ຄວາມໝາຍພາສາລາວກັບຄຳວ່າ ປະຈານ ແລະ ວິຈານ
DooDiDo
ອະທິບາຍພາສາລາວຄຳວ່າ ປະຈານ ແລະ ວິຈານ ມີຄວາມໝາຍແນວໃດ.
ຄິດວ່າຫລາຍໆທ່ານເຄີຍໄດ້ຍິນຄຳວ່າ #ປະຈານ ກັບ #ວິຈານ ແລະ ເຄີຍໄດ້ນຳໃຊ້ມາຢ່າງຫລວງຫລາຍແລ້ວ ທັງເປັນຄຳເວົ້າ ແລະ ໃນທາງການວິພາກວິຈານໃນເລື່ອງລາວຕ່າງໆທີ່ເກີດຂື້ນກັບສັງຄົມ ແລະ ຊິວິດຕົວຈິງປະຈຳວັນ.
#ແຕ່ເຊື່ອແນ່ນອນວ່າເຄີຍໄດ້ຍິນ ແຕ່ບໍ່ມີໃຜຢາກຖືກປະຈານດອກ ເພາະໃນຄວາມໝາຍ ຄວາມເຂົ້າໃຈຂອງສັງຄົມຄຳວ່າ ປະຈານ ຄືການຫັກໜ້າກັນຢ່າງບໍ່ມີການປານີ, ການເປີດເຜີຍຄວາມຊົ່ວ ກົວຕໍ່ການລົງໂທດທີ່ເຄີຍເຮັດຜິດ(ສະຖາບັນຄົ້ນຄວ້າຯ 2012:592)
ເມື່ອທຸກຄົນຢ້ານການ #ປະຈານ ຈຶ່ງເຮັດໃຫ້ຄຳວ່າ #ປະຈານ ລາມເຖິງຄຳວ່າ #ວິຈານ ເນື່ອງຈາກທັງສອງຄຳນີ້ລົງທ້າຍຄືກັນ.
ເມື່ອບາງຄົນຢາກຊີ້ແຈງ, ຢາກສະແດງຄວາມຄິດເຫັນໃນການກະທຳຂອງໃຜຄົນໜຶ່ງ ຫຼື ໃຜຄົນໜຶ່ງກຳລັງຖືກສັງຄົມວິຈານ ຈຶ່ງເຂົ້າວ່ານັ້ນຄືການປະຈານ ແລະສັງຄົມດຽວນີ້ເລີຍເຂົ້າໃຈວ່າ ການວິຈານຄືສິ່ງບໍ່ດີ, ບໍ່ມັກ ບໍ່ສະເພາະແຕ່ບຸກຄົນເທົ່ານັ້ນຍັງລວມໄປເຖິງ ອົງກອນ, ບົດປະພັນວັນນະຄະດີ ລ້ວນແຕ່ບໍ່ມັກຖືກວິຈານ.
ທັງນີ້ກໍເພາະວ່າ ຜູ້ຈະວິຈານຄົນອື່ນກໍສະແດງອອກໃນລັກສະນະດຽວກັບປະຈານ.
ສາເຫດທີ່ພາໃຫ້ເປັນຄືແນວນີ້ກໍເນື່ອງຈາກວ່າ ຄວາມເຂົ້າໃຈພາສາ ແລະການສື່ສານຍັງຢູ່ໃນລະດັບພື້ນຖານ.
ຄວາມເປັນຈິງແລ້ວ ຄຳວ່າ #ວິຈານ ແປຕາມໂຕວ່າ ເບິ່ງສິ່ງນ້ອຍໆ, ເບິ່ງໃຫ້ເລິກແລບ,ພິຈານະນາໃຫ້ລະອຽດ. (ສະຖາບັນຄົ້ນຄວ້າຯ 2012:875)
ໃນຄວາມໝາຍກວ້າງ ວິຈານຄືການພິຈາລະນາເປັນສິ່ງທີ່ດີ ເພາະການວິຈານຄືການຊີ້ແຈງ, ການສະແດງຄວາມຄິດເຫັນເພື່ອຊອກຫາທາງອອກທີ່ດີ ແລະເໝາະສົມ ຊີ້ແຈງຈຸດອ່ອນ, ເຮັດໃຫ້ສັງຄົມເພີງພໍໃຈ, ສາມາດປັບໄປໃຊ້ໃນຊີວິດປະຈຳວັນໃຫ້ໄດ້ດີກວ່າ.
ສຳລັບທ່ານເດ ເຂົ້າໃຈແນວໃດກັບຄຳວ່າ #ປະຈານ ແລະ #ວິຈານ
ເອກະສານອ້າງອີງ ວັດຈະນານຸກົມສະບັບ ສະຖາບັນຄົ້ນຄວ້າຯ 2012:592 ແລະ 875
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: fb ປ່ອງຢ້ຽມພາສາລາວ
