ຄໍາວ່າ “ໄຄ” ການນໍາໃຊ້ ແລະ ຄວາມໝາຍໃນພາສາລາວ
ອະທິບາຍຄໍາວ່າ “ໄຄ” ໃນພາສາລາວມີຄວາມໝາຍແນວໃດ?
ຄໍາວ່າ “ໄຄ” ແມ່ນໝາຍເຖິງອາການໄຄຂຶ້ນ, ດີຂຶ້ນ ຫຼື ເຮັດໃຫ້ເບົາບາງລົງ ຫຼື ບໍ່ຮ້າຍປານໃດ ດັ່ງ ໄຄແດ່, ໄຄແລ້ວ, ໄຄຂຶ້ນຫຼາຍ ຊຶ່ງມີຄວາມໝາຍຄືກັນກັບ “ແຄນ” ເຊັ່ນ: ແຄນແດ່, ແຄນແລ້ວ, ແຄນຂຶ້ນຫຼາຍ. ນອກຈາກ ນັ້ນ, “ໄຄ” ຍັງແມ່ນຂີ້ໄຄ ຊຶ່ງແມ່ນເຫື່ອທີແຫ້ງຕິດຢູ່ກັບຜິວໜັງ ເວລາອາບນໍ້າຖູເປັນສີດໍາໆ ຄືຂີ້ດິນ ຫຼື ເປັນສີຂີ້ ຝຸ່ນໃນນໍ້າທີ່ແຂ້ນເຂົ້າຕິດຢູ່ກັບໝໍ້. ຄາໄຄແມ່ນຈາກໄປ, ໄຄຄ້າວ ແມ່ນເຫື່ອທີ່ອອກຜິດປົກກະຕິ.
ນອກນີ້, “ໄຄ” ຍັງໝາຍເຖິງ ໄຄທີ່ຢູ່ໃນນ້ຳ ແລະ ສາມາດເອົາມາເປັນອາຫານຂອງຄົນ ແລະ ສັດໄດ້ໂດຍທົ່ວໄປແລ້ວ ຖ້າເປັນຄົນລາວ ຄິດວ່າຄົງຈະເຄີຍເຫັນ ແລະ ເຄີຍກິນມາແລ້ວ, ໄຄຈະມີຫລາກຫລາຍແບບແລ້ວແຕ່ວ່າແຕ່ລະເຂດ ຫຼື ແຕ່ລະແຂວງຈະເຮັດແບບໃດ, ຈະມີຢູ່ສອງແບບ ໄຄແຜ່ນ ແລະ ໄຄນ້ຳທີ່ບໍ່ໄດ້ເຮັດເປັນແຜ່ນ, ຈະເອົາມາເຮັດເອາະກິນເຊິ່ງເປັນອາຫານທີ່ຄົນລາວນິຍົມກິນຫລາຍ.
ເພື່ອໃຫ້ເຂົ້າໃຈຄວາມໝາຍຂອງການນນຳໃຊ້ໃຫ້ດີຂຶ້ນກວ່າເກົ່າ ເຮົາເບີ່ງຄວາມໝາຍ ແລະ ຕົວຢ່າງດັ່ງລຸ່ມນີ້:
ຄວາມໝາຍຄຳວ່າ “ໄຄ”.
“ໄຄ” (1. ຄໍາກິ ລິຍາວິເສດ) ແຄນຂຶ້ນ, ດີ, ເບົາບາງ (ໄຄແດ່, ດີຂຶ້ນແດ່ແລ້ວ): ຄາໄຄ ແມ່ນຈາກໄປ, ໄຄຄ້າວ ແມ່ນເຫື່ອທີ່ ອອກຜິດປົກ ກະຕິ. (2. ຄໍານາມ) ເຫື່ອທີແຫ້ງ ຕິດຢູ່ກັບຜິວໜັງ ຫຼື ຝຸ່ນໃນນໍ້າທີ່ແຂ້ນເຂົ້າຕິດຢູ່ກັບໝໍ້ ເອີ້ນ ຂີ້ໄຄ.
ຕົວຢ່າງ:
- ໝູ່ເປັນໄຂ້ເລືອດອອກພັກວຽກໄດ້ 3 ມື້ແລ້ວ ປະຈຸບັນອາການໄຄຫຼາຍແລ້ວ ແລະ ຄິດວ່າອີກບໍ່ດົນຈະ ສາມາດມາເຮັດວຽກຕໍ່ໄດ້.
- ລາບມື້ນີ້ລົດຊາດແຊບໄຄກວ່າລົດຊາດລາບວານນີ້ ເພາະປູງແຕ່ງໄດ້ທີ່ ເຊັ່ນ: ຄວາມນົວ, ຄວາມສົ້ມ ບໍ່ຈາງ ແລະ ບໍ່ເຄັມ ກິນແລ້ວຢາກກິນອີກ.
ສະຫຼຸບ.
ຄໍາວ່າ “ໄຄ” ໝາຍເຖິງແຄນຂຶ້ນ, ດີຂຶ້ນ, ເບົາບາງ. ນອກ ຈາກນີ້, ຍັງໝາຍເຖິງ ຂີ້ໄຄ ຫຼື ເຫື່ອທີແຫ້ງ ຕິດຢູ່ກັບຜິວໜັງ ຫຼື ຝຸ່ນໃນນໍ້າທີ່ແຂ້ນເຂົ້າຕິດຢູ່ກັບໝໍ້.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo