ຄຳວ່າ “ພູ” ແລະ “ຜາ” ມີຄວາມໝາຍອັນດຽວກັນບໍ່?
ອະທິບາຍຄວາມຂອງຄຳວ່າ “ພູ” ແລະ “ຜາ”.
ຄໍາວ່າ “ພູ” ແລະ “ຜາ” ໃນຄວາມເປັນຈິງແລ້ວແມ່ນມີຄວາມສໍາພັນກັນ ແລະ ມີແນວແຕກຕ່າງກັນອອກໄປເຊັ່ນກັນ ເພາະຄໍາວ່າ “ພູ” ແມ່ນຫີນ ຫຼື ດິນທີ່ສູງຂຶ້ນຫຼາຍ ຫຼື ມີທັງດິນ ຫີນຜາ (ຫີນປູນ) ທີ່ສູງໃຫຍ່ປົນຢູ່ນໍາກັນ ພູໜ່ວຍນຶ່ງແມ່ນມີຕົ້ນໄມ້ໃບຫຍ້າ ແລະ ມີຜາຫຼາຍໜ່ວຍກໍມີ.
ສ່ວນຄໍາວ່າ “ຜາ” ໝາຍເຖິງຫີນປູນກ້ອນໃຫຍ່ຈົນສູງສຽດຟ້າ ນັ້ນເອງ. ເມື່ອສອງຄໍາດັ່ງກ່າວມາຕໍ່ກັນ ໂດຍທົ່ວໄປເຮົາເອີ້ນວ່າ “ພູຜາ” ໝາຍເຖິງພູທີ່ເປັນຫີນປູນທີ່ສູງໃຫຍ່ ຊຶ່ງຢູ່ລາວມີພູຜາຫຼາຍໜ່ວຍທີ່ມີຊື່ສຽງເປັນຕົ້ນ: ຜາແດງ ໜອງຂຽວ ເມືອງງອຍ ແຂວງຫຼວງພະບາງ, ຜາເງິນ ເມືອງວັງວຽງ ແຂວງວຽງຈັນ, ຜາຕັ້ງ ວັງວຽງ ເມືອງວັງວຽງ ແຂວງວຽງຈັນ, ພູຜາມ່ານ ຕັ້ງຢູ່ເມືອງຄູນຄຳ ແຂວງຄຳມ່ວນ ແລະ ແຫ່ງອື່ນໆ.
ເພື່ອໃຫ້ເຂົ້າໃຈຄວາມໝາຍຂອງການນນຳໃຊ້ໃຫ້ດີຂຶ້ນກວ່າເກົ່າ ເຮົາເບີ່ງຄວາມໝາຍ ແລະ ຕົວຢ່າງດັ່ງລຸ່ມນີ້:
ຄວາມໝາຍຄຳວ່າ “ພູ”.
“ພູ” (1. ຄຳນາມ) ຫີນ ຫຼື ດິນທີ່ສູງຂຶ້ນກວ່າທໍາມະດາຫຼາຍ, ດອຍ, ຜາ. (2. ຄຳນາມ) ເຈົ້າແຜ່ນດິນ, ພຣະຣາຊາ (ປ. ພູທຣ. ພູເບສຣ. ພູວະນາຖ). (3. ຄຳນາມ) ດິນ, ແຜ່ນດິນ, ໂລກ (ປ) ພູທອນ. ພູບານ. ພູເບດ. ພູວະນາດ. ພູມີ. (4. ຄຳນາມ) ໄມ້ເຄືອແນວນຶ່ງໃຊ້ໃບຄ້ຽວກັບໝາກ.
ຕົວຢ່າງ:
- ພູເບ້ຍເປັນພູທີ່ສູງທີ່ສຸດໃນປະເທດລາວ ຕັ້ງຢູ່ເມືອງອານຸວົງ, ແຂວງໄຊສົມບູນ ເປັນພູທີ່ອຸດົມສົມບູນໄປດ້ວຍ ຊັບໃນດິນສິນໃນນໍ້າ ມີປ່າໄມ້, ສັດນາໆຊະນິດ, ມີທິວທັດທີ່ງົດງາມ ຊຶ່ງປະຈຸບັນແມ່ນກໍາລັງເປັນທີ່ນິຍົມຂອງການທ່ອງທ່ຽວໃນລາວອີກແຫ່ງນຶ່ງ.
- ປະເທດລາວມີພູກວມເອົາເນື້ອທີ່ສ່ວນໃຫຍ່ ໂດຍສະເພາະແມ່ນແຂວງພາກເໜືອ ຊຶ່ງເຮັດໃຫ້ການ ຄົມມະນາຄົມແມ່ນມີຄວາມຫຍຸ້ງຍາກຫຼາຍ.
ຄວາມໝາຍຄຳວ່າ “ຜາ”.
“ຜາ” (1. ຄໍານາມ) ຫີນ, ພູຫີນທີ່ຊັນ ແລະ ບໍ່ມີຕົ້ນໄມ້.
ຕົວຢ່າງ:
- ຜາຕັ້ງວັງວຽງ ເປັນຜາໜ່ວຍດຽວຕັ້ງສູງສະຫງ່າ ແລະ ງົດງາມ ຢູ່ໃຈກາງການອ້ອມຮອບຂອງ ພູຜາອື່ນ ແລະ ມີນໍ້າຊອງໃຫຼລຽບແຄມຕີນຜາເບື້ອງໜ້າ ສ່ວນເບື້ອງຫຼັງແມ່ນທົ່ງນາຂອງປະຊາຊົນ.
- ຜາບ່ອງເປັນຜາທີ່ງົດງາມ ແຕ່ປະຈຸບັນແມ່ນຖືກລະເບີດ ໄປຜະລິດເປັນຊີມັງ ເພື່ອຮັບໃຊ້ໃນການ ສ້າງສາບ້ານເມືອງ.
- ຜາແດງ ຕັ້ງຢູ່ບ້ານໜອງຂຽວ ເມືອງງອຍ ແຂວງຫຼວງພະບາງ ແຄມແມ່ນໍ້າອູ ເປັນສະຖານທີ່ທ່ອງທ່ຽວທີ່ດັງອີກແຫ່ງນຶ່ງ ມີນັກທ່ອງທ່ຽວມັກປີ່ນໄຕ່ຂຶ້ນໄປຖ່າຍຮູບ ເພາະມີທັດສະນີຍະພາບ ໜ້າຫຼົງໄຫຼ ຫຼາຍຄົນໄປແລ້ວກະຢາກໄປອີກ.
ສະຫຼຸບ
ຄຳວ່າ “ພູ” ແລະ “ຜາ” ແມ່ນມີຄວາມສໍາພັນກັນ ເພາະພູແມ່ນດິນ, ຫິນ ສູງຂຶ້ນຫຼາຍ ໃນພູໜ່ວຍນຶ່ງອາດບໍມີຜາ ຫຼື ມີຜາໜ່ວຍນຶ່ງ ຫຼື ຫຼາຍໜ່ວຍກໍມີ. ສ່ວນຜາແມ່ນຫີນປູນກ້ອນໃຫຍ່ຕັ້ງຢູ່ໜ່ວຍດຽວ ຫຼື ເປັນກຸ່ມກະມີ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
