ຄໍາວ່າ “ແຟັບ” ການນໍາໃຊ້ ແລະ ຄວາມໝາຍໃນພາສາລາວ
DooDiDo
ອະທິບາຍຄໍາວ່າ “ແຟັບ” ໃນພາສາລາວມີຄວາມໝາຍແນວໃດ?
ແຟັບກໍຄື “ສະບູຝຸ່ນ” ແມ່ນສະບູປະເພດນຶ່ງທີ່ເປັນຜົງ ເມັດນ້ອຍໆຈໍານວນຫຼາຍ ບໍ່ແມ່ນສະບູກ້ອນທີ່ໃຊ່ຮຸກຕົນໂຕເວລາອາບນໍ້າ. “ແຟັບ” ໃຊ້ເພື່ອຊັກເສື້ອຜ້າ ແລະ ແຜ່ນແພ ຕ່າງໆ ອາດຈະໃຊ້ຊັກດ້ວຍມື ຫຼື ໃຊ້ຊັກດ້ວຍຈັກຊັກຜ້າ. ແຟັບ ຫຼື ສະບູຝຸ່ນຜະລິດໃນຫຼາຍປະເທດ ແລະ ມີຫຼາຍຍີ່ຫໍ້ແຕກຕ່າງກັນໄປ.
ໃນເມື່ອກ່ອນຢູ່ລາວແມ່ນໄດ້ນໍາເຂົ້າຈາກປະເທດເພື່ອນບ້ານ ໜຶ່ງໃນນັ້ນແມ່ນຍີ່ຫໍ້ນຶ່ງ “ແຟັບ” ທີ່ໂດ່ງດັງ ແລະ ໃຊ້ທົ່ວ ທຸກພາກຈົນຫຼາຍຄົນ ໄດ້ຝັງລົງໃຕ້ຈິດສໍານຶກໂດຍອັດໂຕໂນມັດ ແລະ ນິຍົມເອີ້ນສະບູຝຸ່ນວ່າ “ແຟັບ” ຕັ້ງແຕ່ນັ້ນມາ ແລະ ບໍ່ຄ່ອຍໃຊ້ຄໍາວ່າ “ສະບູຝຸ່ນ”. ສ່ວນຄໍາວ່າ “ແຟັບ” ໃນໄວຍະກອນລາວແມ່ນບໍ່ມີ.
ສະນັ້ນ ເພື່ອໃຫ້ເຂົ້າໃຈຫຼາຍຂຶ້ນ ເຮົາມາເບິ່ງລາຍລະອຽດດັ່ງລຸ່ມນີ້:
ຄວາມໝາຍຄຳວ່າ “ແຟັບ”:
“ແຟັບ” ແມ່ນເປັນຊື່ສະບູຝຸ່ນສັນຊາດອາເມລິກາ ທີ່ນໍາເຂົ້າຈາກປະເທດໄທ, ແຕ່ທາງດ້ານຫຼັກການຂຽນໃນໄວຍະກອນລາວ ແມ່ນບໍ່ມີ, ເປັນເຄື່ອງປະສົມຂຶ້ນໃຊ້ຊັກຟອກເສື້ອຜ້າໃຫ້ສະອາດ, ສະບູປະເພດນຶ່ງ ແຕ່ເປັນຜົງ ເມັດນ້ອຍໆຈໍານວນຫຼາຍ.
ຕົວຢ່າງ:
- ໂຮງງານສະບູຝຸ່ນ ບໍລິສຸດ ແມ່ນໂຮງງານຂອງຄົນລາວ ຕັ້ງຢູ່ເມືອງໄຊທານີ ນະຄອນຫຼວງວຽງຈັນ ແລະ ໄດ້ສົ່ງໄປຈໍາໜ່າຍຢູ່ທຸກໆແຂວງ ແຕ່ເຖິງແນວໃດກໍດີຍັງບໍ່ສາມາດຕອບສະໜອງໄດ້ຢ່າງທົ່ວເຖິງ. ເພື່ອໃຫ້ມີທາງເລືອກ ແລະ ມີການແຂ່ງຂັນ ລັດຖະບານລາວ ໄດ້ເປີດກວ້າງໃຫ້ມີການນໍາເຂົ້າສະບູຝຸ່ນຈາກຕ່າງປະເທດ ຊຶ່ງຄົນລາວສ່ວນໃຫຍ່ແມ່ນນິຍົມນໍາເຂົ້າຈາກປະເທດໄທ ເປັນຕົ້ນຍີ່ຫໍ້ ແຟັບ, ອີຊີ, ໂອໂມ, ແອກແທກ, ເປົາ, ບຣິດສ໌ ເປັນຕົ້ນ.
- “ແຟັບ”ແມ່ນເປັນຊື່ສະບູຝຸ່ນສັນຊາດອາເມລິກາ ຍີ່ຫໍ້ນຶ່ງ ທີ່ລາວນໍາເຂົ້າຈາກປະເທດໄທ ແລະ ໄທກໍນໍາເຂົ້າມາປະມານ 70 ກວ່າປີ ຈົນຫຼາຍຄົນທັງໄທ ແລະ ລາວ ເອີ້ນແທນຄໍາວ່າ “ສະບູຝຸ່ນ” ຈົນເຖິງທຸກມື້ນີ້.
ສະຫຼຸບ
ຄຳວ່າ “ແຟັບ” ແມ່ນຊື່ຂອງສະບູຝຸ່ນຍີ່ຫໍ້ໜຶ່ງຂອງອາເມລິກາ, ແມ່ນສະບູຜົງໃຊ້ສໍາລັບຊັກສົ້ງ ຊັກເສື້ອ ຊັກຜ້າແພຕ່າງໆ ທີ່ໄທ ແລະ ລາວນໍາເຂົ້າມາ ເພື່ອໃຊ້ຈົນເອີ້ນແທນຄໍາວ່າ “ສະບູ ຝຸ່ນ” ຈົນເຖິງທຸກມື້ນີ້.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
