທີທີ່ໜ້າປະທັບໃຈ.
- ວັນທີ່ເຈົ້າຈາກຂ້ອຍໄປ ແມ່ນວັນທີ 29 ເດືອນ 2 ຂອງປີກ່ອນ.
- ທີ່ນີ້ເປັນບ່ອນທີ່ຂ້ອຍກັບເຈົ້າພົບກັນ.
- ເບິ່ງທ່າທີຂອງເຈົ້າຄືຊິບໍ່ເໝາະກັບການເຮັດວຽກຢູ່ທີ່ນີ້.
- ເຈົ້າຄືທີ່ຮັກຂອງຂ້ອຍ ທີ່ຂ້ອຍຮັກທີ່ສຸດ.
- ວັນທີ 20 ຕຸລາ ເປັນວັນທີ່ຂ້ອຍເສຍທີໃຫ້ກັບຄົນທີ່ຂ້ອຍຮັກ ແລະໄວ້ໃຈທີ່ສຸດ.
ສັງເກດຄຳວ່າ “ວັນທີ” ກັບ “ວັນທີ່”
ວັນທີ ແມ່ນໝາຍເຖິງຕົວເລກຕາມປະຕິທິນພາຍໃນ 1 ເດືອນ. (ຢ່າຫຼົງໃຊ້ຄືໄທເດັດຂາດ ເພາະພາສາໄທໃຊ້ วันที่ ມີວັນນະຍຸດເອກ)
ວັນທີ່ ໝາຍເຖິງ ວັນ ບົ່ງບອກເຖິງການເນັ້ນວັນນັ້ນໆ ເຊັ່ນວັນທີ່ເຈົ້າຈາກໄປ, ວັນທີ່ບໍ່ມີເຈົ້າ, ວັນທີ່ເຮົາພົບກັນ…
ສະຫຼຸບ
ທີ ແລະ ທີ່ ເປັນຄຳນາມ, ທີ: ໄດ້ມີຄວາມໝາຍວ່າໝາຍເຖິງ “ເທື່ອ, ຄັ້ງ, ຊັ້ນ, ຕຳແໜ່ງ, ລຳດັບ” , ທີ່: ເປັນຄຳນາມ ແລະ ທັງເປັນຄໍາຕໍ່ໄດ້, ຄວາມໝາຍໝາຍເຖິງສະຖານທີ່, ບ່ອນ, ຈຸດໜຶ່ງ, ສະນັ້ນຕໍ່ຈາກນີ້ເວລາຈະໃຊ້ຕ້ອງພະຍາຍາມນຳໄປໃຊ້ໃຫ້ຖືກ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo