ອະທິບາຍຄໍາວ່າ “ປູ” ມີຄວາມໝາຍແນວໃດ?

ຄໍາວ່າ “ປູ” ໝາຍເຖິງສັດມີອອງ ຫຼື ກະດອງແນວນຶ່ງ ມີ 8 ຂາ (ຕີນ) ຊຶ່ງເປັນຂໍ້ ເພື່ອໃຫ້ສາມາດເຄື່ອນ ຍ້າຍໄປມາໄດ້ທັງຢູ່ບົກ, ຂີ້ຕົມ, ນໍ້າ ແລະ ມີ ກ້າມ ຫຼື ງ່າມສອງງ່າມ (ຄີມປູ ກໍວ່າ) ງ່າມນຶ່ງຈະໃຫຍ່ ແລະ ງ່າມນຶ່ງຈະນ້ອຍກວ່າ ໃຊ້ໜີບຄູ່ຕໍ່ສູ້ ຫຼື ສັດຕູເວລາເກີດອັນຕະລາຍ ແລະ ໃຊ້ຈັບອາຫານໃສ່ປາກ ອີກດ້ວຍ. ປູ ແບ່ງເປັນຫຼາຍແນວແຕກຕ່າງກັນໄປ ເພາະການຢູ່ອາໃສແຕກຕ່າງກັນເຊັ່ນ: ປູນາ, ປູຫ້ວຍ, ປູທະເລ. ປູສາມາດນໍາມາເຮັດອາຫານໄດ້ຫຼາຍຢ່າງ ເຊັ່ນ: ເອາະປູ, ແກງປູ, ດອງປູ, ນໍ້າປູ ແລະ ອື່ນໆ.

ນອກຈາກນີ້, “ປູ” ຍັງໝາຍເຖິງການເອົາແພ, ສາດ ຫຼື ແນວທີ່ເປັນແຜ່ນແພວາງຢຽດລົງພື້ນ ເພື່ອວັດຖຸປະສົງຢ່າງໃດຢ່າງນຶ່ງ ເຊັ່ນ: ປູສາດໃສ່ກາງພື້ນເຮືອນ, ປູບ່ອນນອນ (ປູຕຽງນອນ, ປູເສື່ອ ກໍວ່າ), ປູໂຕະ, ປູພາເຂົ້າ. ແຕ່ຖ້າປູພື້ນເຮືອນແມ່ນການເຮັດພື້ນເຮືອນ ດັ່ງ ປູພື້ນເຮືອນດ້ວຍກາໂລ, ປູພື້ນເຮືອນດ້ວຍ ໄມ້ແປ້ນ, ປູພື້ນເຮືອນດ້ວຍຊີມັງ ເປັນຕົ້ນ. ຄໍາວ່າ “ປູ” ກົງກັນຂ້າມກັບ ຄໍາວ່າ “ກໍ້ມ້ຽນ, ພັນມ້ຽນ”.

ປູບ່ອນນອນ (ປູເສື່ອ ກໍວ່າ), ປະສາດ, ປະໂຕະ, ປູແປ້ນ, ປູພື້ນເຮືອນ

ສະນັ້ນ ເພື່ອໃຫ້ເຂົ້າໃຈ ການນໍາໃຊ້ຄໍາດັ່ງກ່າວໃຫ້ຫຼາຍຂຶ້ນ ເຮົາມາເບິ່ງລາຍລະອຽດດັ່ງລຸ່ມນີ້:

ຄຳວ່າ “ປູ”.

“ປູ” (1. ຄໍານາມ). ສັດແນວນຶ່ງມີອອງ ຫຼື ກະດອງ ແລະ ມີກ້າມສອງກ້າມ ຫຼື ງ່າມສອງງ່າມ ມີຕີນ 8 ຕີນ. (2. ຄໍາກິລິຍາ) ເອົາຂອງເປັນແຜ່ນ ຫຼື ເປັນຜືນວາງຢຽດແຜ່ລົງກັບພື້ນ ດັ່ງ ປູສາດ.

ຕົວຢ່າງ:

• ເອາະປູ ຫຼື ໂຕປູ ບໍ່ວ່າຊິແມ່ນປູຫ້ວຍ, ປູນາ ຫຼື ປູທະເລ ກໍແຊບຄືກັນ ໂດຍສະເພາະເອາະໃສ່ຜັກ ຫອມເປ (ຫອມປ້ອມ), ຫອມປ້ອມ.
• ປູໝາກພ້າວ ເປັນປູທີ່ໃຫຍ່ທີ່ສຸດໃນໂລກໃນບັນດາປູທົ່ວໂລກອາໃສຢູ່ບົກມີນໍ້າໜັກຮອດ 17 ກິໂລ ກະລາມ ແລະ ມີລໍາໂຕຍາວຮອດ 40 ຊັງຕີແມັດ, ອາຍຸຍືນກວ່າ 60 ປີ, ສາມາດ ປີນຕົ້ນພ້າວ ແລະ ໃຊ້ຄີມເຈາະໝາກພ້າວກິນເປັນອາຫານ.
• ພະນັກງານແມ່ບ້ານຢູ່ໂຮງແຮມພາກັນປູບ່ອນນອນ ແລະ ມ້ຽນມັດເຄື່ອງຂອງຕ່າງໆ ເພື່ອລໍໄວ້ຮັບແຂກທີ່ເຂົ້າມາໃຊ້ບໍລິການ.
• ຕອນບ່າຍວານນີ້ ພາຍຫຼັງທີ່ກ່ຽວເຂົ້າຢູ່ທົ່ງນາແລ້ວ ໄດ້ພາກັນຂຶ້ນມາເອົາສາດປູ ເພື່ອນັ່ງກິນເຂົ້າ ແລະ ນອນພັກ.

ສະຫຼຸບ.

ຄໍາວ່າ “ປູ” ແມ່ໂຕປູ ຊຶ່ງເປັນສັດມີດອງ ຫຼື ອອງແນວນຶ່ງ ມີກ້າມສອງກ້າມ (ຄີມ), ມີຕີນ 8 ຕີນ ສາມາດ ນໍາມາກິນໄດ້ ບາງແນວຢູ່ທົ່ງໄຮ່ທົ່ງນາ, ບາງແນວຢູ່ຫ້ວຍ, ບາງແນວຢູ່ແຄມທະເລ. “ປູ” ຍັງແມ່ນການ ວາງສິ່ງຂອງທີ່ເປັນແຜ່ນແນວໃດແນວນຶ່ງວາງຢຽດແຜ່ລົງກັບພື້ນ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo