ຄໍາວ່າ “ຮ້ອງ” ການນໍາໃຊ້ ແລະ ຄວາມໝາຍໃນພາສາລາວ
DooDiDo
ອະທິບາຍຄໍາວ່າ “ຮ້ອງ” ໃນພາສາລາວມີຄວາມໝາຍແນວໃດ?
ໃນບົດນີ້ຈະມາອະທິບາຍຄໍາວ່າ “ຮ້ອງ” ໝາຍເຖິງການອອກສຽງຈາກປາກຄົນ ຫຼື ສັດ ເພື່ອເອີ້ນຫາ, ຮຽກຫາ, ຮ້ອງບອກໃຫ້ໄປ ຫຼື ມາ ຄືກັນກັບ “ແຂກ” ແຕ່ການຮ້ອງອາດຈະເປັນສຽງດັງແຮງ ຫຼື ຄ່ອຍຕາມຈັງຫວະ ຫລື ສະຖານະການນັ້ນໆ, ນອກນັ້ນ, ຮ້ອງຍັງໝາຍເຖິງ ຮ້ອງໃສ່ ຫຼື ການຮ້ອງເພງທີ່ໃຊ້ສຽງ ແລະ ສຳນວນໃຫ້ມີຄວາມອອນຊອນ ແລະ ມ່ວນຊື່ນ ຫລື ໂສກເສົ້າແລ້ວແຕ່ຄວາມໝາຍ ແລະ ເນື້ອໃນຂອງເພງນັ້ນເອງ.
ນອກນີ້, “ຮ້ອງ” ຍັງໝາຍເຖິງຮ້ອງລໍາທໍາເພັງ ດ້ວຍສຽງອັນໄພເລາະ, ມ່ວນຊື່ນ ໝາຍເຖິງການຮ້ອງໂຮໂຄສັງກາ ແມ່ນການຮ້ອງປ່າວແຮງໆ.ເວລາໄປປະສົມກັບຄໍາອື່ນຍັງໃຫ້ຄວາມ ໝາຍຕ່າງໄປເຊັ່ນ ຮ້ອງທຸກ ແມ່ນການບອກຄວາມທຸກ ເພື່ອຂໍຄວາມຊ່ວຍເຫຼືອ. ຮ້ອງຟ້ອງ ແມ່ນການຟ້ອງຜູ້ອື່ນ ຫຼື ຄູ່ກໍລະນີທີ່ຄັດແຍ້ງກັນ.
ເພື່ອໃຫ້ເຂົ້າໃຈຄວາມໝາຍຂອງການນນຳໃຊ້ໃຫ້ດີຂຶ້ນກວ່າເກົ່າ ເຮົາເບີ່ງຄວາມໝາຍ ແລະ ຕົວຢ່າງດັ່ງລຸ່ມນີ້:
ຄວາມໝາຍຄຳວ່າ “ຮ້ອງ”.
“ຮ້ອງ” (1. ຄໍາກິລິຍາ). ການອອກສຽງ, ເອີ້ນຫາ, ຮຽກ, ບອກໃຫ້ໄປ ຫຼື ມາດັງໆ, ແຂກ, ຮ້ອງທຸກ ແມ່ນການບອກ ຄວາມທຸກ ເພື່ອຂໍຄວາມຊ່ວຍເຫຼືອ. ຮ້ອງເພງແມ່ນການຮ້ອງເປັນສຽງມ່ວນໆຕາມຄໍາກອນ. ຮ້ອງໂຮໂຄສັງກາ ແມ່ນການຮ້ອງປ່າວແຮງໆ.
ຕົວຢ່າງ:
- ແມ່ຮ້ອງໃສ່ລູກທີ່ໄປຫຼີ້ນຢູ່ເຮືອນຂ້າງໆໃຫ້ກັບມາເຮືອນເພື່ອຊ່ວຍວຽກແມ່ໃນການກະກຽມອາຫານຄໍ່າ.
- ໃນງານຄອນເສີດວານນີ້ ນັກຮ້ອງຮ້ອງເພັງມ່ວນຫຼາຍໃຜໆກໍມັນ ແລະ ພາກັນເຕັ້ນເປັນຈັ່ງຫວະຕາມ ເພັງທີ່ຮ້ອງ.
- ອາຈານຮ້ອງໃສ່ນັກຮຽນທີ່ບໍ່ທັນຂຶ້ນຫ້ອງຢູ່ທາງນອກ ເພື່ອບອກໃຫ້ມາຂຶ້ນຫ້ອງ ເພາະຈະເລີ່ມການສອນ ແລ້ວ.
ສະຫຼຸບ.
ຄໍາວ່າ “ຮ້ອງ” ມີຄວາມໝາຍວ່າ ການສົ່ງສຽງອອກມາຈາກສິ່ງທີ່ມີຊິວິດ ແລະ ອື່ນໆ, ນອກຈາກນັ້ນ ຄຳວ່າ ຮ້ອງ ຍັງຄ້າຍຄືກັນກັບແຂກ ແລ້ວຍັງແມ່ນການຮ້ອງເພັງ, ຮ້ອງຫາ, ຮ້ອງທຸກ, ຮ້ອງຟ້ອງ ຕ່າງໆ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
