ອະທິບາຍຄໍາວ່າ “ຄ້ານ” ມີຄວາມໝາຍແນວໃດ?

ຄໍາວ່າ “ຄ້ານ” ແມ່ນມີຫຼາຍຄວາມໝາຍນຶ່ງໃນນັ້ນໝາຍເຖິງ ຫັກ ເປັນຕົ້ນ ຕົ້ນໄມ້ຫັກລົ້ມ, ເສົາຫັກ. ໝາຍເຖິງການຕ່າວກັບຄືນ ຫຼື ຖອຍຫຼັງ ກົງກັນຂ້າມກັບການເດີນໜ້າ. ພ້ອມກັນນັ້ນ, ຍັງໝາຍເຖິງຄວາມກຽດຄ້ານ ຫຼື ຂີ້ຄ້ານ ທີ່ກົງກັນຂ້າມກັບຄວາມດຸໝັ່ນ.

ອີກຄວາມໝາຍນຶ່ງ ແມ່ນໝາຍເຖິງການຄັດຄ້ານ ຫຼື ບໍ່ເຫັນດີ ນັ້ນເອງ. ເພື່ອໃຫ້ເຂົ້າໃຈການນໍາໃຊ້ຄໍາດັ່ງກ່າວໃຫ້ດີຂຶ້ນ ແລະ ຖືກຕ້ອງເຮົາມາເບິ່ງລາຍລະອຽດດັ່ງລຸ່ມນີ້:

ຄຳວ່າ “ຄ້ານ”.

“ຄ້ານ” (1. ຄໍາກິລິຍາ) ຫັກ, ຕ່າວຄືນໂດຍບໍ່ສູ້: “ໄມ້ໂຄ່ນຄ້ານເດັຍລະດາດດອຍດົງ” (ສິນໄຊ), (2. ຄໍາກິລິຍາວິເສດ) ບໍ່ໝັ່ນ, ທໍ້ຖອຍ. ກຽດຄ້ານ, ຂີ້ກຽດ, ຄ້ານ, ແບະ, ມັກງ່າຍ, ຂີ້ຄ້ານ. (3. ຄໍາກິລິຍາ) ທ້ວງ, ຫ້າມ, ບໍ່ເຫັນດີນໍາ.

ຕົວຢ່າງ:

ໃນສະໜາມຮົບມີການສູ້ກັນຢ່າງດຸເດືອດ ແລະ ເອົາເປັນເອົາຕາຍ ໃນທ່າມການມໍລະສຸມແຫ່ງລູກປືນທະຫານເສິກຖືກແພ້ພ້ອມກັນຄ້ານ.
ໃນວັນທີ 2 ມິຖຸນາ ປີ ຄສ 2021 ພະຍຸໂຊນຮ້ອນ ສອຍຫວັ່ນ ໄດ້ເຄື່ອນທີ່ເຂົ້າໄກ້ແຂວງ ອັນໄບ ທາງຕາເວັນອອກສ່ຽງໃຕ້ຂອງເກາະລູຊອນ ປະເທດຟີລິບປີນ ຊຶ່ງທາງການປະເທດດັ່ງກ່າວໄດ້ສັ່ງອົບ ພະຍົບຜູ້ຄົນໄປຍັງທີ່ປອດໄພ ເພາະຢ້ານໄດ້ຮັບອັນຕະລາຍຈາກຝົນຕົກໜັກ ແລະ ມີລົມແຮງເຮັດຕົ້ນໄມ້ຄ້ານ, ນໍ້າຖ້ວມ ແລະ ຄື່ນທະເລສູງ.
ຍ້ອນລາວເປັນຄົນດຸໝັ່ນ ແລະ ບໍ່ໄດ້ຂີ້ຄ້ານຮຽນ ແຕ່ນ້ອຍຈົນໃຫຍ່ ຈຶ່ງເຮັດໃຫ້ລາວເສັງໄດ້ທຶນໄປຮຽນຕ່າງປະເທດ ພໍແຕ່ຈົບມາກໍໄດ້ເຂົ້າເຮັດວຽກນໍາອົງການສາກົນ ໄດ້ເງິນເດືອນຫຼາຍ ດັ່ງຕັ້ງໃຈ.
ປະຊາຊົນເກືອບທົ່ວປະເທດມຽນມາ ໄດ້ອອກມາປະທ້ວງ ຂັດຄ້ານການເຮັດລັດຖະປະຫານຂອງທະຫານ ເຮັດໃຫ້ມີການປາບປາມກັນຢ່າງນອງເລືອດ ມີການຍິງຜູ້ປະທ້ວງຕາຍຫຼາຍຮ້ອຍຄົນ ແລະ ມີຜູ້ທີ່ຄັດຄ້ານ ໄດ້ເຂົ້າຮ່ວມການຕໍ່ສູ້ຂອງກໍາລັງທະຫານຊາດຕິພັນ ຫຼື ຊົນກຸ່ມນ້ອຍ ເພື່ອຕ້ານລັດ ຖະບານ ຊຶ່ງປະຈຸບັນ ຍັງບໍ່ມີທ່າທີວ່າຈະຢຸດຕິການຂັດຄ້ານດັ່ງກ່າວ.
ເນື່ອງຈາກວ່າການດໍາເນີນໂຄງການກໍ່ສ້າງເສັ້ນທາງໃໝ່ແມ່ນສ້າງຄວາມສະດວກແກ່ການເດີນທາງ, ມີປະໂຫຍດຕໍ່ປະຊາຊົນ ແລະ ບ້ານເມືອງ ດັ່ງນັ້ນ ໃນກອງປະຊຸມໄດ້ຕົກລົງເຫັນດີເປັນເອກະສັນ ແລະ ບໍ່ມີຄົນຄັດຄ້ານ.
ໃນຫຼາຍປະເທດທີ່ມີພັກຝ່າຍຄ້ານ ເວລາປະຊຸມສະພາ ມັກມີການຄັດຄ້ານແບບເອົາຫົວຊົນຝາ ບໍ່ຟັງເຫດຜົນ ຈິ່ງເຮັດໃຫ້ມີການຖົກຖຽງ ແລະ ໃສ່ຮ້າຍປ້າຍສີກັນແບບເດັກນ້ອຍ. ສະຫຼຸບແລ້ວເຮັດໃຫ້ກອງປະຊຸມເສຍເວລາ ແລະ ໄດ້ຄຸນະພາບ ເທົ່າທີ່ຄວນ.

ສະຫຼຸບ.

ຄໍາວ່າ “ຄ້ານ” ຄວາມໝາຍການຫັກການລົ້ມຂອງຕົ້ນໄມ, ໝາຍເຖິງການຖອຍກັບຄືນ ບໍ່ເດີນໜ້າ. ນອກ ຈາກນັ້ນ, ຍັງໝາຍເຖິງຄວາມຂີ້ຄ້ານບໍ່ດຸໝັ່ນ ແລະ ອີກຄວາມໝາຍນຶ່ງໝາຍເຖິງການຄັດຄ້ານ ການບໍ່ເຫັນດີນໍາ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo