ຄໍາວ່າ “ຂໍ” ມີຄວາມໝາຍໃນພາສາລາວແນວໃດ?
ອະທິບາຍຄໍາວ່າ “ຂໍ” ມີຄວາມໝາຍແນວໃດ?
ຄໍາວ່າ “ຂໍ” ໝາຍເຖິງໄມ້ ຫຼື ສິ່ງໃດສິ່ງນຶ່ງ ທີ່ຄົດໆ ຫຼື ງໍໆ ເຊັ່ນ ຂໍເບັດ, ຂໍເກາະເສື້ອ, ໄມ້ຂໍ (ໄມ້ສ້າວ). ນອກຈາກນັ້ນ, ແມ່ນໝາຍເຖິງໃຫ້ຜູ້ອື່ນໃຫ້ໃນສິ່ງທີ່ຕົນປາດຖະໜາ ຫຼື ເວົ້າໃຫ້ຜູ້ອື່ນເຫັນໃຈ ແລະ ໃຫ້ໃນສິ່ງທີ່ຕ້ອງການເຊັ່ນ: ຂໍເງິນ, ຂໍທານ, ຂໍຄວາມເຫັນໃຈ, ຂໍໂອກາດ, ຂໍການສະໜັບສະໜູນ, ຂໍກ່າວ, ຂໍຖາມ, ຂໍຮ້ອງ, ຂໍອະທິຖານ, ຂໍພອນ, ຂໍຂໍ້ມູນ, ຂໍໃຫ້ຢູ່ດີມີແຮງ, ຂໍໃຫ້ລໍ້າລວຍ, ຂໍອະໄພ, ຂໍໂທດ, ຂໍປ່ຽນແປງ ແລະ ອື່ນໆ.
ແຕ່ກໍຍັງມີບາງຄໍາທີ່ໃຊ້ “ຂໍ” ໄປປະສົມແລ້ວມີຄວາມໝາຍຕ່າງອອກໄປເຊັ່ນ: ຂໍກະແຈ. ອີກຢ່າງນຶ່ງແມ່ນເປັນພະຍັນຊະນະລາວໂຕທີສອງ ຫຼັງໂຕ “ກໍ” (ກໍ) ແລະ ກ່ອນໂຕ “ຄ” (ຄໍ).
ສະນັ້ນ ເພື່ອໃຫ້ເຂົ້າໃຈ ການນໍາໃຊ້ຄໍາດັ່ງກ່າວໃຫ້ຖືກຕ້ອງຕາມຫຼັກໄວຍະກອນ ເຮົາມາເບິ່ງລາຍລະອຽດດັ່ງລຸ່ມນີ້:
ຄຳວ່າ “ຂໍ”.
“ຂໍ” (1. ຄໍານາມ) ໄມ້ງໍໆ ສົ້ນນຶ່ງສໍາລັບຫ້ອຍ, ແຂວນ, ເກາະ. (2. ຄໍາກິລິຍາ) ເວົ້າເພື່ອໃຫ້ຜູ້ອື່ນ ໃຫ້ສິ່ງທີ່ຕົນຕ້ອງການ. (3. ຄໍານາມ) ພະຍັນຊະນະໃນພາສາລາວໂຕນຶ່ງເອີ້ນໂຕ “ຂ” ອ່ານວ່າໂຕ ຂໍ ເປັນພະຍັນຊະນະໂຕທີສອງ ຖັດຈາກໂຕ “ກ” ອ່ານວ່າໂຕ ກໍ.
ຕົວຢ່າງ:
- ຂໍເກາະແມ່ນເອົາໄວ້ຫ້ອຍເຄື່ອງ ເພືອຕາກ ຫຼື ມ້ຽນໃຫ້ເປັນລະບຽບ. ຂໍເກົາສ່ວນໃຫຍ່ແມ່ນເຮັດຈາກພະລາສະຕິກ, ອາລຸຍມີນຽມ ແລະ ວັດສະດຸແນວອື່ນ.
- ສຸພາສິດລາວໄດ້ກ່າວໄວ້ວ່າ “ໄມ້ຄົດ ເອົາໄວ້ເຮັດຂໍ ເຫຼັກງໍ ອົາໄວ້ເຮັດກ່ຽວ. ຄົນຄົດລ້ຽວ ເອົາໄວ້ບໍ່ດີ” ໝາຍເຖິງຄົນທີ່ບໍ່ຊື່ສັດບໍ່ຄວນເຮັດວຽກນໍາ ຫຼື ຢູ່ໃກ້ ເພາະມີພິດໄພຕໍ່ເຮົາ.
- ການເຮັດກ່ຽວ ກ່ຽວເຂົ້າແມ່ນເອົາເຫຼັກມາຕີ ແລະ ດັດໃຫ້ຂໍ ຫຼື ງໍ ເຮັດໃຫ້ມີຄົມຄືກັນກັບມິດ.
- ກ່ອນອື່ນໝົດຂໍກ່າວຄໍາວ່າສະບາຍດີແຂກທີ່ມີກຽດ ງານໃນມື້ນີ້ຫາກມີແນວຂາດຕົກບົກພ່ອງ ທາງເຈົ້າ ພາບຕ້ອງຂໍໂທດ ຂໍອະໄພ ມານະຍັງທີ່ນີ້ດ້ວຍ ແລະ ຫວັງຢ່າງຍີ່ງ ວ່າບັນທ່ານຈະຢູ່ຮ່ວມງານນໍາກັນ ຈົນສຸດກົກສຸດປາຍ.
- ຄົນສ່ວນໃຫຍ່ໄປວັດໄປວາ ແມ່ນເພື່ອໄປຂໍພອນ ໃຫ້ສິ່ງທີ່ຕົນປາດຖະໜາກາຍເປັນຈິງ.
- ລາວໄດ້ເຮັດຜິດຕໍ່ແຟນຂອງລາວ ແລະ ລາວກໍໄດ້ມາງໍ້ ແລະ ຂໍໂອກາດອີກຄັ້ງໜຶ່ງ.
- ພະຍັນຊະນະລາວມີທັງໝົດ 27 ໂຕ ໃນນັ້ນ ໂຕ “ຂ” (ຂໍ) ແມ່ນໂຕທີສອງຫຼັງຈາກໂຕ “ກ” (ກໍ) ແລະ ກ່ອນໂຕ “ຄ” (ຄໍ).
ສະຫຼຸບ.
ຄໍາວ່າ “ຂໍ” ໝາຍເຖິງໄມ້ ຫຼື ສິ່ງໃດສິ່ງນຶ່ງ ທີ່ເອົາມາເຮັດໃຫ້ຂໍ ຫຼື ງໍ ເພື່ອນໍາໃຊ້. ໝາຍເຖິງການປາດຖະໜາ ສິ່ງໃດໜຶ່ງໃຫ້ເປັນໄປຕາມສິ່ງທີ່ຕົນຕ້ອງການ ແລະ ແມ່ນພະຍັນຊະນະລາວໂຕທີສອງ ຖັດຈາກໂຕ “ກ” (ກໍ) ແລະ ກ່ອນໂຕ “ຄ” (ຄໍໍ).
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo