ອະທິບາຍຄໍາວ່າ “ບົວ” ມີຄວາມໝາຍແນວໃດ?

ຄໍາວ່າ “ບົວ” ມີຫຼາຍຄວາມໝາຍ ໃນນັ້ນໝາຍເຖິງນວນຂອງໝາກໄມ້ເປັນຕົ້ນໝາກມີ້ໜ່ວຍນຶ່ງມີບົວຫຼາຍບົວ, ໝາກທຸລຽນໜ່ວຍນຶ່ງກໍມີຫຼາຍບົວເຊັ່ນກັນ. ນອກຈາກນັ້ນ, ຍັງໝາຍເຖິງພຶດທີ່ເກີດຢູ່ນໍ້າເອີ້ນ ບົວ. ບົງມີຮາກບົວ, ຫົວບົວ, ກ້ານບົວແມ່ນຢູ່ໃນນໍ້າ ສ່ວນໃບບົວ ແລະ ດອກບົວ ແມ່ນຢູ່ຕິດ ຫຼື ເທິງນໍ້າ. ບົວມີຫຼາຍແນວດອກສີຕ່າງກັນຄື: ບົວຫຼວງ ດອກໃຫຍ່, ບົວທອງດອກຜ້ານກາງ ກ້ານຍາວ ກ້ານໃຊ້ເປັນຝັກ, ບົວແບ້ ດອກນ້ອຍ ແລະ ກ້ານກໍນ້ອຍ.

ພ້ອມນັ້ນ ຍັງເອີ້ນພືດບາງຊະນິດທີ່ມີໃບຄືກັນວ່າບົວ ບວກກັບຈຸພິເສດຂອງມັນເຊັ່ນ: ບົວບົກ ເປັນພຶດແນວນຶ່ງເກີດຕາມໂຄກເປັນຈໍາພວກຫວ້ານ, ບົວຫິມມະ. ລວມທັງ ມີການນໍາໄປປະສົມກັບຄໍາອື່ນ ແລະ ໃຫ້ຄວາມໝາຍຕ່າງອອກໄປຄື: ບົວນາງ ໝາຍເຖິງສາວສະໜົມ ຫຼື ສາວໃຊ້. ບົວມາດ ເອີ້ນຢ່າງນຶ່ງແມ່ນບົວຄໍາ (ດອກບົວຄໍາ). ບົວລອຍ ແມ່ນຊື່ເຂົ້າໜົມແນວນຶ່ງທີ່ເຮັດດ້ວຍແປ້ງປັ້ນເປັນກ້ອນນ້ອຍໆຄື ໃບບົວ. ບົວໄຫຼ ແມ່ນຮາກບົວ ຫຼື ສາຍບົວທີ່ໄປຕາມດິນ. ບົວບໍ່ຊໍ້ານໍ້າບໍ່ຂຸ່ນ ແຕ່ໄດ້ປາທັງໝົດ ໝາຍເຖິງບໍ່ເຮັດໃຫ້ໃຜເສຍໃຈແຕ່ໄດ້ປະໂຫຍດ, ບົວລະບັດ ແມ່ນການເບີ່ງແຍງເອົາໃຈໃສ່.

ບົວລະພາ ແມ່ນທິດຕາເວັນອອກ. ບົວຫົດນໍ້າ ອຸປະກອນແນວນຶ່ງໃຊ້ບັນຈຸນໍ້າ ເພື່ອຫົດຜັກ. ອີກໜຶ່ງຄວາມໝາຍແມ່ນບົວຄໍເສື້ອ ທີ່ເປັນແຜ່ນແພເພື່ອຫຍີບຕໍ່ຄໍເສື້ອໃຫ້ງາມ. ນອກຈາກນັ້ນ, ຍັງໝາຍເຖິງເຄື່ອງໃຊ້ແນວນຶ່ງເປັນທໍ່ອ່ອນຍາວ ໃຊ້ຕໍ່ນໍ້າເພື່ອອາບເອີ້ນ ບົວອາບນໍ້າ ຫຼື ຝັກບົວ. ໃນພາສາລາວ ບົວຍັງໝາຍເຖິງສີບົວ.

ສະນັ້ນ ເພື່ອໃຫ້ເຂົ້າໃຈ ການນໍາໃຊ້ຄໍາດັ່ງກ່າວໃຫ້ຫຼາຍຂຶ້ນ ເຮົາມາເບິ່ງລາຍລະອຽດດັ່ງລຸ່ມນີ້:

ຄຳວ່າ “ບົວ”.

“ບົວ” (1. ຄໍານາມ) ລັກສະນະຂອງນວນໝາກໄມ້ ເປັນຕົ້ນເອີ້ນບົວໝາກມີ້. ພືດທີ່ເກີດຢູ່ໃນນໍ້າຈໍາພວກນຶ່ງມີຫຼາຍແນວດອກສີຕ່າງກັນຄື: ບົວຫຼວງ ດອກໃຫຍ່, ບົວທອງດອກຜ້ານກາງ ກ້ານຍາວ ກ້ານໃຊ້ເປັນຝັກ, ບົວແບ້ ດອກນ້ອຍ ແລະ ກ້ານກໍນ້ອຍ, ກ້ານ ຫຼື ສາຍຄືສາຍບົວ, ແຜ່ນຜ້າຫຍີບຕໍ່ໃສ່ຄໍເສື້ອເອີ້ນ ບົວຄໍເສື້ອ. (2. ຄໍານາມ) ເປັນທໍ່ຍາວແນວນຶ່ງ ແລະ ມີປາຍໃຫຍ່ຄືດອກບົວ ເຮັດດ້ວຍວັດສະດຸແຕກຕ່າງກັນ ມີຫຼາຍຮູບແບບໃຊ້ເພື່ອອາບນໍ້າເອີ້ນບົວອາບນໍ້າ ຫຼື ຟັກບົວ. (3. ຄໍາຄູນນາມ) ເປັນສີເອີ້ນ ສີບົວ.

ຕົວຢ່າງ:

ໝາກທຸລຽນເມືອງປາກຊ່ອງຈັ່ງແມ່ນງາມ ແລະ ຫອມດີ ມີແຕ່ບົວໃຫຍ່ໆ ຂະໝາດປູກປະໄວ້ແບບທໍາມະຊາດ ຖ້າໃສ່ປຸຍແຮງຊິງາມກວ່ານີ້ຫຼາຍ.
ໝາກມີກົກນີ້ຈັ່ງແມ່ນໃຫຍ່ ບົວມີເປັນຮ້ອຍ ກິນກັນກຸ້ມໝົດບ້ານ.
ດອກບົວແມ່ນດອກໄມ້ທີ່ເກີດຢູ່ໃນຕົມແຕ່ເວລາອອກດອກແມ່ນງາມຫຼາຍ ຊຶ່ງແມ່ນດອກໄມ້ປະຈໍາຊາດຂອງປະເທດຫວຽດນາມ ແລະ ຢູ່ລາວມີນັກປະພັນໄດ້ແຕ່ງເພັງດອກບົວທອງ ເປັນເພັງທີ່ດັ່ງ ຈັດໃນເພັງອໍາມະຕະຂອງລາວ.
ບົວຄໍເສື້ອລາວຈັ່ງແມ່ນງາມ ເຂົ້າກັນກັບຊຸດຢ່າງກົມກືນ.
ຂ້ອຍໄປຊື້ບົວອາບນໍ້າຍີ່ຫໍ້ຄອດໂຕ້ຢູ່ສຸວັນນີການຄ້າ ງາມຫຼາຍ ຄິດວ່າຄືຊິກຸ້ມດົນ.
ພາສາລາວເອີ້ນ ສີບົວ ແຕ່ຖ້າພາສາໄທ ເອີ້ນສີຊົມພູ ແຕ່ເວລາເວົ້າຄິດວ່າຫຼາຍຄົນກະເຂົ້າໃຈຄືກັນ.

ສະຫຼຸບ.

ຄໍາວ່າ “ບົວ” ໝາຍເຖິງນວນໝາກໄມ້, ໝາຍເຖິງບົວທີ່ເກີດຢູ່ນໍ້າ, ໝາຍເຖິງແຜ່ນຜ້າຫຍີບຕໍ່ໃສ່ຄໍເສື້ອເອີ້ນ ບົວຄໍເສື້ອ, ໝາຍເຖິງບົວອາບນໍ້າ ຫຼື ຟັກບົວ ແລະ ໝາຍເຖິງສີບົວ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo