ຜູ້ຕິດເຊື້ອໂຄວິດ-19 ໃນ ສປປ ລາວ ປະຈຸບັນທະລຸເກືອບ300ກໍລະນີຕໍ່ມື້
ຜູ້ຕິດເຊື້ອພະຍາດໂຄວິດ-19 ເພີ່ມສູງເປັນສະຖິຕິໃຫມ່ໃນ ສປປ ລາວ.
ປະຈຸບັນດັ່ງທີ່ຫລາຍໆທ່ານໄດ້ຮູ້ ແລະ ເຫັນໃນແຕ່ລະມື້, ມີແຮງງານລາວທີ່ຂ້າມໄປເຮັດວຽກຢູ່ປະເທດເພືອນບ້ານຈ່ຳນວນຫລວງຫລາຍທີ່ທະຍອຍກັນກັບຄືນມາປະເທດລາວ ແລະ ໃນບັນດາຜູ້ທີ່ກັບຄືນມານັ້ນຕ້ອງໄດ້ປະຕິບັດຕາມນະໂຍບາຍການກັກຕົວ ແລະ ຍັງພົບຜູ້ທີ່ຕິດພະຍາດລະບາດໂຄວິດ-19 ນີ້ ຢ່າງຕໍ່ເນື່ອງ ແລະ ນັບມື້ນັບຫລາຍຂື້ນ, ລ້າສຸດໃນລະຫວ່າງສອງສາມມື້ທີ່ຜ່ານມາຕົວເລກທະລຸກວ່າ 200 ຄົນຕໍ່ມື້.
ຈາກການຖະແຫຼງຂ່າວຂອງຄະນະສະເພາະກິດເພື່ອປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດ-19 ປະຈຳວັນທີ 24 ກໍລະກົດ 2021 ໂດຍ ທ່ານ ດຣ ນາງ ພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ກ່າວວ່າ: ສະພາບການລະບາດຂອງພະຍາດໂຄວິດ-19 ຢູ່ ສປປ ລາວ ມາຮອດໃນວັນທີ 23 ກໍລະກົດ 2021 ນີ້ ມີລາຍງານຜູ້ຕິດເຊື້ອໃໝ່ ຈານວນ 278 ຄົນ ຈາກການເກັບຕົວຢ່າງກວດຫາເຊື້ອ 2.571 ຕົວຢ່າງ.
ນີ້ເປັນຕົວເລກລາຍງານຜູ້ຕິດເຊື້ອໃໝ່ສູງຂອງປະເທດເຮົາ ແລະ ເປັນ 3 ມື້ ຕໍ່ເນື່ອງ ທີ່ມີຜູ້ຕິດເຊື້ອໃໝ່ກາຍ 200 ຄົນ ເຮັດໃຫ້ຕົວເລກຜູ້ຕິດເຊື້ອສະສົມຮອດປັດຈຸບັນ ແມ່ນ 4.620 ຄົນ, ມີຈໍານວນເສຍຊີວິດ ສະສົມ 5 ຄົນ ແລະ ຍັງສືບຕໍ່ປິ່ນປົວ 1.790 ຄົນ.
ສຳລັບການກວດພົບຜູ້ຕິດເຊື້ອໃໝ່ 278 ຄົນ ຢູ່ນະຄອນຫຼວງວຽງຈັນ 4 ຄົນ, ແຂວງຈຳປາສັກ 53 ຄົນ, ສະຫວັນນະເຂດ 198 ຄົນ, ສາລະວັນ 9 ຄົນ, ບໍລິຄຳໄຊ 9 ຄົນ ແລະ ຄຳມ່ວນ 5 ຄົນ ທັງໝົດແມ່ນແຮງງານລາວ ທີ່ເດີນທາງກັບຄືນມາຈາກປະເທດໃກ້ຄຽງ.
ເຊິ່ງໄດ້ຮັບອະນຸຍາດຈາກຄະນະສະເພາະກິດ ເຂົ້າມາຖືກຕ້ອງຕາມລະບຽບຫຼັກການ, ໄດ້ເກັບຕົວຢ່າງ ແລະ ຈຳກັດບໍລິເວນຢູ່ສູນຈຳກັດບໍລິເວນຂອງແຂວງ, ເມື່ອຜົນກວດເປັນຜົນບວກພວກກ່ຽວໄດ້ ຖືກນຳສົ່ງໄປປິ່ນປົວຢູ່ສະຖານທີ່ປິ່ນປົວ ທີ່ຖືກກຳນົດໄວ້.
ທ່ານ ດຣ ນາງ ພອນປະເສີດ ໄຊຍະມຸງຄຸນ ໃຫ້ຮູ້ຕື່ມອີກວ່າ:
ດ້ານການເດີນທາງເຂົ້າມາ ສປປ ລາວ ຕາມຈຸດຜ່ານແດນ ໃນວັນທີ 23 ກໍລະກົດ ຜ່ານມາ ມີຜູ້ເດີນທາງຜ່ານດ່ານເຂົ້າມາ ສປປ ລາວ ທັງໝົດ 3.151 ຄົນ, ທຸກຄົນ ເດີນທາງເຂົ້າມາທັງໝົດ ແມ່ນໄດ້ຖືກເກັບຕົວຢ່າງກວດຊອກຫາເຊື້ອພະຍາດໂຄວິດ-19 ແລະ ນໍາສົ່ງເຂົ້າໄປຈໍາກັດບໍລິເວນຢູ່ສູນຈາກັດບໍລິເວນ ຫຼື ໂຮງແຮມ ຈຳກັດບໍລິເວນ ທີ່ຄະນະສະເພາະກິດກຳນົດໄວ້ຈົນຄົບ 14 ວັນຈຶ່ງຈະໄປເຄື່ອນໄຫວໄດ້ ແລະ ຮອດປັດຈຸບັນທົ່ວປະເທດມີສູນຈຳກັດບໍລິເວນທີ່ເປີດນຳໃຊ້ຢູ່ທັງໝົດ 49ສູນ, ມີຜູ້ຈຳກັດບໍລິເວນທັງໝົດ 8,264 ຄົນ.
ຂອບໃຈແຫລ່ງທີ່ມາ: laoedaily.com