ພາສາລາວ ຄວາມໝາຍຂອງຄຳວ່າ ຊັບພະ ແລະ ສັບພະ.
ອະທິບາຍ ຄວາມໝາຍຂອງສັບທີ່ວ່າ ຊັບພະ ແລະ ສັບພະ.
ຈະຂໍອະທິບາຍສັບໃນສອງຄຳນີ້ ຊັບພະ ແລະ ສັບພະ ກັບຄວາມໝາຍໃນແບບຂອງມັນ ແລະ ແບບທຽບໃສ່ກັບຄຳຕ່າງໆ ແລະ ຕົວຢ່າງເລັກນ້ອຍເພື່ອຄວາມເຂົ້າໃຈລະອຽດເພີ່ມຕື່ມອີກ.
ຄຳວ່າ ຊັບພະ.
ເປັນຄຳທີ່ໄດ້ມາຈາກສັນສະກິດ ເຄົ້າສັບແມ່ນ ຊັບພະຍະ ຖ້າເວົ້າສັ້ນເຂົ້າກໍເຫຼືອແຕ່ “ຊັບ”,ໄທຂຽນເປັນ “ทรัพย์ ” ເປັນຄຳນາມ ທີ່ໝາຍເຖິງ ເງິນ, ຄຳ, ເຮືອນຊານບ້ານສ່ອງ, ວັດຖຸສິ່ງຂອງທັງທີ່ເຫັນດ້ວຍຕາ ແລະ ບໍ່ເຫັນດ້ວຍຕາ ແລະ ທຸກຢ່າງ ທີ່ມີຄ່າແຕ່ນ້ອຍຫາຫລາຍ.
ຊັບພະ ສາມາປະສົມໄດ້ຫລາຍໆຄຳ ແລະ ມີຄວາມໝາຍທີ່ແຈກຫຍາຍອອກໄປຕາມຄຳທີ່ເອົາມາປະສົມ ເຊັ່ນ: ຊັບພະຍາກອນ, ຊັບພະຍາກອນມະນຸດ, ຊັບພະຍາກອນທຳມະຊາດ, ຊັບສິນເງິນຄຳ, ຊັບໃນດິນສິນໃນນໍ້າ, ຊັບສົມບັດ, ຄຸນຊັບ, ຊັບພາຍໃນຊັບພາຍນອກ…
ຄຳວ່າ ສັບພະ.
ເປັນຄຳໄດ້ມາຈາກປາລີ ເຄົ້າສັບສະກົດ “ພ” ສັພພະ ເປັນຄຳຄຸນນາມ ແປວ່າ ທັງໝົດ, ທັງມວນ, ຫຼາຍແນວທີ່ເວົ້າລວມເຂົ້າກັນເປັນຄຳເວົ້າໜືງເອີ້ນວ່າ ສັບພະ.
#ສັບພະ ສາມາດແຍກອອກເປັນແບບສະເພາະໄດ້ອີກຫາກປະສົມກັບຄຳອື່ນໆ ທີ່ຢາກເນັ້ນໜັກຄວາມໝາຍສະເພາະເຈາະຈົງລົງໄປອີກເພື່ອສະແດງໃຫ້ຮູ້ວ່າສິ່ງນັ້ນມີຫລາກຫລາຍຢ່າງ ເຊັ່ນ ສັບພະວິຊາ,ສັບພະທານ, ສັບພະສິ່ງ, ສັບພະສັດ, ສັບພະສັນ, ສັບພະສາມິດ, ສັບພະສິນຄ້າ ພາສາໄທຂຽນເປັນ (สรรพสินค้า) ທີເຮົາເຫັນປະຈຳເວລາຂ້າມໄປຊື້ເຄື່ອງຝັ່ງໄທ, ໄປຕາມຫ້າງຮ້ານຕ່າງໆ…
ສົມມຸດຖ້າເຮົາໃຊ້ວ່າ
“ຊັບພະສິນຄ້າ”ຈະແປວ່າ ສິນຄ້າທີ່ມີລາຄາ
“ສັບພະສິນຄ້າ”ຈະແປວ່າ ສິນຄ້າທັງຫຼາຍ, ສິນຄ້າທັງໝົດທັງມວນ,ສິນຄ້າຫຼາຍຢ່າງຫຼາຍແນວ…
ຮ້ານຂາຍເຄື່ຶອງທີ່ມີຄົບທຸກອັນຕາມສະດວກຊື້ ເອີ້ນວ່າ ສັບພະສິນຄ້າ ທຽບກັບພາສາອັງກິດ Super market ຖ້າທຽບໃສ່ພາສາໄທ ກໍ່ແມ່ນ ห้างสรรพสินค้า ນີ້ລະ….
ຖ້າຫາກຂາດຕົກບົກພ່ອງ ຫລື ຜິດພາດປະການໃດກໍ່ຂໍອະໄພດ້ວຍ ທັງພາສາລາວ ແລະ ພາສາໄທ, ແລະ ສາມາຕຳນິຕິຊົມເຂົ້າມາໄດ້, ເນື່ອງຈາກວ່າຂ້າພະເຈົ້າກໍ່ບໍ່ໄດ້ຮຽນມາສາຍນີ້ໂດຍກົງ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: ເພຈ : ປ່ອງຢ້ຽມພາສາລາວ