ຄຳວ່າ “ເກີດ” ແລະ “ກໍາເນີດ” ມີຄວາມໝາຍອັນດຽວກັນບໍ່?
ອະທິບາຍຄວາມໝາຍຂອງຄຳວ່າ “ເກີດ” ແລະ “ກໍາເນີດ”.
ຄໍາວ່າ “ເກີດ” ແລະ “ກໍາເນີດ” ມີທັງຄວາມໝາຍຄືກັນ ແລະ ມີຄວາມໝາຍເປັນຢ່າງອື່ນອີກດ້ວຍ. ຄໍາວ່າ “ເກີດ” ໝາຍເຖິງສິ່ງທີ່ເກີດຂຶ້ນເຊັ່ນ: ເກີດລູກ, ກໍາເນີດ, ເກີດຂຶ້ນ, ເກີດຈາກ, ເກີດເຫດ (ບໍ່ແມ່ນກໍາເນີດເຫດ), ເກີດໄພພິບັດ (ບໍ່ແມ່ນກໍາເນີດໄພພິບັດ), ເກີດສົງຄາມ (ບໍ່ແມ່ນກໍາເນີດສົງຄາມ), ເກີດການຕໍ່ສູ້ (ບໍ່ແມ່ນກໍາເນີດການຕໍ່ສູ້). ສ່ວນຄໍາວ່າ “ກໍາເນີດ” ໝາຍເຖິງ ການເກີດ, ສີ່ງທີ່ເປັນກົກເຄົ້າເທື່ອທໍາອິດ, ການເລີ່ມຕົ້ນສີ່ງໃໝ່ຄັ້ງທໍາອິດ.
ເພື່ອໃຫ້ເຂົ້າໃຈຄວາມໝາຍຂອງການນນຳໃຊ້ໃຫ້ໃຫ້ກວ້າງຂວາງຂຶ້ນເຮົາເບີ່ງຄວາມໝາຍ ແລະ ຕົວຢ່າງ ດັ່ງລຸ່ມນີ້:
ຄວາມໝາຍຄຳວ່າ “ເກີດ”.
“ເກີດ” (1. ຄຳກິລິຍາ) ມີຂຶ້ນ, ເປັນຂຶ້ນ, ອາການທີ່ຄົນ ຫຼື ສັດອອກຈາກທ້ອງແມ່.
ຕົວຢ່າງ:
- ລາວເກີດລູກ (ກໍາເນີດລູກ) ໄດ້ອາທິດນຶ່ງແລ້ວ ແຂງແຮງທັງແມ່ທັງລູກ. ປະຈຸບັນ ບໍ່ໄດ້ນອນຢູ່ໂຮງໝໍແລ້ວ ເພາະໄດ້ກັບໄປກໍາເດືອນຢູ່ເຮືອນຂອງລາວ.
- ໄດ້ເກີດເຫດໄຟໃໝ້ຮ້ານຊັບພະສິນຄ້າ (ບໍ່ແມ່ນກໍາເນີດເຫດໄຟໃໝ້) ດີແຕ່ລະບົບປ້ອງກັນໄພຂອງ ຕຶກດັ່ງກ່າວດີ ຈິ່ງເຮັດໃຫ້ບໍ່ເສຍຫາຍຫຼາຍ.
- ໄດ້ເກີດເຫດລົດຕໍາກັນ (ບໍ່ແມ່ນກໍາເນີດເຫດຕໍາກັນ) ຢູ່ໃກ້ກັບປະຕູໄຊ ແຕ່ບໍ່ມີຄົນບາດເຈັບ ມີແຕ່ລົດເປ່ເພເລັກນ້ອຍ.
ຄວາມໝາຍຄຳວ່າ “ກໍາເນີດ”.
“ກໍາເນີດ” (1. ຄໍາກິລິຍາ) ເກີດ. (2. ຄໍານາມ) ຄວາມເກີດ, ຊື່ພະຍາດແນວນຶ່ງມັກເປັນແຕ່ເດັກນ້ອຍທີ່ເກີດໃໝ່. ກົກເຄົ້າ, ເລີ່ມຕົ້ນ.
ຕົວຢ່າງ:
- ໄດ້ມີການສັນນິຖານວ່າຄົນເຮົາກໍາເນີດມາຈາກລິງ ແລະ ເກີດມີການວິວັດທະນາການແຕກຕ່າງກັນອອກໄປ ຈຶ່ງເຮັດໃຫ້ບໍ່ຄືກັນ.
- ຕົ້ນກໍາເນີດ ຫຼື ການເກີດຂອງຈັກກະວານ ແມ່ນສັນນິຖານວ່າເກິີດຈາກການລະເບີດຄັ້ງໃຫຍ່ ຫຼື ພາສາອັງກິດເອີ້ນ Big ban.
- ລາວໃຫ້ກໍາເນີດບຸດ ເປັນຜູ້ຊາຍ ໜ້າຕາເປັນຕາແພງ ນໍ້າໜັກໄດ້ ສາມ ກິໂລກະລາມ.
- ການກໍາເນີດ ຫຼື ເກີດສັດສາຍພັນໃໝ່ສາຍພັນນຶ່ງບໍ່ແມ່ນເລື່ອງງ່າຍດາຍ ຕ້ອງໄດ້ອິງໃສ່ຫຼາຍປັດໃຈຂອງ ສະພາບແວດລ້ອມທີ່ເອື້ອຍອໍານວຍທີ່ສຸດ.
ສະຫຼຸບ.
ຄຳວ່າ “ເກີດ” ແລະ “ກໍາເນີດ” ແມ່ນຄືກັນ ແລະ ຕ່າງກັນບາງປະການ ເພາະຄຳວ່າ “ເກີດ” ແມ່ນການເກີດ, ແມ່ນເຫດທີ່ເກີດ ຫຼື ມີສິ່ງທີ່ເປັນຂຶ້ນ. ສ່ວນຄຳວ່າ “ກໍາເນີດ” ແມ່ນໝາຍເຖິງການເກີດ ແລະ ການ ມີສິ່ງໃໝ່ໆສິ່ງໃດສິ່ງນຶ່ງທີ່ບໍ່ເຄີຍມີມາກ່ອນປະກົດຂຶ້ນ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo