ອະທິບາຍຄວາມໝາຍຂອງຄຳວ່າ “ແຮ້ງ” ແລະ “ແຫ້ງ”.

ຄໍາວ່າ “ແຮ້ງ” ແລະ “ແຫ້ງ” ການອອກສຽງຂອງສອງຄໍາແມ່ນໃກ້ຄຽງກັນມີ ຕ່າງແຕ່ສຽງສູງສຽງຕໍ່າ. ສ່ວນຄວາມໝາຍແມ່ນແຕກຕ່າງກັນ. ຄໍາວ່າ “ແຮ້ງ” ໝາຍເຖິງໂຕແຮ້ງ ຫຼື ນົກແຮ້ງ ເປັນສັດກິນຊາກ ໃຫຍ່ກວ່າໂຕແຫຼວ ແລະ ໂຕກາ. ສ່ວນຄໍາວ່າ “ແຫ້ງ” ໝາຍເຖິງ ບໍ່ມີນໍ້າ ເຊັ່ນ: ແຫ້ງແລ້ງ, ແຫ້ງກະ ແດ້ງ, ແຫ້ງຂອດ, ແຫ້ງແຫ່ວ.

ເພື່ອໃຫ້ເຂົ້າໃຈຄວາມໝາຍຂອງການນນຳໃຊ້ໃຫ້ດີຂຶ້ນກວ່າເກົ່າ ເຮົາເບີ່ງຄວາມໝາຍ ແລະ ຕົວຢ່າງດັ່ງລຸ່ມນີ້:

ຄວາມໝາຍຄຳວ່າ “ແຮ້ງ”.

“ແຮ້ງ” (1. ຄຳນາມ) ສັດສອງຕີນຈໍາພວກນົກຕົວໃຫຍ່ ກິນສັດຕາຍ ຫຼື ຊາກສັດ. ຊື່ຂອງສັດມີປີກຕົວໃຫຍ່ແນວນຶ່ງກິນສັດຕາຍ ແລະ ຊາກສັດ ເປັນອາຫານ. ໂຕແຮ້ງ, ນົກແຮ້ງ.

ຕົວຢ່າງ:

ສຸພາສິດລາວເວົ້າວ່າ “ຕົກໝູ່ແຮ້ງເປັນແຮ້ງ ຕົກໝູ່ກາເປັນກາ” ໝາຍເຖິງເວລາເຮົາໄປຢູ່ໃສດົນການກະທໍາ ແລະ ພຶດຕິກໍາກໍ່ລ້ວນແຕ່ຄືກັນ.
ສຸພາສິດລາວເວົ້າວ່າ “ແຮ້ງຄາບມາ ກາຄາບໜີ” ໝາຍເຖິງຜູ້ນຶ່ງເອົາມາ ແຕ່ຜູ້ນຶ່ງເອົາໄປ.

ຄວາມໝາຍຄຳວ່າ “ແຫ້ງ”.

“ແຫ້ງ” (1. ຄໍານາມ) ບໍ່ມີນໍ້າ, ບໍ່ຊຸ່ມ, ບໍ່ປຽກ, ບໍ່ສົດ. ກະແດ້ງ.

ຕົວຢ່າງ:

ການເຮັດຊີ້ນແຫ້ງໄວ້ກິນ ແມ່ນເອົາຊີ້ນດິບມາປາດຍາວ ປະສົມກັບເຄື່ອງເທດ ເຊັ່ນ: ເກືອ, ແປ້ງນົວ, ໝາກເຜັດ ແລະ ອື່ນໆ ນໍາໄປຢ້າງ ຫຼື ຕາກແດດ.
ສອງສາມປີນີ້ ແມ່ນແຫ້ງແລ້ງຫຼາຍ ເຮັດໃຫ້ບໍ່ສາມາດເພາະປູກໄດ້ຕາມລະດູການ, ບັນດາເຂື່ອນ ໄຟຟ້າກໍບໍ່ສາມາດຜະລິດໄຟ ໄດ້ຕາມແຜນການ.
ລາວເປັນຄົນອອກແຮງງານໜັກ ແລະ ກິນແຕ່ຜັກ ຈິ່ງເຮັດໃຫ້ລາວຈອຍ ແລະ ແຫ້ງກະແດ້ງ.
ມື້ນີ້ແດດກ້າຫຼາຍ ຖ້າຕາກເຄື່ອງແມ່ນຄືຊິແຫ້ງດີ ກົງກັນຂ້າມກັບວານນີ້ທີ່ຝົນຕົກໝົດມື້.

ສະຫຼຸບ.

ຄຳວ່າ “ແຮ້ງ” ແລະ “ແຫ້ງ” ການອອກສຽງແມ່ນໃກ້ຄຽງກັນຕ່າງແຕ່ສຽງສູງສຽງຕໍ່າ. ຄຳວ່າ “ແຮ້ງ” ແມ່ນຊື່ຂອງໂຕນົກກິນຊີ້ນກິນຊາກຊະນິດນຶ່ງ ໂຕໃຫຍ່ກວ່າໂຕນົກອິນຊີ ແລະ ກາ. ສ່ວນຄຳວ່າ “ແຫ້ງ” ໝາຍເຖິງບໍ່ມີນໍ້າເຊັ່ນ: ແຫ້ງແລ້ງ, ແຫ້ງຂອດ ແລະ ແຫ້ງກະແດ້ງ ເປັນຕົ້ນ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo