ຄໍາວ່າ “ໂກດ” ມີຄວາມໝາຍໃນພາສາລາວແນວໃດ?
ອະທິບາຍຄໍາວ່າ “ໂກດ” ມີຄວາມໝາຍແນວໃດ?
ຄໍາວ່າ “ໂກດ” ແມ່ນໝາຍເຖິງຕົວເລກໃນການນັບ ຊຶ່ງເທົ່າກັບສິບລ້ານ ເພື່ອໃຫ້ສະບາຍໃນການໃຊ້ໃຫ້ສັ້ນລົງ. ອີກຄວາມໝາຍນຶ່ງແມ່ນຄຽດຮ້າຍ, ໂກດແຄ້ນ ຫຼື ການມີໂທສະໃຫ້ໃຜບາງຄົນ.
ນອກຈາກນັ້ນ ຍັງ ໝາຍເຖິງໂລງສົບ ແຕ່ແມ່ນໃຊ້ສໍາລັບເຈົ້າຊີວິດ ເທົ່ານັ້ນ ສາມັນຊົນທົ່ວໄປບໍ່ໃຊ້ຄໍາດັ່ງກ່າວ. ລວມທັງໝາຍເຖິງເຄື່ອງຢາຈໍາພວກນຶ່ງມີຫຼາຍແນວປົນກັນ ທີ່ມັກໃຊ້ເອີ້ນໃນສະໄໝກ່ອນ.
ສະນັ້ນ ເພື່ອໃຫ້ເຂົ້າໃຈ ການນໍາໃຊ້ຄໍາດັ່ງກ່າວໃຫ້ຫຼາຍຂຶ້ນເຮົາມາເບິ່ງລາຍລະອຽດນໍາກັນດັ່ງລຸ່ມນີ້:
ຄຳວ່າ “ໂກດ”
“ໂກດ” (1. ຄໍານາມ) ຈໍານວນນັບທໍ່ກັບສິບລ້ານ (10.000.000.000) (ປ. ໂກຕິ).
(2. ຄໍາກິລິຍາ) ຄຽດຮ້າຍ (ເບິ່ງ ໂກທາ) (ປ. ໂກທ).
(3. ຄໍານາມ) ສາງ, ຫີບ, ໂລງໃສ່ຄົນຕາຍ ໃຊ້ສຳລັບເຈົ້າແຜ່ນດິນ ວ່າ ພຣະໂກດ (ເບິ່ງ ໂກສະ).
(4. ຄໍານາມ). ເຄື່ອງຢາຈຳພວກນຶ່ງມີຫລາຍແນວເອີ້ນວ່າໂກດທັງ 5 ຫຼື ໂກດ ທັງ 7 ກໍມີ.
ຕົວຢ່າງ:
- ເຖິງຈະເສຍເງິນເປັນໂກດ ແຕ່ກໍ່ຄຸ້ມຄ່າເພາະສາມາດກູ້ຊີວິດກັບຄືນມາໄດ້ ເພາະວ່າເງິນຄໍາກໍາແກ້ວນັ້ນ ບໍ່ຕາຍຄ່ອຍຫາໃໝ່ ກົງກັນຂ້າມມີຫຼາຍປານໃດກໍຕາມ ຖ້າຕາຍໄປກໍເອົາໄປນໍາບໍ່ໄດ້.
- ມະຫາເສດຖີ ສ້າງຄະລືຫາດຫຼັງບັກໃຫຍ່ ຫຼູຫຼາ ລາຄາຫຼາຍລ້ານຫຼາຍໂກດ ມີສິ່ງອໍານວຍຄວາມສະດວກຄົບຊຸດ ຈັ່ງແມ່ນສະອອນເຂົາເຈົ້າຜູ້ມີເງິນ.
- ການແຜ່ເຊື້ອຂອງໂຄວິດ 19 ເຮັດໃຫ້ຊາວອາເມລິກາຈໍານວນນຶ່ງໂກດແຄ້ນ ແລະ ຊັງຄົນອາຊີ ວ່າແຕ່ເຫັນກໍລົງມືທໍາຮ້າຍຮ່າງກາຍ ເພື່ອຄວາມສະໃຈແບບບໍມີເຫດຜົນ ເປັນຜົນເຮັດໃຫ້ຄົນອາຊີຫຼາຍຄົນບໍ່ກ້າອອກຈາກເຮືອນ ຢູ່ປະເທດດັ່ງກ່າວ.
- ໃນສະໄໝສັກດີນາ ການທີ່ເຈົ້າຊີວິດສະຫວັນນະຄົດ (ຕາຍ ຫຼື ເສຍຊີວິດ) ແມ່ນຈະໄດ້ບັນຈຸສົບໄວ້ໃນໂກດ ຫຼື ພຣະໂກດ (ຖ້າເປັນສາມັນຊົນແມ່ນຈະໃສ່ໃນໂລງສົບ). ພ້ອມກັນນັ້ນ, ໂກດຍັງໃຊ້ສໍາລັບ ບັນຈຸສົບຂ້າລາຊາການຜູ້ໃຫຍ້ທີ່ມີສັກ ມີຕໍາແໜ່ງສູງ. ໂກດເປັນພາຊະນະເຄື່ອງສູງ ມີຮູບຊົງເປັນຮູບ ຈວຍ ມີຍອດແຫຼມ ມີ 2 ປະເພດຄື: ໃຊ້ສໍາລັບບັນຈຸພຣະສົບ ແລະ ອັດທິ. ໂກດມີ 2 ຊັ້ນ ຊັ້ນນອກ ເອີ້ນວ່າ ລອງ ແລະ ຊັ້ນໃນເອີ້ນວ່າ ໂກດ.
ສະຫຼຸບ.
ຄໍາວ່າ “ໂກດ” ແມ່ນໝາຍເຖິງສິບລ້ານ, ໝາຍເຖິງການໂກດແຄ້ນ ຫຼື ຊັງ. ນອກຈາກນັ້ນ, ຍັງໝາຍເຖິງຫີບສົບ, ໂລງສົບ ສໍາລັບເຈົ້າຊີວິດ ແລະ ເຈົ້າຂຸນມູນນາຍຊັ້ນຜູ້ໃຫຍ່ ໃນລະບອບສັກດີນາ. ລວມທັງການ ເອີ້ນຢາຈໍານວນນຶ່ງທີ່ມີຫຼາຍແນວໃສ່ປົນກັນ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo