ຍຸດທະສາດ ຍົກລະດັບສ້າງແຜນພັດທະນາເສດຖະກິດ ສປປ ລາວ
ຄະນະກໍາມະການຮ່ວມມືລາວ-ຈີນ ອົບຮົມຍົກລະດັບ ຍຸດທະສາດ ສ້າງແຜນພັດທະນາເສດຖະກິດ
ຍຸດທະສາດ ແລະ ແຜນພັດທະນາເສດຖະກິດ ຂອງ ລາວ ປະຈຳປີ 2023 ໄດ້ຈັດອົບຮົມຂື້ນໃນວັນທີ 21 ມິຖຸນາ ນີ້ ທີ່ສູນຝຶກອົບຮົມ, ສູນກາງແນວລາວສ້າງຊາດ, ນະຄອນຫລວງວຽງຈັນ ກະຊວງການຄ້າ ແຫ່ງ ສປ ຈີນ ຮ່ວມກັບ ຄະນະກໍາມະການຮ່ວມມືລາວ-ຈີນ ອົບຮົມ ໃນຫົວຂໍ້ “ຍຸດທະສາດ ແລະ ແຜນພັດທະນາເສດຖະກິດ ຂອງ ລາວ ປະຈຳປີ 2023” ໃຫ້ແກ່ສໍາມະນາກອນ ຈໍານວນ 45 ທ່ານ ທີ່ມາຈາກສູນກາງ ແລະ ທ້ອງຖິ່ນຂອງຂະແໜງແຜນການ ແລະ ການລົງທຶນລາວ (ຜທ) ໃນທົ່ວປະເທດ.
ເປັນກຽດເຂົ້າຮ່ວມຂອງ ທ່ານ ຄຳແພງ ລັດມະນີ ຮອງຫົວໜ້າຫ້ອງການຄະນະກໍາມະການຮ່ວມມືລາວ-ຈີນ, ທ່ານ ຫານ ເປັຍ ເລຂາເອກທີ່ປຶກສາດ້ານເສດຖະກິດ-ການຄ້າ ສະຖານທູດ ສປ ຈີນ ປະຈຳ ສປປ ລາວ, ທ່ານ ເຊິນ ຣຸນຢູນ (Chen Run Yun) ຮອງຫົວໜ້າ ສະຖາບັນການຝຶກອົບຮົມສາກົນ ກະຊວງການຄ້າ ສປ ຈີນ, ມີຜູ້ຕາງໜ້າຈາກກົມຈັດຕັ້ງພະນັກງານ ແລະ ກົມກວດກາ ກະຊວງ ຜທ, ພ້ອມດ້ວຍສໍາມະນາກອນເຂົ້າຮ່ວມ ຢ່າງພ້ອມພຽງ.
ທ່ານ ຄໍາແພງ ລັດມະນີ ກ່າວວ່າ:
ໃນຊຸມປີຜ່ານມາພາຍໃຕ້ການນໍາພາຂອງສອງພັກ ແລະ ລັດ ຖະບານ ຂອງສອງປະເທດລາວ ແລະ ຈີນ; ສອງປະເທດໄດ້ມີການຮ່ວມມືພາຍໃຕ້ ຈິດໃຈ 4 ດີ: ບ້ານໃກ້ເຮືອນຄຽງທີ່ດີ, ເພື່ອນທີ່ດີ, ຄູ່ຮ່ວມມືທີ່ດີ ແລະ ສະຫາຍທີ່ດີ
, ເຮັດໃຫ້ການຮ່ວມມືຂອງສອງຝ່າຍ ໄດ້ກ້າວເຂົ້າສູ່ລະດັບອັນໃໝ່ທີ່ສູງກວ່າເກົ່າ, ສອງລັດຖະບານລາວ ແລະ ຈີນ ແມ່ນໄດ້ໃຫ້ຄວາມສຳຄັນສູງ ຕໍ່ວຽກງານການຮ່ວມມືດ້ານການພັດທະນາຊັບພະຍາກອນມະນຸດ ໂດຍສະເພາະການຍົກລະດັບຄວາມສາ ມາດໃຫ້ແກ່ບຸກຄະລາກອນລາວ ຜ່ານການຈັດຝຶກອົບຮົມ ແລະ ສໍາມະນາ ໃນຫົວຂໍ້ຕ່າງໆ.
ສະນັ້ນຈຸດ ປະສົງໃນການຈັດຝຶກອົບຮົມໃນຄັ້ງນີ້ ກໍເພື່ອຍົກລະດັບຄວາມຮູ້ຄວາມສາມາດໃຫ້ແກ່ພະນັກງານ-ລັດຖະ ກອນລາວ ໂດຍສະເພາະດ້ານວຽກງານການວາງແຜນ ແລະ ຍຸດທະສາດການພັດທະນາເສດຖະກິດຂອງລາວ ຊຶ່ງບົດຮຽນປະສົບການທີ່ວິທະຍາກອນ ແລະ ຄູ-ອາຈານ ຈາກ ສປ ຈີນ ໄດ້ນຳສະເໜີນັ້ນ ລ້ວນແຕ່ເປັນສິ່ງລໍ້າຄ່າ ທີ່ພະນັກງານ, ບຸກຄະລາກອນ ຢູ່ໃນຂົງເຂດວຽກງານແຜນການ ແລະ ການລົງທຶນ ຄວນຈະຕ້ອງໄດ້ສຶກສາຮ່ຳຮຽນ ແລະ ຖອດຖອນບົດຮຽນ ເພື່ອນໍາມາໝູນໃຊ້ໃນວຽກງານທີ່ຕົນຮັບຜິດ ຊອບ.
ທ່ານ Chen Run Yun ໄດ້ເຂົ້າຮ່ວມພິທີປິດ ໂດຍຜ່ານລະບົບ (Online) ຊຶ່ງທ່ານໄດ້ກ່າວວ່າ: ນັບຕັ້ງແຕ່ການລະບາດຂອງ ພະຍາດໂຄວິດ-19 ເປັນຕົ້ນມາ, ການຈັດຝຶກອົບຮົມແບບຊ່ອງໜ້າ ຫົວຂໍ້ນີ້ເປັນຫົວຂໍ້ທໍາອິດທີ່ຈັດຂຶ້ນຢູ່ຕ່າງປະເທດ ຊຶ່ງກະຊວງການຄ້າຈີນ ກໍໄດ້ເລືອກເອົາ ສປປ ລາວ ເປັນແຫ່ງທຳອິດ ໃນການຈັດສຳມະນາຢູ່ຕ່າງປະເທດ.
ສະຖາບັນການຝຶກອົບຮົມ ພະນັກງານການຄ້າສາກົນ, ກະ ຊວງການຄ້າ ສປ ຈີນ(AIBO) ໄດ້ເອົາໃຈໃສ່ສູງໃນການກະກຽມ ແລະ ດຳເນີນການຈັດຊຸດຝຶກອົບຮົມໃນຄັ້ງນີ້
ໂດຍໄດ້ມີການເຊື້ອເຊີນວິທະຍາກອນ ແລະ ຄູ-ອາຈານ ຈາກມະຫາວິທະຍາໄລ Qing Hua ຊຶ່ງເປັນມະຫາວິທະຍາໄລທີ່ມີຊື່ສຽງ ອັນດັບໜຶ່ງ ຂອງ ສປ ຈີນ ແລະ ລະດັບແຖວໜ້າຂອງໂລກ ເພື່ອມາແບ່ງປັນປະສົບການຄວາມຮູ້ອັນມີຄຸນຄ່າ ແລະ ລະອຽດເລິກເຊິ່ງ ໃຫ້ແກ່ສໍາມະນາກອນ ເຊັ່ນ:
ແນວຄວາມຄິດການຫັນປ່ຽນເປັນອຸດສາຫະກໍາການຜະລິດຂອງຈີນ, ປະສົບການສຳລັບນະໂຍບາຍການຫັນເປັນດີຈິຕອນຂອງຈີນ, ການວາງແຜນການພັດທະນາ ແລະ ການຈັດຕັ້ງປະຕິບັດແຜນການຂອງຈີນ ແລະ ອື່ນໆ ລວມ 20 ຫົວຂໍ້ ແລະ ມີຄູ-ອາຈານຈີນ ມາຜັດປ່ຽນກັນບັນລະຍາຍ 7 ທ່ານ.
ການຈັດຊຸດຝຶກອົບຮົມຄັ້ງນີ້ ແມ່ນເລີ່ມມາແຕ່ວັນທີ 1-21 ມິຖຸນາ 2023, ລວມເວລາ 21 ວັນ, ທີ່ນະຄອນຫລວງວຽງຈັນ ຊຶ່ງສຳມະນາກອນລາວ ກໍມີຄວາມຕັ້ງໃຈນຳໃຊ້ໂອກາດນີ້ໃນການຮໍ່າຮຽນ ແລະ ຍົກຄໍາຖາມແລກປ່ຽນປະສົບການ ກັບບັນດາຄູ-ອາຈານຈາກຈີນ ຢ່າງກົງໄປກົງມາ, ຜ່ານການຝຶກອົບຮົມໃນຄັ້ງນີ້ ຈະສາມາດນໍາເອົາບົດຮຽນໄປໝູນໃຊ້ ເຂົ້າໃນການຈັດຕັ້ງປະຕິບັດວຽກງານຕົວຈິງ ທີ່ຕົນຮັບຜິດ ຊອບ ໃຫ້ເກີດປະສິດທິຜົນສູງສຸດ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ Lao insight
ຂອບໃຈແຫຼ່ງຂໍ້ມູນຈາກ: ຂປລ.