ປະທານສະພາແຫ່ງຊາດຢ້ຽມຢາມໃຫ້ທິດການນຳຫຼັກແຫຼ່ງໄຊຍະບູລີ
ແຫລ່ງແຂວງໄຊຍະບູລີຕ້ອນຮັບການມາຢ້ຽມຢາມຂອງປະທານສະພາແຫ່ງຊາດ
ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ໄດ້ພົບປະ ແລະ ໂອ້ລົມຕໍ່ການນໍາຫລັກແຫລ່ງຂອງແຂວງໄຊຍະບູລີ ໃນວັນທີ 17 ກຸມພາ 2023 ນີ້, ໃຫ້ການຕ້ອນຮັບໂດຍ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ, ມີປະທານສະພາປະຊາຊົນແຂວງ, ມີຄະນະບໍລິຫານງານພັກແຂວງ, ມີເລຂາພັກເມືອງ, ເຈົ້າເມືອງ 11 ເມືອງທົ່ວແຂວງ ໃຫ້ການຕ້ອນຮັບຢ່າງອົບອຸ່ນ.
ໂອກາດນີ້, ທ່ານ ໄຊສົມພອນ ພົມວິຫານ ໄດ້ເໜນັ້ນໃຫ້ການນໍາທຸກພາກສ່ວນຂອງແຂວງ ຈົ່ງສືບຕໍ່ຈັດຕັ້ງ ຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານໃຫ້ທົ່ວເຖິງ ແລະ ເລິກເຊິ່ງ; ສ້າງ ແລະ ປັບປຸງຕາໜ່າງປ້ອງກັນຊາດ-ປ້ອງກັນຄວາມສະຫງົບ ຢູ່ທ້ອງຖິ່ນຮາກຖານໃຫ້ເຂັ້ມແຂງ, ໜັກແໜ້ນ; ສະກັດກັ້ນອາຊະຍາກໍາຕ່າງໆຢ່າງທັນການ, ເດັດຂາດ ແລະ ເຂັ້ມງວດ
ເພີ່ມທະວີການນໍາພາ-ຊີ້ນໍາຂະແໜງການທີ່ກ່ຽວຂ້ອງຂອງແຂວງ ຄົ້ນຄວ້າວາງແຜນ ແລະ ຈັດແບ່ງເຂດການຜະລິດກະສິກໍາໃຫ້ເໝາະສົມ, ຄົ້ນຄວ້າກໍານົດທ່າແຮງບົ່ມຊ້ອນທາງດ້ານການຜະ ລິດກະສິກໍາ ເພື່ອສຸມທຶນຮອນ, ເຕັກນິກວິຊາການ ເຂົ້າໃສ່ການຜະລິດເປັນສິນຄ້າຂອງປະຊາຊົນ;ເອົາໃຈໃສ່ນໍາພາ-ຊີ້ນໍາໃນ ການປົກປັກຮັກສາແຫລ່ງທ່ອງທ່ຽວໃຫ້ຍືນຍົງ ແລະ ພັດທະນາຄຸນຄ່າຂອງແຫລ່ງທ່ອງທ່ຽວໃຫ້ຄົງຢູ່ຍາວນານຕະຫລອດ ໄປ
ເອົາໃຈໃສ່ ລົງເລິກຕິດຕາມກວດກາເບິ່ງຄຸນນະພາບການສຶກສາຢູ່ໂຮງຮຽນ, ສະຖາບັນການສຶກສາຕ່າງໆ ໃຫ້ຮັບ ປະກັນດ້ານມາດຕະຖານຕາມກົດໝາຍກໍານົດ; ເພີ່ມທະວີການໂຄສະນາເຜີຍແຜ່ຢ່າງກວ້າງຂວາງ ແລະ ຖືເອົາວາລະ ແຫ່ງຊາດ ເປັນພາລະກິດທົ່ວປວງຊົນ ຊຶ່ງສະມາຊິກພັກ, ພະນັກງານ-ລັດຖະກອນ ກໍຄື ພໍ່ແມ່ປະຊາຊົນບັນດາເຜົ່າ ຈະຕ້ອງໄດ້ຮ່ວມແຮງຮ່ວມໃຈກັນຈັດຕັ້ງປະຕິບັດ
ເອົາໃຈໃສ່ຄຸ້ມຄອງການເກັບລາຍຮັບງົບປະມານບໍ່ໃຫ້ຮົ່ວໄຫລ ດ້ວຍການນໍາໃຊ້ເຄື່ອງມືເອເລັກໂຕຣນິກທີ່ທັນສະໄໝ ເຂົ້າໃນການເກັບລາຍຮັບ; ເອົາໃຈໃສ່ປຸກລະດົມຂົນຂວາຍໃຫ້ ພໍ່ ແມ່ປະຊາຊົນບັນດາເຜົ່າ ເຫັນໄດ້ຜົນຮ້າຍຂອງບັນຫາຢາເສບຕິດ ທີ່ມີຕໍ່ປະເທດຊາດ, ສັງຄົມ, ຄອບຄົວ ກໍຄື ສຸຂະພາບ ຂອງລູກຫລານ
ພ້ອມດຽວກັນ ທ່ານ ໄຊສົມພອນ ພົມວິຫານ ຍັງໄດ້ມອບຄອມພິວເຕີຈໍານວນ 5 ຊຸດໃຫ້ສະ ພາປະຊາຊົນແຂວງ, ມອບເຄື່ອງອຸປະກອນການແພດໃຫ້ໂຮງໝໍແຂວງ ແລະ ມອບເງິນສົດຈໍານວນ 100 ລ້ານກີບ ໃຫ້ອົງການປົກຄອງແຂວງ ໄຊຍະບູລີ.
ໂອກາດດຽວກັນນີ້, ທ່ານ ພົງສະຫວັນ ສິດທະວົງ ກໍໄດ້ລາຍງານສະພາບການພັດທະນາເສດຖະກິດ-ສັງ ຄົມຂອງແຂວງໂດຍສັງເຂບ, ເຊິ່ງມາຮອດປັດຈຸບັນ, ເສດຖະກິດຂອງແຂວງ ຂະຫຍາຍຕົວຢູ່ໃນລະດັບ 4,9% ທຽບໃສ່ຄາດໝາຍວາງໄວ້ເພີ່ມຂຶ້ນ 0,1% ລວມຍອດຜະລິດຕະພັນພາຍໃນ 12,339 ຕື້ກີບ, ສະເລ່ຍໃສ່ຫົວຄົນໜື່ງ 29,47 ລ້ານກີບ ຫລື ເທົ່າກັບ 1.734 ໂດລາສະຫະລັດ, ດ້ານລາຍຮັບປະຕິບັດໄດ້ທັງໝົດ 1.197,84 ຕື້ກີບ
ໃນນີ້ ລາຍຮັບພູດສູນກາງ ປະຕິບັດໄດ້ 920,34 ຕື້ກີບ, ລາຍຮັບພູດທ້ອງຖິ່ນ: ປະຕິບັດໄດ້ 277,5 ຕື້ກີບ ແລະ ຄຸ້ມ ຄອງລາຍຈ່າຍທັງໜົດ 536,49 ຕື້ກີບ, ການຜະລິດພວກເຮົາໄດ້ສຸມໃສ່ຜະລິດເຂົ້າເພື່ອຄໍ້າປະກັນສະບຽງອາຫານ ແລະ ພືດເປັນສິນຄ້າ, ທົ່ວແຂວງໄດ້ຊົມໃຊ້ໄຟຟ້າຖາວອນໃນລະບົບກວມ 98,60%; ອັດຕາການຊົມໃຊ້ນໍ້າສະອາດ 97,61% ຂອງຄອບຄົວທັງໝົດ, ຄອບຄົວທຸກຍາກຍັງເຫລືອ 26.648 ຄອບຄົວ ກວມ 33,15%.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫຼ່ງຂໍ້ມູນຈາກ: ຂປລ.