ອະທິບາຍຄວາມໝາຍຂອງຄຳວ່າ “ຄົ້ວ” ແລະ “ຄວ້າ”.

ຄໍາວ່າ “ຄົ້ວ” ແລະ “ຄວ້າ” ເຖິງວ່າການອອກສຽງຈະຕ່າງກັນເລັກນ້ອຍເພາະຄໍານຶ່ງມີໂຕ “ວ” ມາຄວບ ແຕ່ຄວາມໝາຍຊໍ້າພັດຄືກັນ. ການອອກສຽງນັ້ນຈະອອກສຽງຄວບ ຫຼື ບໍ່ແມ່ນຂຶ້ນກັບສໍານຽງບາງທ້ອງຖີ່ນ ທາງດ້ານຫຼັກໄວຍະກອນແມ່ນສາມາດໃຊ້ໄດ້ທັງສອງ ແລ້ວແຕ່ຖະນັດ ແລະ ສໍານານ.

ຄໍາວ່າ “ຄົ້ວ” ຫຼື “ຄວ້າ” ໝາຍເຖິງການຍື່ນແຂນອອກໄປຈັບເອົາແບບໄວໆ ຫຼື ແຍ່ງຊິງເອົາແບບບໍ່ທັນຕັ້ງໂຕ ເປັນຕົ້ນ ຄວ້າໄດ້ຄວ້າເອົາ ໝາຍເຖິງໃຜຈັບໄດ້ຈັບເອົາ, ເອົາມືຄວ້າເອົາ ໝາຍເຖິງເອົາມືຈັບເອົາ, ຄົ້ວມືໄວ້ ໝາຍເຖິງຈັບມືໄວ້, ໄຂວຄວ້າ ໝາຍເຖິງການໄຝ່ຝັນຫາ, ຄວ້າຝັນ ໝາຍເຖິງເຮັດໃຫ້ຄວາມຝັນເປັນຈິງ ຫຼື ເຮັດໃຫ້ສິ່ງທີ່ຄິດເປັນຈິງ, ຄວ້າລາງວັນ ໝາຍເຖິງໄດ້ຮັບຊະນະເລີດ ແລະ ໄດ້ລາງວັນ ເປັນຕົ້ນ. ນອກຈາກນັ້ນ, ເມື່ອນໍາໄປຄວບກັບຄໍາອື່ນສາມາດເຮັດໃຫ້ຄວາມໝາຍຫຼາກຫຼາຍອອກໄປເຊັ່ນ: ຄົ້ນຄວ້າ ໝາຍເຖິງຊອກຫາສິ່ງໃດນຶ່ງໃຫ້ເຂົ້າໃຈເລິກເຊິ່ງ ຫຼື ວິໃຈສິ່ງໃດນຶ່ງ.

ເພື່ອໃຫ້ເຂົ້າໃຈຄວາມໝາຍຂອງການນນຳໃຊ້ໃຫ້ດີຂຶ້ນກວ່າເກົ່າ ເຮົາເບີ່ງຄວາມໝາຍ ແລະ ຕົວຢ່າງດັ່ງລຸ່ມນີ້:

ຄວາມໝາຍຄຳວ່າ “ຄົ້ວ ຫຼື ຄວ້າ”.

“ຄົ້ວ” (1. ຄຳກິລິຍາ) ຈັບ, ຟັບຟ້າວໆ, ທາວມືໄປຈັບເອົາ, ແຍ່ງ, ຊິງ, ຍາດ.

ຕົວຢ່າງ:

ສອງແມ່ລູກຂີ່ລົດຈັກໄປຕະຫຼາດ ແມ່ຢ້ານລູກຕົກລົດ ຈິ່ງຄວ້າເອົາມືລູກມາກອດແອວລາວໄວ້ ແລະ ບອກຜູ້ເປັນລູກວ່າກອດແໜ້ນໆ ຫ້າມປ່ອຍເດັດຂາດ.
ຍິງຄົນນຶ່ງພາຍກະເປົາເງິນຍ່າງຢູ່ແຄມທາງ ມີໂຈນສອງຄົນຂີ່ລົດມານໍາກັນ ຄົນນຶ່ງດຶງກະເປົາລາວຢ່າງແຮງ ແຕ່ຍິງຄົນນັ້ນຄວ້າກະເປົາໄດ້ຄືນ ແລະ ເກີດການຕໍ່ສູ້ດຶງກະເປົາກັນໄປມາ ລາວທັງຮ້ອງທັງຕົກໃຈ ຊ່ວຍແດ່! ຊ່ວຍແດ່!.
ການໄຂວ່ຄວ້າສິ່ງໃດນຶ່ງເປັນສິ່ງທີ່ດີເພາະເຮັດໃຫ້ເຮົາມີແຮງບັນດານໃຈສູ້ ແຕ່ຖ້າຫາກຜິດຫວັງ ຫຼື ບໍ່ໄດ້ກໍຢ່າເສຍໃຈເກີນເຫດ.
ໃນທີ່ສຸດລາວກໍສາມາດຄວ້າຝັນຂອງລາວຈົນໄດ້ ກ່ອນຈະໄດ້ດັ່ງຄິດຝັນ ລາວໄດ້ຄົ້ນຄວ້າ ແລະ ວິໃຈ ສິ່ງປະດິດຂອງລາວເປັນເວລາຫຼາຍສິບປີ ແຕ່ກໍຖືວ່າຄຸ້ມຄ່າເພາະມີປະໂຫຍດຕໍ່ມະນຸດສະຍາຊາດ.
ປະເທດບຼາຊີວ ສາມາດຄວ້າແຊມເຕະບານໂລກ ຫຼາຍສະໄໝ ແລະ ສາມາດສົ່ງນັກເຕະດີໆ ຫຼາຍຄົນ ເພື່ອໄປຮ່ວມທີມຢູ່ລີກຂອງຢູ່ໂລບ ຊຶ່ງໄດ້ສ້າງຊື່ສຽງແກ່ປະເທດຊາດ ແລະ ເຮັດໃຫ້ຄົນຮູ້ຈັກ ເປັນຢ່າງດີ.

ສະຫຼຸບ.

ຄຳວ່າ “ຄົ້ວ” ແລະ “ຄວ້າ” ແມ່ນຄວາມໝາຍຄືກັນ ຕ່າງແຕ່ການອອກສຽງທີ່ມີໂຕ “ວ” ຄວບຄໍານຶ່ງ ການອອກສຽງແມ່ນຂຶ້ນກັບແຕ່ລະທ້ອງຖີ່ນ ແຕ່ດ້ານຫຼັກໄວຍະກອນແມ່ນສາມາດໃຊ້ໄດ້ທັງສອງຢ່າງ ຂຶ້ນກັບຄວາມຊິນເຄີຍ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo