ພາສາລາວຄໍາວ່າ ບໍ ແລະ ບໍ່ ມີຄວາມໝາຍແນວໃດ?
ມາຮູ້ຈັກຄໍາວ່າ ບໍ ແລະ ບໍ່ ມີຄວາມໝາຍແນວໃດ?
ໃນພາສາລາວການໃຊ້ວັນນະຍຸດກັບຄຳຕ່າງໆສ່ວນຫລາຍຈະເຮັດໃຫ້ຄວາມໝາຍຂອງຄຳດັ່ງກ່າວປ່ຽນໄປ ອາດຈະຫລາຍ ຫລື ນ້ອຍແລ້ວແຕ່ຄຳສັບນັ້ນໆເຊິງໃນນັ້ນອາດຈະຂື້ນກັບຕົວອັກສອນແດ່ເພາະອັກສອນບາງຕົວກໍບໍ່ສາມາດປ່ຽນສຽງໄດ້ຈາກການໃສ່ວັນນະຍຸດໃຫ້ມັນ.
ບົດນີ້ຈະຍົກເອົາຄຳວ່າ ບໍ ແລະ ບໍ່ ມາອະທິບາຍ, ເຊິງສອງຄຳນີ້ອ່ານອອກສຽງທີ່ໃກ້ຄຽງກັນແຕ່ວັນນະຍຸດຕ່າງກັນ ແຕ່ຄົນຕ່າງຊາດກໍ່ຍັງຈຳແນກສຽງອອກຍາກຢູ່ດີ, ຄວາມຈິງແລ້ວທັງສອງຄຳມີຄວາມໝາຍຄ້າຍຄືກັນ ແລະ ໃຊ້ໃນປະໂຫຍກດຽວກັນ ແຕ່ກໍມີການໃຊ້ຫຼາຍໃຊ້ໜ້ອຍແຕກຕ່າງກັນໄປ ແລ້ວແຕ່ວ່າເຮົາຈະນຳໄປໃຊ້ໃນປະໂຫຍກແບບໃດ ຫລື ສະຖານະການແບບໃດໃນແຕ່ລະຄວາມໝາຍມັນຈະແຕກຕ່າງໄປ.
ຄຳວ່າ ບໍ.
ບໍ ໃຊ້ກັບປະໂຫຍກຄຳຖາມ ໃນພາສາເວົ້າທີ່ມີລັກສະນະຜ່ອນສຽງເຊັ່ນ: ແມ່ນຢູ່ບໍ ?, ມາແທ້ບໍ ?, ບໍ່ມາບໍ ?, ບໍ່ໄປບໍ ? …
ນອກຈາກນີ້ ບໍ ຍັງແປວ່າ ບໍ່ສົມປະກອບ, ບໍ່ເຕັມ ຄຳນາມ ເຊັ່ນ ຄົນບໍ່ເຕັມ, ຄົນສະຕິບໍ່ດີ ເອີ້ນວ່າ ບ້າບໍ, ບ້າໆບໍໆ….
ຫລື ການນຳມາໃຊ້ໃນລັກສະນະໝູ່ຄູ່ຢອກກັນທີ່ໄດ້ດັດແກ້ຂື້ນໆລົງໆ ເຊັ່ນ: ເຮັດໄດ້ຢູ່ບໍ, ບໍ່ແມ່ນເຮັດບໍ່ເປັນບໍ, ຮູ້ແທ້ຢູ່ບໍ,…
ສຽງຂອງຄຳວ່າ ບໍ ບາງຄັ້ງອອກສຽງເປັນ ບໍ່, ບໍ້, ເບາະ ຕາມຈັງຫວະການເນັ້ນສຽງ
ຕົວຢ່າງ:
ເອົາມັນສາບໍເນາະ?
ເອົາມັນສາບໍ່ນໍ?
ເອົາມັນສາເບາະຫຶ?
ຄຳວ່າ ບໍ່.
ບໍ່ ໃຊ້ກັບປະໂຫຍກປະຕິເສດເຊັ່ນ: ບໍ່ແມ່ນ, ບໍ່ເປັນ, ບໍ່ໄດ້, ບໍ່ກິນ, ບໍ່ເອົາ ….
ໃຊ້ກັບປະໂຫຍກຄຳຖາມເຊັ່ນ: ເຈົ້າເຄີຍໄປວັງວຽງ ຫຼືບໍ່ ?, ຊິເອົາບໍ່ ?, ໄປນຳຂ້ອຍບໍ່ ? ….
ນອກຈາກນີ້ຄຳວ່າ ບໍ່ ຍັງແປວ່າ ບ່ອນເກີດ, ຈຸດກຳເນີດ, ບ່ອນໃຫ້ກຳເນີດເຊັ່ນ: ບໍ່ເງິນ, ບໍ່ຄຳ, ບໍ່ເກືອ, ນໍ້າບໍ່…
ສະຫລຸບ.
ຄຳວ່າ ບໍ ແລະ ບໍ່ ສອງຄຳນີ້ອ່ານອອກສຽງທີ່ໃກ້ຄຽງກັນແຕ່ວັນນະຍຸດຕ່າງກັນມີຄົນລະຄວາມໝາຍ, ຄຳວ່າ ບໍ ບໍ ໃຊ້ກັບປະໂຫຍກຄຳຖາມ ໃນພາສາເວົ້າທີ່ມີລັກສະນະຜ່ອນສຽງມີຄວາມໝາຍວ່າ ບໍ່ສົມປະກອບ, ບໍ່ເຕັມ, ບໍ່ ໃຊ້ກັບປະໂຫຍກປະຕິເສດ, ຄຳວ່າ ບໍ່ ຍັງແປວ່າ ບ່ອນເກີດ, ຈຸດກຳເນີດ, ບ່ອນໃຫ້ກຳເນີດ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo