ອະທິບາຍຄຳວ່າ ”ຄ່າ” ແລະ ”ລາຄາ” ທີ່ຄວາມຄືກັນ ແລະ ແຕກຕ່າງກັນ.

ຄຳວ່າ ”ຄ່າ” ແລະ ”ລາຄາ” ເປັນຄຳທີ່ມີຄວາມໝາຍບາງຢ່າງຄ້າຍຄືກັນ, ສິ່ງທີ່ມີຄ່າກໍຕ້ອງມີລາຄາແພງ ຫລາຍໆຄັ້ງທີ່ການໃຊ້ສອງຄຳນີ້, ຄວາມໝາຍສ່ວນຫລາຍກໍຄ້າຍຄືກັນ ເຊັ່ນວ່າ ເສື້ອໂຕນີ້ລາຄາທົ່າໃດ, ເຮົານີ້ເປັນຮູບພໍ່ຂອງຂ້ອຍໃນສະໄໝກ່ອນ ເຊິ່ງມີຄ່າຫລາຍສຳລັບຂ້ອຍ, ທຸກໆຄຳເວົ້າໃນພາສາລາວຂອງເຮົາຍັງມີອີກຫຼາກຫຼາຍຄຳສັບທີ່ມີຄວາມໝາຍຄ້າຍຄືກັນ ແຕ່ບໍ່ແມ່ນອັນດຽວກັນ ຈື່ງອາດພາໃຫ້ເກີດເປັນຈຸດອ່ອນໃນການໃຊ້ຄຳສັບ ຫຼື ການໃຊ້ສື່ສານກັນໃນຊີວິດປະຈຳວັນ ເພາະຖ້າຫາກເຮົາສື່ສານກັນໂດຍການນຳໃຊ້ຄຳສັບ ຫຼື ຖ້ອຍຄຳທີ່ບໍ່ຖືກຕ້ອງຕາມຈຸດປະສົງທີ່ເຮົາຕ້ອງການກໍ່ສາມາດເຮັດໃຫ້ຄູ່ສົນທະນາເຂົ້າໃຈໄປໃນຄວາມໝາຍທີ່ແຕກຕ່າງກັນອອກໄປ.

ບົດນີ້ຈື່ງຈະຍົກເອົາ ຄຳວ່າຄ່າ ແລະ ລາຄາ ມາອະທິບາຍ, ເພາະສອງຄຳນີ້ບາງຄົນອາດຄິດວ່າເປັນຄວາມໝາຍອັນດຽວກັນກໍ່ເປັນໄດ້ ໂດຍສະເພາະແມ່ນຄົນຕ່າງຊາດທີ່ມາທ່ຽວ ຫຼື ອາໃສຢູ່ລາວທີ່ອາດຍັງບໍ່ເຂົ້າໃຈໃນຄຳເວົ້າ ແລະ ຄວາມໝາຍຂອງທັງສອງຄຳນີ້, ດັ່ງນັ້ນມື້ນີ້ເຮົາຈະມາລົງລຶກເຖິງສອງຄຳນີ້ວ່າມັນມີຄວາມໝາຍທີ່ຄ້າຍຄືກັນ ແລະ ແຕກຕ່າງກັນຄືແນວໃດ.

ຄຳວ່າ ”ຄ່າ”.

ເປັນຄຳນາມ : ໝາຍເຖິງການປຽບທຽບລະຫວ່າງວັດຖຸສິ່ງຂອງກັບຊັບສິນ ຫຼື ເງິນເພື່ອໃຫ້ໄດ້ຕາມຄວາມຕ້ອງການ ແລະ ຄວາມເໝາະສົມໃນການປຽບທຽບ, ນອກຈາກນີ້ຍັງສາມາດໃຊ້ໄດ້ກັບການປຽບທຽບໃສ່ກັບຈິດໃຈຂອງຄົນເຮົາໄດ້ອີກດ້ວຍ.

ນ. ລາຄາ, ຄຸນປະໂຫຍດຂອງສິ່ງໃດສິ່ງໜຶ່ງ ເອີ້ນຄ່າ ເຊັ່ນ ຄ່າເສື້ອ, ຄ່າຜ້າ, ຄ່ານາ … ຢ່າງວ່າ “ຂອງດີມີຄ່າ ຢາດີມີຄຸນ” (ພາສິດ).
ວ. ທໍ່, ມີສ່ວນຍາວທໍ່ກັນ, ມີສ່ວນສັ້ນ ຫຼືຍາວພຽງກັນ ເອີ້ນຄ່າກັນ, ທໍ່ກັນ, ເຊັ່ນ ຍາວຄ່າວາ, ຍາວຄ່າສອກ.

ຕົວຢ່າງ :

ຮູບໃບນີ້ມັນມີຄຸນຄ່າຫຼາຍກັບຈິດໃຈຂອງຂ້ອຍ
ເຮືອນຫຼັງນີ້ ກັບ ດິນຕອນນັ້ນຈັ່ງໃດກະມີຄ່າຊ່ຳໆກັນນັ້ນລະ.
ການທີ່ໄດ້ຮັບໂອກາດໃນການເຮັດວຽກຄັ້ງນີ້ມັນມີຄຸນຄ່່າຫຼາຍກັບຊີວິດຂ້ອຍ.

ຄຳວ່າ ”ລາຄາ”

ໝາຍເຖິງວັດຖຸສິ່ງຂອງ, ສິນຄ້າ ແລະ ບໍລິການທີ່ຄິດເປັນລາຄາ, ເພາະລາຄາເປັນສິ່ງທີ່ກຳນົດມູນຄ່າຂອງຜະລິດຕະພັນ ແລະ ຍັງກຳນົດຜົນຈາກການດຳເນີນທຸລະກິດຂອງເງິນຕາ ທີ່ໃຊ້ເຂົ້າໃນການແລກປ່ຽນຊື້-ຂາຍຜະລິດຕະພັນ ເຊີ່ງເປັນຈຳນວນເງິນທີ່ຜູ້ຊື້ເຕັມໃຈທີ່ຈະຊຳລະ ແລະ ຜູ້ຂາຍກໍເຕັມໃຈທີ່ຈະຂາຍໃນລາຄາດຽວກັນ.

ຕົວຢ່າງ:

ລົດຄັນນີ້ຂ້ອຍຊື້ມາໃນລາຄາ 2,000,000 ກີບ.
ຮ້ານເສີມສວຍຮ້ານນີ້ ບໍລິການສະຜົມຜູ້ຍິງລາຄາພຽງແຕ່ 10,000 ກີບຕໍ່ຄັ້ງ.
ເສື້ອຜືນນີ້ລາຄາເທົ່າໃດ?

ສະຫຼຸບ.

ຄຳວ່າຄ່າ ແລະ ລາຄາ ນັ້ນມັນມີຄວາມກ່ຽວຂ້ອງ ຫຼື ຕໍ່ເນື່ອງກັນໃນການໃຊ້ຊັບພາສາລາວ ດັ່ງນັ້ນກ່ອນທີ່ເຮົາຈະໃຊ້ຄຳສັບໃນການສົນທະນາຈື່ງຄວນໄຈ້ແຍກກ່ອນວ່າຄວນນຳໃຊ້ຄຳໃດ, ໃນກໍລະນີໃດ ເພາະທັງສອງຄຳນີ້ຖ້າເຮົານຳມາໃຊ້ໄປໃນທາງທີ່ບໍ່ຖືກຕ້ອງ ມັນສາມາດເຮັດໃຫ້ຄວາມໝາຍແຕກຕ່າງອອກຈາກຈຸດປະສົງທີ່ເຮົາຕ້ອງການໄດ້.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ ເວົ້າລາວກັນ