ອະທິບາຍຄວາມຄືກັນ ແລະ ຕ່າງກັນ ຂອງຄຳວ່າ “ໄກ” ແລະ “ໃກ້”.

ຄຳວ່າ “ໄກ” ແລະ “ໃກ້” ພາສາລາວແມ່ນມີຄວາມໝາຍແຕກຕ່າງກັນ ແລະ ກົງກັນຂ້າມກັນ ແຕ່ການອອກສຽງຊໍ້າພັດໃກ້ຄຽງກັນ ເພື່ອນຳໃຊ້ໃຫ້ເໝາະສົມ ແລະ ຖືກຕ້ອງຕາມຫຼັກໄວຍະກອນ ວ່າເຮົາຄວນໃຊ້ເວລາໃດຈິ່ງເໝາະສົມ ແລະ ການສະກົດຄຳໃຫ້ຖືກຕ້ອງນັ້ນ ຕ້ອງໄດ້ມີຄວາມເຂົ້າໃຈຢ່າງລະອຽດສາກ່ອນ.

ການອອກສຽງໃກ້ຄຽງກັນ ໂດຍສະເພາະແມ່ນຊາວຕ່າງຊາດທີ່ເວົ້າພາສາລາວ ອາດອອກສຽງບໍ່ຖືກ ເພາະ ວ່າການອອກສຽງແມ່ນຕ່າງແຕ່ສຽງສູງກັບສຽງຕໍ່າ ອາດຈະເຮັດໃຫ້ຜູ້ຟັງເຂົ້າໃຈຄວາມໝາຍໄປຄົນລະທາງ ກັນ. ສໍາລັບຄວາມໝາຍລວມທັງການນໍາໃຊ້ແມ່ນມີດັ່ງລຸ່ມນີ້:

ຄວາມໝາຍຄຳວ່າ “ໄກ”:

“ໄກ” (1. ຄໍາຄູນສັບ ຫຼື ກິລິຍາວິເສດ) ຫ່າງ, ຍາວ, ເຫິງ, ບໍ່ໃກ້, ກົງກັນຂ້າມກັບໃກ້, (2. ຄໍານາມ) ເດືອຍ ຫຼື ບ່ອນວັ່ນຂອງອາວຸດ ຫຼື ເຄື່ອງຈັກ.

ຕົວຢ່າງ:

ການເດີນທາງຂອງຊີວິດຄົນເຮົາມັນກະປຽບເໝືອນເສັ້ນທາງອັນຍາວໄກ ທີ່ມີຄົດໂຄ້ງ ແລະ ຊື່ເປັນ ຊ່ວງໆ ໝາຍເຖິງມີທຸກມີສຸກນັ້ນເອງ ແລະ ປະສາຈາກບໍ່ໄດ້ຄວາມເຈັບໄຂ້ໄດ້ປ່ວຍນັ້ນເອງ, ສະນັ້ນ ເຮົາຈົ່ງຢູ່ຢ່າງມີຄວາມສຸກ ຢ່າໄປຍຶດຕິດກັບສີ່ງໃດໜຶ່ງ.
ການອອກຈາກບ້ານໄປຮຽນຢູ່ຕ່າງແຂວງ ເຮັດໃຫ້ໄກພໍ່ແມ່ ແຕ່ຕ້ອງໄດ້ເຂັ້ມແຂງ ແລະ ຮຽນຮູ້ສີ່ງ ໃໝ່ໆ ເຖິງຢ່າງໃດກະດີຕ້ອງໃຫ້ຫ່າງໄກ ຈາກຢາເສບຕິດ ເພາະຈະເຮັດໃຫ້ອະນາຄົດມືດມົວ.
ການເດີນທາງໄກ ດ້ວຍລົດຍົນແບບບໍ່ພັກຜ່ອນອາດເຮັດໃຫ້ອິດເມື່ອຍ ແລະ ມີຄວາມສ່ຽງໃນ ການເກີດອຸບັດຕິເຫດ ດັ່ງນັ້ນຄວນຈະພັກເປັນຊ່ວງໆ ເພື່ອໃຫ້ຮູ້ສຶກສົດຊື່ນ.

ຄວາມໝາຍຄຳວ່າ “ໃກ້”:

“ໃກ້” (1. ຄໍາຄູນສັບ ຫຼື ກິລິຍາວິເສດ) ແປະ, ມໍ່, ບໍ່ຫ່າງ, ມໍ່ໆນີ້ (2. ຄໍາຄູນນາມ) ໃກ້ຄຽງ, ຈໍ້, ຢູ່ໃກ້

ຕົວຢ່າງ:

ຊ່ວງ ໂຄວິດ-19 ລະບາດນີ້ ລັດຖະບານໄດ້ອອກແຈ້ງການບໍ່ໃຫ້ຢູ່ໃກ້ກັນ ໃຫ້ຮັກສາໄລຍະຫ່າງ ແລະ ໝັ່ນລ້າງມີດ້ວຍ ເຈວເອວກໍຫໍ (ນໍ້າເຫຼົ້າ) ເລື້ອຍໆເພື່ອຂ້າເຊື້ອພະຍາດ.
ຄວາມໝາຍຂອງບ້ານໃກ້ເຮືອນຄຽງ ບ້ານພີ່ເມືອງນ້ອງ ແມ່ນຄົນທີ່ຢູ່ໃກ້ຊິດຕິດແທດ ໄປມາຫາສູ່ ຊຶ່ງກັນ ແລະ ກັນ.
ວານນີ້ຂ້ອຍຂີ່ລົດໄປຕະຫຼາດ ປະກົດວ່າມີລົດກະບະຄັນໜຶ່ງຂີ່ມາດ້ວຍຄວາມໄວ ແລະ ໃກ້ກັບລົດ ຂ້ອຍຫຼາຍ ເຮັດໃຫ້ຂ້ອຍຕົກໃຈ ແລະ ຢຸດລົດຂ້າງທາງແບບກະທັນຫັນ.
ຍັບເຂົ້າມາໃກ້ໆ ມີຄວາມລັບຊິບອກ ຖ້າຢູ່ໄກກັນຕ້ອງໄດ້ເວົ້າແຮງ ຢ້ານຄົນອື່ນໄດ້ຍີນ.

ສະຫຼຸບ

ການນໍາໃຊ້ຄຳທັງສອງມີຄວາມໝາຍ ແລະ ການນໍາໃຊ້ແຕກຕ່າງກັນໂດຍຄຳວ່າ “ໄກ” ແມ່ນໝາຍເຖິງບໍ່ໃກ້ ຫຼື ຫ່າງອອກໄປ ເປັນຄໍາສັບກົງກັນຂ້າມກັບຄຳວ່າ “ໃກ້” ຊຶ່ງໝາຍເຖິງບໍ່ໄກ ນັ້ນເອງ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo