ຄໍາວ່າ “ວັນເກີດ” ການນໍາໃຊ້ ແລະ ຄວາມໝາຍໃນພາສາລາວ
DooDiDo
ອະທິບາຍຄໍາວ່າ “ວັນເກີດ” ມີຄວາມໝາຍແນວໃດ?
ຄໍາວ່າ “ວັນເກີດ” ໝາຍເຖິງມື້ເກີດ, ມື້ຄອດອອກມາຈາກທ້ອງແມ່ຂອງຄົນ ຫຼື ສັດ ອອກມາເບີ່ງໂລກ ເປັນເທື່ອທໍາອິດ (ແຕ່ສັດບາງແນວອາດຈະເກີດແຕກຕ່າງອອກໄປ), ຊຶ່ງລວມຄໍາວ່າ “ວັນ” ແລະ “ເກີດ ຫຼື ກໍາເນີດ” ມາໂຮມເຂົ້າກັນ ຫຼື ບວກເຂົ້າກັນ.
ຄໍາວ່າ “ວັນ” ເປັນຫົວໜ່ວຍນັບຄືກັນກັບມື້ ດັ່ງ 7 ວັນ ເປັນອາທິດນຶ່ງ, ໜຶ່ງເດືອນມີ 31 ວັນ, ໜຶ່ງປີມີ 365 ວັນ ເປັນຕົ້ນ. “ວັນ” ຍັງແມ່ນການນັບເອົາໄລຍະເວລາຈໍານວນ 12 ຊົ່ວໂມງ ຕັ້ງແຕ່ແຈ້ງຈົນຮອດຄໍ່າ ຫຼື ຕາເວັນ ຂຶ້ນຈົນຕາເວັນຕົກດິນ ຊຶ່ງເປັນເວລາທີ່ເຮົາສາມາດເຫັນດວງຕາເວັນ ຫຼື ເວລາທີ່ຍັງແຈ້ງ ແລະ ບໍ່ຄໍ່າ ນັ້ນເອງ. ສ່ວນຄໍາວ່າ “ເກີດ” ໝາຍເຖິງກໍາເນີດເກີດຂຶ້ນ ເຊັ່ນ: ເກີດລູກ, ເກີດຈາກ ເປັນຕົ້ນ. ຄໍາວ່າ “ວັນເກີດ” ກົງກັນຂ້າມກັບ ຄໍາວ່າ “ວັນຕາຍ”
ສໍາລັບຄົນເຮົາ “ວັນເກີດ” ແມ່ນຈະໄລ່ຕາມຂວບປີ ເພື່ອໃຊ້ໃນການໄລ່ອາຍຸ ເຊັ່ນ: ວັນເກີດຄົບຮອບ 1 ປີ, ວັນເກີດຄົບຮອບ 5 ປີ, ວັນເກີດຄົບຮອບ 10 ເປີ ເປັນຕົ້ນ. ໃນປະເພນີຂອງຊາວຕາເວັນຕົກແມ່ນຈະມີ ການສະຫຼອງວັນເກີດ ຫຼື ວັນຄົບຮອບວັນເກີດ ຊຶ່ງຈະມີເຄັກເພື່ອເປົ່າ ແລະ ມີການສັງສັນກິນດື່ມກັນ. ໃນປະຈຸບັນການສະຫຼອງວັນເກີດເປັນທີ່ນິຍົມ ແລະ ໄດ້ແຜ່ກະຈາຍໄປທົ່ວໂລກ.
ສະນັ້ນ ເພື່ອໃຫ້ເຂົ້າໃຈ ການນໍາໃຊ້ຄໍາດັ່ງກ່າວໃຫ້ຫຼາຍຂຶ້ນ ເຮົາມາເບິ່ງລາຍລະອຽດດັ່ງລຸ່ມນີ້:
ຄຳວ່າ “ວັນເກີດ”.
“ວັນເກີດ” (1. ຄໍານາມ) ມື້ເກີດ.
ຕົວຢ່າງ:
- ມື້ວານໄດ້ໄປຮ່ວມງານລ້ຽງສະຫຼອງວັນເກີດຂອງລູກໝູ່ຄົບຮອບ 5 ປີ, ຊຶ່ງໃນງານໄດ້ມີການເປົ່າເຄັກ ແລະ ກິນດື່ມອີກກັນຢ່າງມ່ວນຊື່ນ.
- ວັນເກີດຂອງຂ້ອຍແມ່ນຖືກກັບມື້ປີໃໝ່ສາກົນ ແລະ ໃນແຕ່ລະປີແມ່ນມີການສະຫຼອງຄວບກັນເລີຍ.
ສະຫຼຸບ.
ຄໍາວ່າ “ວັນເກີດ” ແມ່ນມື້ກໍາເນີດ, ມື້ເກີດ ຫຼື ມື້ຄອດອອກມາຈາກທ້ອງແມ່ຂອງຄົນ ຫຼື ສັດ ຊຶ່ງມື້ທໍາອິດທີ່ອອກມາຜະຈົນໄພຢູ່ໂລກ. ວັນເກີດແມ່ນສອງຄໍາມາບວກເຂົ້າກັນຄື: “ວັນ” ແລະ “ເກີດ” ຊຶ່ງສອງຄໍາດັ່ງ ກ່າວແມ່ນມີຄາມໝາຍຕ່າງກັນໄປ ດັ່ງ “ວັນ” ເປັນຫົວໜ່ວຍນັບຄືກັນກັບມື້. ຄໍາວ່າ “ເກີດ” ແມ່ນກໍາເນີດເກີດຂຶ້ນ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
