ຄຳວ່າ ສີມື ແລະ ຝີມື ມີຄວາມໝາຍອັນດຽວກັນບໍ່?
ອະທິບາຍຄວາມຄືກັນ ແລະ ຕ່າງກັນ ຂອງຄຳວ່າ ສີມື ແລະ ຝີມື.
ໃນພາສາລາວຫລາຍໆຄຳມີຄວາມໝາຍແຕກຕ່າງກັນ ແລະ ຫລາຍໆຄຳກໍມີຄວາມໝາຍທີ່ໃກ້ຄຽງກັນສະນັ້ນການທີ່ຈະນຳໃຊ້ໃຫ້ຖືກຕ້ອງແທ້ກໍຕ້ອງໄດ້ສືກສາລົງເລີກອີກກວ່າປົກກະຕິ, ວ່າເຮົາຄວນໃຊ້ຄຳໃດແທ້ໃນພາສາລາວ ຈິ່ງຈະເໝາະສົມ ແລະ ຈະສະກົດຄຳແບບໃດໃຫ້ຖືກຕ້ອງຕາມຫລັກໄວຍາກອນຂອງພາສາລາວ.
ໃນພາສາລາວຄຳວ່າ ສີມື ແລະ ຝີມື ມີທັງຄວາມໝາຍທີ່ແຕກຕ່າງກັນ ແລະ ມີຄວາມໝາຍຄ້າຍຄືກັນເລັກນ້ອຍ ແລະ ບາງຄວາມໝາຍສາມາດໃຊ້ແທນກັນໄດ້ ເຊິງອິງໃສ່ບາງສ່ວນຈາກວັດຈະນານຸກົມພາສາລາວມາເປັນບ່ອນອິງໃສ່ເພື່ອອະທິບາຍ ແລະ ເພື່ອທໍາຄວາມເຂົ້າໃຈຢ່າງເລິກເຊິ່ງກ່ຽວກັບຄໍາສັນນີ້ ໃຫ້ລະອຽດ.
ຄຳວ່າ ສີມື.
ສີມື ເປັນຄຳທີ່ໃຊ້ການຂຽນໃນທາງການ ໝາຍເຖິງສິ່ງທີ່ເຮັດອອກມາດ້ວຍຄວາມສາມາດ, ເຮັດໃຫ້ເຫັນ, ສ້າງສິລະປະດ້ວຍມື, ຫລື ເວົ້າໄດ້ວ່າເປັນທັກສະຄວາມສາມາພິເສດທີ່ເຮັດດ້ວຍມືໃຫ້ເຫັນເຖິງຄວາມສາມາດ ແລະ ຊຳນິຊຳນານ.
ຕົວຢ່າງ:
ສີມືຂອງການແຕ້ມຂອງເຈົ້ານີ້ງົດງາມຫລາຍ.
ນັກກິລາລາວມີສີມືໃນການຍິງທະນູດີ.
ສີມືໃນການປ່ຽນໄພ້ຂອງເຈົ້ານີ້ບໍ່ທຳມະດານໍ
ຄຳວ່າ ຝີມື.
ມີຄວາມໝາຍວ່າ ເປັນຕຸ່ມໃຫຍ່ໆ ແລະ ມີໜອງ ຢູ່ມື, ແຕ່ກໍມີຫລາຍໆຄົນຍັງໃນໃນຄວາມໝາຍດຽວກັນກັບສີມື, ເຊິງອາດຈະເປັນບາງແຂວງ ແລະ ບາງເຂດທີ່ໃຊ້ຄຳເວົ້ານີ້, ແຕ່ໃນທາງການໃນການສະກົດແລ້ວອາດຈະຍັງບໍ່ຖືກກັບຫລັກການປານໃດ.
ຕົວຢ່າງ:
ລຸງຂອງຂ້ອຍລາວເປັນຝີຢູ່ມື, ເອີ້ນວ່າຝີມື.
ຝີມືໃນການຫລິ້ນກີຕ້າຂອງຂ້ອຍນີ້ສຸດຍອດເລີຍ (ຝີມື ອາດຈະບໍ່ເປັນທາງການປານໃດໃນພາສາລາວ).
ສະຫລຸບ.
ສີມື ເປັນຄຳທີ່ໃຊ້ການຂຽນໃນທາງການ ໝາຍເຖິງສິ່ງທີ່ເຮັດອອກມາດ້ວຍຄວາມສາມາດ, ເຮັດໃຫ້ເຫັນ, ສ້າງສິລະປະດ້ວຍມື, ຫລື ເວົ້າໄດ້ວ່າເປັນທັກສະຄວາມສາມາພິເສດທີ່ເຮັດດ້ວຍມືໃຫ້ເຫັນເຖິງຄວາມສາມາດ ແລະ ຊຳນິຊຳນານ.ສ່ວນ ຝີມື ມີຄວາມໝາຍວ່າ ເປັນຕຸ່ມໃຫຍ່ໆ ແລະ ມີໜອງ ຢູ່ມື.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo