ອະທິບາຍຄໍາວ່າ “ມົດ” ມີຄວາມໝາຍແນວໃດ?

ຄໍາວ່າ “ມົດ” ແມ່ນແມງຊະນິດໜຶ່ງ ມີຫຼາຍແນວ, ມົດສ້າງຮັງເປັນອານາຈັກຂະໜາດໃຫຍ່ ບາງຮັງມີ ຫຼາຍກວ່າ 1 ລ້ານໂຕ. ມົດມີການແບ່ງວັນນະຄ້າຍກັນກັບປວກ, ເຜີ້ງ, ຕໍ່ (ບາງຊະນິດ) ຄື ມີມົດງານເປັນເພດເມຍທີ່ເປັນໝັນມີໜ້າທີ່ຫາອາຫານ ແລະ ຊ້ອມແປງຮັງ, ປົກປ້ອງຮັງຈາກສັດຕູພາຍນອກ, ດູແລ ຕົວອ່ອນ ແລະ ເຮັດວຽກອື່ນໆທົ່ວໄປ, ວັນນະສືບພັນເປັນມົດໂຕຜູ້ ແລະ ລາຊານີ. ມົດແບ່ງອອກເປັນ ຫຼາຍແນວ ດັ່ງ ມົດສົ້ມ, ມົດແດງຊາຍ, ມົດງ່າມ, ມົດດໍາ, ມົດໄຮ, ມົດຄັນ ແລະ ອື່ນໆ. ມົດແຕ່ລະແນວ ຈະບໍ່ສາມາດຢູ່ນໍາກັນໄດ້.

ນອກຈາກນີ້, “ມົດ” ຍັງໃຊ້ເອີ້ນປີໃນເວລາ 8 ປີ ໃດໃນ 12 ປີ ເຮົາເອີ້ນ ປີມົດ ຊຶ່ງກົງກັບປີມະແມ ຫຼື ປີມ້າ. “ມົດ” ຍັງໃຊ້ເອີ້ນຄົນທີ່ມີວິຊາອາຄົມ ຫຼື ເປັນຄົນເຮັດຮິດຄອງທາງສາດສະໜາຜີ ຊຶ່ງເປັນສາດສະໜາ ທ້ອງຖີ່ນ ຊຶ່ງບໍ່ແມ່ນສາດສະໜາພຸດ, ສາດສະໜາຄຼິດ ເປັນຕົ້ນ ໂດຍທົ່ວໄປເຮົາເອີ້ນ ມໍຜີໝໍມົນ ຖ້າເປັນ ຜູ້ຍິງເຮົາເອີ້ນ ແມ່ມົດ ໃນທາງກັບກັບຖ້າເປັນຄົນຊາຍ ເຮົາເອີ້ນ ພໍ່ມົດ.

ສະນັ້ນ ເພື່ອໃຫ້ເຂົ້າໃຈ ການນໍາໃຊ້ຄໍາດັ່ງກ່າວໃຫ້ຫຼາຍຂຶ້ນ ເຮົາມາເບິ່ງລາຍລະອຽດດັ່ງລຸ່ມນີ້:

ຄຳວ່າ “ມົດ”.

“ມົດ” (1. ຄໍານາມ) ສັດຂະໜາດນ້ອຍ ທີ່ໂຮມກັນຢູ່ຕາມດິນ ຫຼື ຕາມຕົ້ນໄມ້ ມີຫຼາຍແນວ ເຊັ່ນ: ມົດແດງ, ມົດດໍາ, ມົດງ່າມ, ມົດຄັນ, ມົດໄຮ ເປັນຕົ້ນ. ຮອບປີຖ້ວນແປດໃນ 12 ປີ ເອີ້ນ ປີມົດກົງກັບປີມະແມ. ໝໍມົນ, ໝໍຜີ ເອີ້ນ ໝໍມົດ, ຖ້າເປັນແມ່ຍິງ ເອີ້ນ ແມ່ມົດ, ຖ້າເປັນຊາຍ ຮຽກພໍ່ມົດ.

ຕົວຢ່າງ:

• ໄຂ່ມົດສົ້ມແກງໃສ່ປາຄໍ່ໃຫຍ່ແຊບຫຼາຍ ແລະ ເປັນທີ່ນິຍົມກັນກິນໃນປະເທດລາວ ແລະ ສ່ວນນຶ່ງຂອງປະເທດໄປ ໂດຍສະເພາະແມ່ນອີສານ.
• ໃນໜັງເລື່ອງຂອງຕາເວັນຕົກສ່ວນຫຼາຍມັກຈັດໃຫ້ແມ່ມົດເປັນຕົວຮ້າຍ ແລະ ເປັນຕາຢ້ານ ມີໜ້າ ຕາຂີ້ລ້າຍ ເຮັດໃຫ້ເດັກນ້ອຍໄດ້ຍິນແລ້ວຢ້ານ.

ສະຫຼຸບ.

ຄໍາວ່າ “ມົດ” ແມ່ນໂຕມົດ ຊຶ່ງເປັນແມງຊະນິດໜຶ່ງ ມີຫຼາຍແນວ, ມີອານາຈັກຂະໜາດໃຫຍ່ ບາງຮາງມີເປັນລ້ານໂຕ. ມົດມີການແບ່ງວັນນະ ເຊັ່ນ: ມົດກໍາມະກອນ, ມົດໂຕຜູ້ສືບພັນ ແລະ ມົດລາຊານີ. ມົດແບ່ງມີຫຼາຍແນວ ເອີ້ນຕາມຈຸດພິເສດຂອງມັນ ດັ່ງ ມົດສົ້ມ, ມົດແດງຊາຍ, ມົດງ່າມ, ມົດດໍາ, ມົດໄຮ, ມົດຄັນ. ນອກຈາກນີ້, “ມົດ” ຍັງໝາຍເຖິງປີມົດ ຊຶ່ງເປັນຮອບປີຖ້ວນ 8 ໃນ 12 ປີ ຊຶ່ງກົງກັບປີມະແມ .“ມົດ” ຍັງແມ່ນມໍຜີໝໍມົນ ຜູ້ຍິງເອີ້ນ ແມ່ມົດ ແລະຜູ້ຊາຍ ເອີ້ນ ພໍ່ມົດ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo