ອະທິບາຍຄໍາວ່າ “ຄ້າງ” ມີຄວາມໝາຍແນວໃດ?

ຄໍາວ່າ “ຄ້າງ” ແມ່ນໝາຍເຖິງການເອົາໄມ້ມາເຮັດຄ້າງ ຫຼື ຊັ້ງ ເພື່ອໃຫ້ເຄືອໄມ້ຂຶ້ນເຊັ່ນ: ຄ້າງໝາກຖົ່ວ, ຄ້າງໝາກອຶ, ຄ້າງໝາກບວບ, ຄ້າງໝາກນອຍ, ຄ້າງໝາກແຕງ, ຄ້າງພິກໄທ, ຄ້າງຜັກຕໍານິນ, ຄ້າງບັ້ງໄຟ ເປັນຕົ້ນ.

ນອກຈາກນັ້ນ, ຍັງໝາຍເຖິງການຕິດ, ຕິດຄ້າງ, ການຄາຢູ່ ເຊັ່ນ: ຄ້າງຄ່າເຊົ່າ ໝາຍເຖິງການຕິດໜີ້, ຄ້າງຄາ ໝາຍເເຖິງຍັງບໍ່ທັນໄດ້ສໍາລະສະສາງ, ຄ້າງໂຄກ ໝາຍເຖິງບໍ່ສາມາດລະບາຍອອກ, ຄ້າງຄືນ ໝາຍເຖິງການນອນພັກກາງຄືນຢູ່ແຫ່ງໃດແຫ່ງນຶ່ງ, ເມົາຄ້າງ ໝາຍເຖິງການດື່ມເຫຼົ້າ ຫຼື ເບຍ ເມົາຫຼາຍຮອດມື້ໃໝ່ກະຍັງເມົາຢູ່, ຕົກຄ້າງ ໝາຍເຖິງບໍ່ທັນໄປນໍາຂະບວນ ຫຼື ບໍ່ທັນລະບາຍອອກໄດ້, ຫົວຄ້າງ ໝາຍເຖິງການຫົວຫຼາຍຈົນຫາຍໃຈບໍ່ອອກ. ແຕ່ສໍາລັບຄ້າງໝໍ້ ໝາຍເຖິງເອົາໝໍ້ແກງໄປຄ້າງໃສ່ເຕົາໄຟ. ນອກຈາກນັ້ນ, ຍັງໝາຍເຖິງການທີ່ສິ່ງໃດຫນຶ່ງຢຸດຊະງັກບໍ່ເຫນັງຕີງເຊັ່ນ: ວີດີໂອຄ້າງ, ເທບຄ້າງ ເປັນຕົ້ນ.

ສະນັ້ນ ເພື່ອໃຫ້ເຂົ້າໃຈ ການນໍາໃຊ້ຄໍາດັ່ງກ່າວໃຫ້ຫຼາຍຂຶ້ນ ເຮົາມາເບິ່ງລາຍລະອຽດດັ່ງລຸ່ມນີ້:

ຄຳວ່າ “ຄ້າງ”

“ຄ້າງ” (1. ຄໍານາມ) ໄມ້ທີ່ເຮັດໃຫ້ເຄືອໄມ້ກ້ຽວຂຶ້ນ, ໄມ້ທີ່ເຮັດໄວ້ສໍາລັບເອົາສິ່ງຂອງວາງໄວ້ ດັ່ງ ຄ້າງບັ້ງ ໄຟ. (2. ຄໍາກິລິຍາ) ຕິດ, ຄາຢູ່ເທິງ, ວາງໄວ້ຂ້າງເທິງ, ແຮມ, ຮັ້ງ, ຍັງບໍ່ແລ້ວ. ຄ້າງຄາ.

ຕົວຢ່າງ:

ຄ້າງພິກໄທ ສ່ວນໃຫຍ່ຄົນນິຍົມເອົາເສົາຄອນກຼິດຂະໜາດສອງແມັດມາເຮັດ ເພາະມັນແໜ້ນໜາຖາ ວອນ ແລະ ກຸ້ມຫຼາຍປີ.
ການເຮັດຄ້າງໝາກແຕງ ສ່ວນໃຫຍ່ແມ່ນໃຊ້ໄມ້ປ່ອງມາຜ່າອອກເປັນຫຼາຍອັນ ແລ້ວເອົາໄປສານເປັນ ຕາກະໂລຫ່າງໆ ເພື່ອໃຫ້ເຄືອໝາກແຕງຂຶ້ນ.
ຄ້າງບັ້ງໄຟ ແມ່ນເຮັດຈາກການເອົາທ່ອນໄມ້ ຫຼື ໄມ້ປ່ອງມາເຮັດຄືຂັ້ນໃດ ແຕ່ໃຫຍ່ ແລະ ໜາແໜ້ນກວ່າ ເພື່ອຮັບປະກັນການຮັບນໍ້າໜັກຂອງຄົນ ເວລາເອົາບັ້ງໄຟຂຶ້ນຄ້າງ.
ປີນີ້ລາວເສັງບໍ່ໄດ້ ສະແດງວ່າຕ້ອງຄ້າງຫ້ອງ ປີໜ້າຕ້ອງໄດ້ຮຽນຫ້ອງເກົ່າ.
ວ່າຊິຂັບລົດແຕ່ນະຄອນຫຼວງວຽງຈັນ ໄປ ແຂວງຫຼວງນໍ້າທາ ລວດດຽວ ແຕ່ເມື່ອຍໂພດ ໄດ້ແວ່ນອນຄ້າງຄືນຢູ່ແຂວງອຸດົມໄຊ.
ນັກໂດດຈ້ອງ ໂດດຈ້ອງລົງມາບໍ່ຖືກເປົ້າໝາຍຄ້າງຢູ່ເທີງຕົ້ນໄມ້ ແຕ່ເຈົ້າໜ້າທີ່ກໍ່ສາມາດຊ່ວຍລົງມາດ້ວຍຄວາມປອດໄພ.

ສະຫຼຸບ.

ຄໍາວ່າ “ຄ້າງ” ໝາຍເຖິງຄ້າງໄມ້ ທີ່ເຮັດໃຫ້ເຄືອໄມ້ກ້ຽວຂຶ້ນໃຫ້ສະດວກໃນເວລາເກັບໃບ, ຍອດ ຫຼື ໝາກ. ໝາຍເຖິງການຕິດໜີ້ ການທີ່ຍັງບໍ່ໄດ້ຊໍາລະ. ການຄ້າງຄາ ແລະ ຍັງບໍ່ແລ້ວ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo