ຈະມາເວົ້າເຖິງ ຄໍາວ່າ “ໜຽວ” ຄວາມໝາຍໃນພາສາລາວແມ່ນຫຍັງ?
ອະທິບາຍຄໍາວ່າ “ໜຽວ” ມີຄວາມໝາຍແນວໃດ?
ຖ້າຈະເວົ້າເຖິງຄໍາວ່າ “ໜຽວ” ແລ້ວ ຫລາຍໆຄົນອາດຈະເຂົ້າໃຈດີຢູ່ແລ້ວແຕ່ຈະມາອະທິບາຍໃຫ້ແຈ້ງກ່ອນເກົ່າ ເຊິງຄຳວ່າ ໜຽວ ໝາຍເຖິງສິ່ງທີ່ຢືດຫົດໄດ້ ແລະ ຂາດຍາກ, ເປັນຢາງຕິດແນວອື່ນໄດ້ ເຊັ່ນ: ດິນໜຽວ, ແປ້ງໜຽວ, ເຂົ້າໜຽວ, ເຊືອກໜຽວ, ໜັງຄວາຍໜຽວໆ, ຢາງຢືດໜຽວ, ປູນແຫຼວ, ກາວ, ທາດໜຽວ, ນໍ້າມັນກະແລັດ, ກວນໝາກໄມ້, ຢາງໄມ້, ຕັງ, ຢາງພາລາ, ຢາງຕີນລົດ ເປັນຕົ້ນ.
ນອກຈາກນັ້ນ, ຍັງໝາຍເຖິງໝັ້ນ ຫຼື ໝັ້ນຄົງ ເຊັ່ນ: ໜັງໜຽວ, ໜຽວແໜ້ນ, ໝັ້ນໜຽວ ແລະ ອື່ນໆ. ພ້ອມນັ້ນ ຍັງມີຄໍາວ່າຂີ້ໜຽວ ຊຶ່ງ ໝາຍເຖິງຂີ້ຖີ່ ບໍ່ມັກເອົາຂອງຕົນເອງມີໃຫ້ຜູ້ອື່ນ.
ສະນັ້ນ ເພື່ອໃຫ້ເຂົ້າໃຈ ການນໍາໃຊ້ຄໍາດັ່ງກ່າວໃຫ້ຫຼາຍຂຶ້ນ ເຮົາມາເບິ່ງລາຍລະອຽດດັ່ງລຸ່ມນີ້:
ຄຳວ່າ “ໜຽວ”.
“ໜຽວ” (1. ຄໍາກິລິຍາ) ດຶງຂາດຍາກ, ເປັນຢາງຕິດແນວອື່ນໄດ້, ໝັ້ນ.
ຕົວຢ່າງ:
- ເຂົ້າໜຽວ ເປັນອາຫານປະຈໍາຊາດລາວ ແຕກຕ່າງຈາກເຂົ້າຈ້າວ ເພາະເຂົ້າໜຽວເວລາໜຶ້ງແມ່ນຈະ ໜຽວຕິດກັນສາມາດປັ້ນໄດ້ ຫຼື ນໍາມາເຮັດເຂົ້າຕົ້ມກໍໜຽວຕິດກັນ ເຊັ່ນກັນ.
- ຢາງພາລາແມ່ນໜຽວ ແລະ ສາມາດຫົດຢືດໄດ້ ມີປະໂຫຍດຫຼາຍແນວ ມີການນໍາໄປແປຮູບ ແລະ ນໍາໃຊ້ໃນວົງການອຸດສາຫະກໍາຢ່າງກວ້າງຂວາງ ເຊັ່ນ: ຕີນລົດ, ເສື່ອນອນ, ໝອນ, ເກີບ, ຖົງມື, ຢາງຢືດ, ຢາງຮອງພຶ້ນ, ຖົງຫີ້ວ ແລະ ອື່ນໆ.
- ຕັງ ເປັນຢາງໄມ້ຊະນິດນຶ່ງທີ່ໜຽວ ປະຊາຊົນ ເອົາໃຊ້ຕິດນົກປ່າ ເພື່ອນໍາມາເປັນອາຫານ.
- ກາວຕິດໜູ ຈັ່ງແມ່ນໜຽວດີ ຖ້າຕິດມືກໍລ້າງອອກຍາກເຊັ່ນກັນ ດັ່ງນັ້ນຄວນເກັບເອົາໄວ້ໄກໆເດັກ ນ້ອຍ ເພາະຢ້ານເຂົາຫຼີ້ນ.
- ຄົນສະໄໝກ່ອນນິຍົມກັນສັກຢັນ, ສັກລາຍ ສັກມຶກ ເພື່ອໃຫ້ໜັງໜຽວ ເວລາອອກທັບຈັບເສີກ ຈິ່ງ ເຮັດມີຄວາມໝັ້ນໃຈ ແລະ ບໍ່ຢ້ານກົວຕໍ່ສັດຕູ.
- ສອງຄອບຄົວນັ້ນ ຈັ່ງແມ່ນຮັກກັນໜຽວແໜ້ນ ແລະ ສະໜິດສະໜົມກັນດີ ມີຫຍັງກໍແບ່ງປັນກັນກິນ ໄປງານທາງໃດກໍໄປນໍາກັນ.
ສະຫຼຸບ.
ຄໍາວ່າ “ໜຽວ” ໝາຍເຖິງສິ່ງທີ່ດຶງຂາດຍາກ, ໝາຍເຖິງສິ່ງທີ່ເປັນຢາງຕິດແນວອື່ນໄດ້ ພ້ອມນັ້ນຍັງໝາຍ ເຖິງໝັ້ນ, ຫຼື ໝັ້ນຄົງ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo