ຄໍາວ່າ “ຊ່ອງ” ການນໍາໃຊ້ ແລະ ຄວາມໝາຍໃນພາສາລາວ
DooDiDo
ອະທິບາຍຄໍາວ່າ “ຊ່ອງ” ໃນພາສາລາວມີຄວາມໝາຍແນວໃດ?
ຄຳວ່າ ຊ່ອງ ຖ້າຈະເວົ້າວ່າຄ້າຍຄືກັບ ຄຳວ່າ ສ່ອງ ກໍບໍ່ຜິດຫລາຍປານໃດ ເນືອງຈາກມີຄວາມຄ້າຍຄືກັນບາງຢ່າງເຊັ່ນວ່າ ຊ່ອງຄວາມໝາຍກໍຄືການທີ່ມີຊ່ອງທີ່ສາມາດເຂົ້າຜ່ານໄປໄດ້ ຫຼື ຊ່ອງທາງຕ່າງໆໃນການທີ່ຈະເຂົ້າໄປ ຫຼື ຜ່ານໄປ ບໍ່ວ່າຈະເປັນຊ່ອງຂອງເສັ້ນທາງໃນການຈະເດີນທາງໄປ ຫຼື ຊ່ອງທາງຕ່າງໆໃນການເຮັດສິ່ງໃດສິ່ງໜຶ່ງ, ອາດຈະເປັນຊ່ອງທາງໃນການເຮັດທຸລະກິດ, ຊ່ອງທາງໃນການທີ່ຈະໄດ້ວຽກ ແລະ ອື່ນໆ
ຄຳວ່າ ຊ່ອງອາດຈະແຍກໄດ້ສອງແບບ ກໍຄື ໃຊ້ໃນທາງຮູບປະທຳ ແລະ ນາມມະທຳ ທີ່ຈະພົບວ່າໄດ້ນຳໃຊ້ຕະຫລອດກໍແມ່ນ ຊ່ອງທາງໃນການເດີນທາງໄປສະຖານທີ່ຕ່າງໆ ແລະ ຊ່ອງທາງທີ່ໃຊ້ໃນການເຂົ້າເຖິງເຊັ່ນວ່າ ຊ່ອງທາງໃນການຈະໄດ້ເຂົ້າເຮັດວຽກງານໃນສະຖາບັນໃດໜຶ່ງ, ຊ່ອງທາງໃນການແກ້ບັນຫາ, ຊ່ອງທາງໃນການຫາເງິນ ແລະ ອື່ນໆ.
ສະນັ້ນ ເພື່ອໃຫ້ເຂົ້າໃຈ ການນໍາໃຊ້ຄໍາດັ່ງກ່າວໃຫ້ຫຼາຍຂຶ້ນ ເຮົາມາເບິ່ງລາຍລະອຽດດັ່ງລຸ່ມນີ້:
ຄຳວ່າຊ່ອງ
ຄຳວ່າຊ່ອງສາມາດເປັນໄດ້ແຕ່ປະເພດຄຳນາມ ທີ່ບົງບອກເຖິງ ປ່ອງ, ຮູ, ທາງ, ລະຫວ່າງ ຫຼື ບ່ອນຫວ່າງຂອງສະຖານທີ່ ທີ່ມີບ່ອນຕຶບໜາທັງສອງຂ້າງ, ແລະ ຄຳວ່າຊ່ອງນີ້ ສ່ວນຫຼາຍຈະມັກປະສົມກັບຄຳອື່ນເຊັ່ນ: ຊ່ອງແຄບ, ຊ່ອງວ່າງ, ຊ່ອງທາງ ແລະ ອື່ນໆ.
ຕົວຢ່າງ:
- ທາງນ້ຳຍາວຢູ່ລະຫວ່າງດິນ ຫຼື ເກາະດອນເຊືື່ອມຕໍ່ທະເລທັງສອງຂ້າງດັ່ງ ຊ່ອງແຄບມະລະກາ.
- ເປັນຫຍັງຈື່ງເຮັດໃຫ້ເກີດມີຊ່ອງວ່າງລະຫວ່າງເຈົ້າກັບເຂົາ.
- ເຈົ້າມີຊ່ອງທາງໃນການແກ້ໄຂບັນຫາແລ້ວບໍ່?
ສະຫຼຸບ:
ຄຳວ່າ ຊ່ອງ ມີຄວາມໝາຍເຖິງຊ່ອງທາງໃນການເດີນທາງໄປສູ່ເປົ້າໝາຍບໍ່ວ່າຈະເປັນໃນຮູບແບບ ຮູບປະທຳ ຫຼື ນາມມະທຳ ແລະ ຍັງມີຄວາມໝາຍຄ້າຍຄືກັບສ່ອງແຕ່ສາມາດເປັນໄດ້ພຽງຄຳນາມເທົ່ານັ້ນ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
