ຄໍາວ່າ “ຄັງ” ການນໍາໃຊ້ ແລະ ຄວາມໝາຍໃນພາສາລາວ
ອະທິບາຍຄໍາວ່າ “ຄັງ” ມີຄວາມໝາຍແນວໃດ?
ສະຖານທີ່ຕ່າງໆ ທີ່ເປັນບ່ອນເກັບ ຮັກສາສັບສິນ ຫລື ສັບສົມບັດ ຫລື ສິ່ງທີ່ມີຄ່າຕ່າງໆ ບໍ່ວ່າຈະເປັນເງິນທອງ, ລົດລາງພາຫະນະ ແລະ ສິ່ງຂອງອື່ນໆ ໃນນີ້ອາດຈະລວມທັງວັດຖຸທີ່ມີຄ່າຫລາຍ ຫລື ວັດຖຸທີ່ມີຄ່ານ້ອຍ ຫລື ບາງທີ່ອາດຈະບໍ່ມີຄ່າເລີຍດ້ວຍຊ້ຳ, ສະຖານທີ່ທີ່ເປັນບ່ອນເກັບມ້ຽນຮັກສາສິ່ງຂອງເຫລົ່ານີ້ ໃນພາສາລາວຈະເອື້ນວ່າ ຄັງ, ເຊິ່ງເຮົາມັກຈະໄດ້ຍິນກັນເປັນປະຈຳທົ່ວໄປ.
ນອກຈາກຄວາມໝາຍທີ່ກ່າວມາແລ້ວ, ຄຳວ່າ ຄັງ ຍັງມີຄວາມໝາຍວ່າ ທົ່ງຫຍ້າທີ່ເປັນເນີນ ຫລື ເປັນແບບເດີນທົ່ງຫຍ້າບ່ອນທີ່ສະໄໝກ່ອນ ຫລື ເຂດຫ່າງໄກຊອກຫລີກມັກໃຊ້ເປັນສະຖານທີ່ລ້ຽງງົວ, ລ້ຽງຄວາຍ, ລ້ຽງແບ້, ແລະ ສັດອື່ນໆ. ສະນັ້ນ ເພື່ອໃຫ້ເຂົ້າໃຈ ການນໍາໃຊ້ຄໍາດັ່ງກ່າວໃຫ້ຫຼາຍຂຶ້ນ ເຮົາມາເບິ່ງລາຍລະອຽດ, ໂດຍອີງຕາມຂໍ້ມູນຂອງວັດຈະນະນຸກົມພາສາລາວ ສະບັບຄົ້ນຄວ້າ ແລະ ຮຽບຮຽງ ໂດຍ ດຣ. ທອງຄໍາ ອ່ອນມະນີ ເຮົາສາມາດອະທິບາຍຄວາມໝາຍ ແລະ ວິທີການນໍາໃຊ້ສອງຄໍາສັບດັ່ງກ່າວ ໄດ້ດັ່ງນີ້:
ຄຳວ່າ ຄັງ.
ໃຊ້ເປັນຄໍານາມ ມີຄວາມໝາຍວ່າ ເຮືອນບ່ອນໃສ່ເຂົ້າຂອງ ຫຼື ສະຖານທີ່ມ້ຽນຊັບສົມບັດຂອງລັດ ຂອງຫຼວງ
ເອີ້ນວ່າ ຄັງ.
ຕົວຢ່າງ:
ຫຼານສາວຂອງຂ້ອຍເປັນພະນັກງານການເງິນ ປະຈໍາຢູ່ຄັງເງິນສົດ.
ລັດຖະບານເບີກເຄື່ອງອຸປະໂພກບໍລິໂພກໃນຄັງມາຊ່ວຍເຫຼືອປະຊາຊົນຜູ້ທີ່ໄດ້ຮັບຜົນກະທົບ
ຈາກໄພທໍາມະຊາດ.
ນອກຈາກນີ້ ຄັງ ຍັງໝາຍເຖິງ ທົ່ງຫຍ້າ, ເດີ່ນຫຍ້າບ່ອນລ້ຽງງົວຄວາຍ ເອີ້ນວ່າ ຄັງ.
ຕົວຢ່າງ:
ຕາເວັນຄ້ອຍຄໍ່າມາແລ້ວ ລູກຢ່າລືມໄປຕ້ອນງົວຄວາຍເຂົ້າຄັງເດີ້!
ສະຫຼຸບ.
ຄໍາວ່າ ຄັງ ໝາຍເຖິງ ສະຖານທີ່ເກັບມ້ຽນເຂົ້າຂອງ ຫຼື ຊັບສິນຂອງລັດ ແລະ ຄັງ ຍັງເປັນຊື່ເອີ້ນ ທົ່ງຫຍ້າ ຫຼື ເດີ່ນຫຍ້າ ບ່ອນທີ່ໃຊ້ລ້ຽງງົວລ້ຽງຄວາຍ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo