ຄໍາວ່າ “ກາ” ມີຄວາມໝາຍໃນພາສາລາວແນວໃດ?
ອະທິບາຍຄໍາວ່າ “ກາ” ມີຄວາມໝາຍແນວໃດ?
ຄໍາວ່າ “ກາ” ໃນພາສາລາວມີຫຼາຍຄວາມໝາຍທັງຄໍານາມ ແລະ ຄໍາກິລິຍາ ສໍາລັບຄໍານາມແມ່ນຊື່ຂອງ ນົກແນວນຶ່ງ ແລະ ເປັນຊື່ຂອງວັດຖຸຫຼາຍແນວພໍສົມຄວນ. ສ່ວນຄໍາກິລິຍາແມ່ນສະແດງເຖິງການໝາຍ ເຄື່ອງໃດນຶ່ງ ຫຼື ຈໍ້າກາ ເພື່ອສະແດງສັນຍາລັກໄວ້ນັ້ນເອງ. “ກາ” ຫຼື ”ໂຕກາ” ຫຼື ”ນົກກາ” ແຕ່ບູຮານ ມາໃນລາວແລ້ວ ຖືວ່າເປັນສັດອະມຸງຄຸນເປັນ ສັດທີ່ເປັນຕາຂີ້ດຽດ ເພາະເປັນສັດກີນຊາກ ຖ້າຫາກພົບ ເຫັນຫຼາຍຜິດປົກກະຕິຖືວ່າເປັນລາງບອກເຫດແນວບໍ່ດີແກ່ບ້ານເມືອງ.
“ກາ” ຫຼື ”ກາຈໍ້າ” ຫຼື ” ກາໝາຍ” ແມ່ນສີ່ງທີ່ບົ່ງບອກເຖິງສັນຍາລັກຄວາມເປັນເຈົ້າຂອງຂອງບຸກຄົນ, ບໍລິສັດ, ອົງການໃດນຶ່ງ ລວມຮອດລັດ ຖະບານ. ນອກຈາກນັ້ນ, ຄໍາວ່າ “ກາ” ຍັງເອີ້ນຊື່ສີ່ງຂອງອື່ນໆອີກເຊັ່ນ: ການໍ້າ, ໝໍ້ກາ ເປັນຕົ້ນ. ການຈະນໍາໃຊ້ຄໍານີ້ໃຫ້ຖືກຕ້ອງຕາມຫຼັກໄວຍະກອນຂອງພາສາລາວນັ້ນເຮົາຈະມາຮູ້ຈັກຄຳນີ້ນຳກັນ.
ຄຳວ່າ “ກາ”
“ກາ” (1. ຄໍານາມ) ສັດມີປີກຈຳພວກນຶ່ງ ຂົນສີດໍາ ຮ້ອງກາໆ, (2. ຄໍານາມ) ຊື່ເຄື່ອງໝາຍຮູບ (+) ຊຶ່ງຕັດມາຈາກຄໍາວ່າກາປະທະ (ຕີນກາ) (3. ຄໍານາມ) ໝໍ້ສໍາລັບຕົ້ມນໍ້າ (ເອີ້ນໝໍ້ກາ), (4. ຄໍາກິລິຍາ) ໝາຍໄວ້, ຂຽນເຄື່ອງໝາຍຢ່າງໃດຢ່າງນຶ່ງໄວ້, (5. ຄໍານາມ) ຊື່ປາແນວນຶ່ງເປັນປາມີເກັດ ເກັດສີມູມໆ ແຕ່ມົນ ແລະ ໃຫຍ່ກວ່າປາເຂັງ.
ຕົວຢ່າງ:
- ໃນສະໄໝກ່ອນຖ້າມີຝູງກາລວມຕົວກັນຮ້ອງກາໆ ຢູ່ຈຸດໃດໜຶາງ ສະແດງວ່າມີສັດຕາຍຊາກ ຢູ່ບ່ອນນັ້ນ ເຮັດໃຫ້ກາມາລຸມກີນຊາກສັດດັ່ງກ່າວ.
- ໂຕການີ້ເປັນຕາຊັງແທ້ໆ ມັນມາລັກຈັບເປັນນ້ອຍຂອງໄທບ້ານທີ່ລ້ຽງໄວ້ຢູ່ນາແຄມບ້ານໄປກີນມື້ ລະໂຕສອງໂຕ.
- ລາວຜູ້ນັ້ນຄົງຈະອາຍຸຫຼາຍປີເຕີບ ເພາະເບີ່ງໜ້າລາວມີແຕ່ຮອຍຕີນກາເຕັມເຖິງວ່າລາວຈະມັກມາ ໃຊ້ບໍລິການຢູ່ຮ້ານເສີມຄວາມງາມເລື້ອຍໆກໍ່ຕາມ.
- ເສັ້ນທາງໃນຕົວເມືອງມີຮອຍກາກະບາດ ໝາຍເຖິງຫ້າມລົດຈອດແມ່ນບໍ່ ຫຼື ມີຄວາມໝາຍແນວອື່ນ?.
- ກາເຄື່ອງໝາຍຂອງບໍລິສັດແປບຊີ ມີສີສັນງາມຫຼາຍ ເຮັດໃຫ້ຖືກຕາຖືກໃຈຂອງຜູ້ບໍລິໂພກ ແລະ ໃນສະຫຼາກໂຄງສະນາຍັງບົ່ງລາຍລະອຽດຂອງສ່ວນປະສົມ ລວມທັງຂໍ້ມູນພະລັງງານທີ່ຕ້ອງການ ໃນການບໍລິໂພກຕໍ່ວັນອີກດ້ວຍ.
- ການທີ່ຈະສົ່ງເອກະສານອອກທຸກເທື່ອຕ້ອງປະທັບກາຂາອອກຂອງບໍລິສັດ ດ້ວຍກາຈໍ້າໃຫ້ຖືກຕ້ອງ ຕາມລະບຽບການກ່ອນ ລວມທັງເກັບກໍາເຂົ້າລະບົບ ເພື່ອໃຫ້ສະດວກໃນການຕິດຕາມ.
- ຄົນສະໄໝກ່ອນ ນີຍົມຕົ້ມນໍ້າດ້ວຍກາຈົນຟົດ ເພື່ອຮັບປະກັນບໍ່ໃຫ້ມີຫີນປູນ ແລະ ພະຍາດເສຍ ກ່ອນ ແລ້ວຈິ່ງດື່ມ.
ສະຫຼຸບ.
ຄໍາວ່າ “ກາ” ມີຄວາມໝາຍຫຼາຍຢ່າງມີທັງຄໍານາມທີ່ເປັນຊື່ຂອງໂຕສັດ ແລະ ວັດຖຸສີ່ງຂອງ. ນອກຈາກ ນັ້ນ ກະຍັງເປັນຄໍາກິລິຍາ ທີ່ສະແດງເຖິງການກະທໍາທີ່ແຝງມາໃນຄວາມເປັນເຈົ້າຂອງໃນໂຕເຊັ່ນ: ຖ້າ ມີລາຍເຊັນ ແຕ່ບໍ່ຈໍ້າກາ ກໍບໍ່ມີຄວາມໝາຍ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo