ຄຳວ່າ “ມານ” ແລະ “ມ້ານ” ມີຄວາມໝາຍອັນດຽວກັນບໍ່?
ອະທິບາຍຄວາມຂອງຄຳວ່າ “ມານ” ແລະ “ມ້ານ”.
ຄໍາວ່າ “ມານ” ແລະ “ມ້ານ” ເຖິງການອອກສຽງຈະໃກ້ຄຽງກັນຕ່າງພຽງແຕ່ສຽງສູງຕໍ່າ ແຕ່ຄວາມໝາຍ ແມ່ນແຕກຕ່າງກັນຄົນລະແນວ.
ຄໍາວ່າ “ມານ” ໝາຍເຖິງສິ່ງທີ່ຢູ່ກົງກັນຂ້າມກັບພະເຈົ້າ, ເທວະດາ ຫຼື ສິ່ງທີ່ດີທີ່ປົກປ້ອງຜູ້ຄົນ ແລະ ກົງກັນຂ້າມກັບຄວາມດີ ຊຶ່ງສ່ວນ ໃຫຍ່ມັກເອີ້ນວ່າ ເປັນຍັກເປັນມານ, ມານຮ້າຍ, ນາງມານ, ມານຍາ. ນອກຈາກນັ້ນ, ຍັງໝາຍເຖິງການມານລູກຂອງຄົນ ຫຼື ສັດ ລວມທັງພຶດຈໍານວນນຶ່ງເຊັ່ນ: ມານລູກໄດ້ສາມເດືອນ, ມານທາງ, ສາລີສອງມານ, ເຂົ້າມານສົ່ງກີ່ນຫອມທົ່ວທົ່ງນາ.
ຄໍາວ່າ “ມ້ານ” ໝາຍເຖິງບໍ່ມີສີ, ຈຶດຈາງ ເຊັ່ນ: ອາບນໍ້າຈົນສົບມ້ານ, ເດັກນ້ອຍເກີດໃໝ່ຈະໂຕມ້ານ, ບໍ່ກີນເຂົ້າຫຼາຍມື້ໜ້າຈຶດໜ້າມ້ານໝົດແລ້ວ. ນອກຈາກນັ້ນ ເມື່ອນຳໄປບວກກັບຄໍາອື່ນກໍເຮັດໃຫ້ມີຄວາມໝາຍເປັນຢ່າງອື່ນໄດ້ເຊັ່ນກັນຄື: ມ້ານຕາ, ຜ້າມ້ານ ເປັນຕົ້ນ.
ເພື່ອໃຫ້ເຂົ້າໃຈຄວາມໝາຍຂອງການນນຳໃຊ້ໃຫ້ຖືກຫຼາຍຂຶ້ນ ເຮົາເບີ່ງຄວາມໝາຍ ແລະ ຕົວຢ່າງ ດັ່ງລຸ່ມນີ້:
ຄວາມໝາຍຄຳວ່າ “ມານ”.
“ມານ” (1. ຄຳນາມ) ສີ່ງມາຂັດຂວາງບໍ່ໃຫ້ເຖິງຄວາມດີທີ່ຕົນປະສົງ, ເທວະດາພວກນຶ່ງ. ຜີ, ຜີສາງ. (2. ຄຳກິລິຍາ) ມີລູກ, ອາການທີ່ລູກມາເກີດໃນທ້ອງ, ຮຽກຮວງເຂົ້າສາລີ ຫຼື ຝັກເຂົ້າສາລີວ່າ ມານນຶ່ງ ສອງມານ.
ຕົວຢ່າງ:
- ໜັງຈີນບູຮານ ຝ່າຍທໍາມະ ເປັນຝ່າຍຄົນດີ ແລະ ອະທໍາ ຫຼື ຝ່າຍມານ (ພັກມານ) ຊຶ່ງມັກໃຊ້ວິຊາມານ ໃນການຂ້າຄົນ. ແຕ່ບາງເລື້ອງພັກມານກໍມີຄົນດີຢ່າງຫຼວງຫຼາຍ ທີ່ຖືກຝ່າຍທໍາມະໃສ່ຮ້າຍ
- ມະນຸດເຮົາມານລູກໃຊ້ເວລາປະມານເກົ້າເດືອນ ຈິ່ງເກີດ ຫຼື ຄອດ ອອກມາ ແຕກຕ່າງຈາກລິງ ຊຶ່ງໃຊ້ເວລານ້ອຍກວ່າຄົນ.
- ແມ່ມານສ່ວນໃຫຍ່ມັກອາລົມບໍ່ດີບໍ່ມີເຫດຜົນ ອາລົມຂຶ້ນໆ ລົງໆ ຢາກກິນຫັ້ນກິນນີ້ ກິນຈຸກຈິກ ແຕ່ມີສ່ວນນຶ່ງ ກໍມີເຫດຜົນເວົ້າຈາອ່ອນຫວານ ໂດຍລວມແລ້ວແມ່ນແຕກຕ່າງກັບຕອນບໍ່ທັນມານລູກ.
- ເວລາເຂົ້ານາມານ ຈະຂຽວທົ່ວທົ່ງນາ ແລະ ສົ່ງກີ່ນຫອມຫວນໄປທົ່ວບໍລິເວນດັ່ງກ່າວ ຜູ້ຄົນກາຍໄປກາຍມາມັກສູດລົມຫາຍໃຈແບບມີຄວາມສຸກ.
- ແມ່ຄ້າຂາຍສາລີຮ້ອງໃສ່ລູກຄ້າ “ສາລີໜຶ້ງຮ້ອນໆເດີນຶ່ງມັດ 10 ມານ ພຽງແຕ່ 5 ພັນກີບ” ຊື້ຊ່ວຍແດ່.
ຄວາມໝາຍຄຳວ່າ “ມ້ານ”.
“ມ້ານ” (1. ຄໍາຄູນສັບ ຫຼື ກິລິຍາວິເສດ) ບໍ່ມີສີ, ສີຈາງໄປ, ສີຂາວໆ, ສີກໍ່າແຫຼ້ເຂົ້າກະທັນຫັນ, ເຫຼືອກຂຶ້ນ (ສໍາລັບຕາ). ຊິດ, ຊິດຂາວ, ໜ້າເຫຼືອງກໍ່າ. (2. ຄໍານາມ) ຊີ້ນສຸກໆດີບໆ, ຊີ້ນບໍ່ສຸກປານໃດ,
ຕົວຢ່າງ:
- ເດັກນ້ອຍອາບນໍ້າແຕ່ເຊົ້າຈົນແລງ ຜູ້ໃດກໍສົບມ້ານ ໄປບອກໃຫ້ເຂົາເຊົາສາ ຈັກນ້ອຍຊິເປັນໄຂ້ເປັນຫວັດ ມື້ໜ້າຈິ່ງໃຫ້ອາບໃໝ່.
- ລາວເກີດອຸບັດຕິເຫດ ຕົກລົດຈັກ ໂຕມ້ານເຂົ້າມ້ານເຂົ້າ ຫຼັັງຈາກນັ້ນ ມີຄົນມາປະຖົມພະຍາບານໃຫ້ລາວ ຈິ່ງດີຂຶ້ນຕາມລໍາດັບ ຈົນລົດພະຍາບານມາຮັບໄປໂຮງໝໍ.
- ວານນີ້ລາວເປັນວິນຕາມ້ານເປັນເທື່ອ ຈັ່ງແມ່ນໜ້າເປັນຫ່ວງ ແຕ່ມື້ນີ້ຊໍ້າພັດແຂງແຮງ ຄືບໍ່ມີຫຍັງ ເກີດຂຶ້ນ.
- ໄປກິນເຂົ້າປ່າວານນີ້ ໝູ່ເຮັດມ້ານຊີ້ນງົວ ຈໍ້າແຈ່ວເພ້ຍ ກິນແລ້ວແຊບແທ້ແຊບວ່າ ຍັງຕິດໃຈຢູ່ ມື້ໜ້າຊິບອກໝູ່ມາເຮັດໃຫ້ກິນອີກ.
ສະຫຼຸບ.
ຄຳວ່າ “ມານ” ໝາຍເຖິງຝ່າຍອະທໍາ ແລະ ກົງກັນຂ້າມກັບຄວາມດີ. ໝາຍເຖິງການຖືພາຂອງຄົນ, ສັດ ແລະ ພຶດບາງຊະນິດເຊັ່ນ: ເຂົ້າ, ສາລີ. ສ່ວນຄຳວ່າ “ມ້ານ” ໝາຍເຖິງສີຈຶດຂາວ ຫຼື ຈຶດແຫຼ້ ເຂົ້າກະທັນ ຫັນ ຈາກການເຈັບເປັນ ຫຼື ຖືກການກະທົບກະແທກ ລວມທັງການອາບນໍ້າເປັນເວລາດົນຂອງຄົນເຮົາ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo