ອະທິບາຍຄໍາວ່າ “ຮົກ” ໃນພາສາລາວມີຄວາມໝາຍແນວໃດ?

ຄໍາວ່າ “ຮົກ” ໝາຍເຖິງຄວາມບໍ່ເປັນລະບົບລະບຽບເກາະກາຍກັນໄປຊະຊາຍ, ເປັນຕົ້ນແມ່ນຂີ້ເຫຍື້ອຈ່ຳນວນຫລາຍຕາມເຮືອນຊານບ້ານຊ່ອງ, ຕາມໄຮ່ນາຮົ້ວສວນ ຫລື ຕາມປ່າຕ່າງໆກໍເອີ້ນເຊັ່ນດຽວກັນ, ສ່ວນຫລາຍມັກຈະໄດ້ຍິນກັນຢູ່ເປັນປະຈຳໃນເຮືອນຊານຂອງຕົນເອງ ເຊັ່ນ: ເຮືອນຂ້ອຍມັກຮົກຫລາຍ ບໍ່ໄດ້ມ້ຽນດົນແລ້ວ, ເມຍຂ້ອຍກວາດເຮືອນ ເພາະວ່າເຮືອນ ຮົກຫລາຍ ເປັນຕົ້ນ.

ນອກຈາກນີ້, “ຮົກ” ຮົກໝາຍເຖິງຮວາຍລູກ ຫລື ມົດລູກ ກໍໄດ້, ໃນກໍລະນີນີ້, ສ່ວນຫລາຍໃຊ້ກັບຄົນ ແລະ ສັດໃນຕອນເວລາເກີດລູກໃໝ່ໆ, ບາງຄົນເອົາມາຕົ້ມກິນໃນກໍລະນີສັດເກີດລູກໃໝ່ໆ ເຂົາເຈົ້າຕ້ອງໄປຖ້າເອົາໃຫ້ທັນ, ຖ້າຫາກເອົາບໍ່ທັນກໍຈະຖືກແມ່ຂອງສັດນັ້ນກິນເອງ ເຊິ່ງສິ່ງນີ້ທີ່ເອີ້ນວ່າ ຮົກ.

ສະນັ້ນ ເພື່ອໃຫ້ເຂົ້າໃຈ ການນໍາໃຊ້ຄໍາດັ່ງກ່າວໃຫ້ຫຼາຍຂຶ້ນ ເຮົາມາເບິ່ງລາຍລະອຽດດັ່ງລຸ່ມນີ້:

ຄໍາວ່າ “ຮົກ”.

ວ. ບໍ່ແປນ, ເປັນປ່າຕຶບ, ສະຖານທີ່ ທີ່ເຕັມໄປດ້ວຍສິ່ງຂອງຕ່າງໆ ມີສິ່ງທີ່ຕ້ອງການ ແລະ ບໍ່ຕ້ອງການ ເອີ້ນທີ່ຮົກ ຢ່າງວ່າ ” ຮົກຄົນໄດ້ໃຊ້ ຮົກໄມ້ໄດ້ຟັນ ” (ພາສິດ).

ນ. ຊື່ໄມ້ໄຜ່ແນວໜຶ່ງ ລຳໃຫຍ່ກວ່າໄມ້ໄຜ່ບ້ານ ແລະ ບໍ່ມີໜາມ ເອີ້ນໄມ້ຮົກ.

ນ. ຮວາຍລູກ, ມົດລູກ ກໍ່ວ່າ.

ຕົວຢ່າງ:

ວານນີ້ຂ້ອຍກາຍໄປປະຕູໄຊເຫັນນັກທ່ອງທ່ຽວມາທ່ຽວຢ່າງຫລວງຫລາຍ ແລະ ຕາມສະຖານທີຈອດລົດເຫັນຂີ້ເຫຍື້ອ ຮົກ ເຕັມໄປຫມົດ.
ບໍ່ໄດ້ໄປສວນດົນແລ້ວມາເບິ່ງມື້ນີ້ ຮົກ ຂະໜາດເຕັມໄປດ້ວຍຕົ້ນໄມ້ ແລະ ຫຍ້າ.
ເຮືອນຂ້ອຍຮົກຫລາຍເດັກນ້ອຍມາຫລິ້ນຂອງຫລິ້ນເດັກນ້ອຍແລ້ວບໍ່ມ້ຽນ

ສະຫຼຸບ.

ຄໍາວ່າຮົກ ບໍ່ແປນ, ເປັນປ່າຕຶບ, ສະຖານທີ່ ທີ່ເຕັມໄປດ້ວຍສິ່ງຂອງຕ່າງໆ ມີສິ່ງທີ່ຕ້ອງການ ແລະ ບໍ່ຕ້ອງການ, ອີກຄວາມໝາຍໜຶ່ງໝາຍຄວາມວ່າ ຊື່ໄມ້ໄຜ່ແນວໜຶ່ງ ລຳໃຫຍ່ກວ່າໄມ້ໄຜ່ບ້ານ ແລະ ບໍ່ມີໜາມ ເອີ້ນໄມ້ຮົກ. ນອກຈາກນີ້, “ຮົກ” ຍັງໝາຍເຖິງ ຮວາຍລູກ, ມົດລູກ ອີກດ້ວຍ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ ເວົ້າລາວກັນ