ກໍາມະການ ແລະ ກໍາມາທິການ ມີຄວາມໝາຍແຕກຕ່າງກັນແນວໃດ?
ກໍາມະການ ແລະ ກໍາມາທິການ ອະທິບາຍຄວາມໝາຍທີ່ແຕກຕ່າງກັນ.
ສອງຄໍາສັບນີ້ຫຼາຍໆຄົນອາດຈະຄຸ້ນຫູ ແລະ ໄດ້ຍິນມາຕະຫຼອດ ໂດຍສະເພາະຄົນທີ່ເຮັດວຽກໃນລັດຖະການ (ພະນັກງານສັງກັດລັດ) ແຕ່ຫຼາຍໆຄົນກໍ່ຍັງບໍ່ທັນເຂົ້າໃຈຢ່າງເລິກເຊິ່ງແທ້ ໃນການໃຊ້ສັບສອງຢ່າງນີ້ ກໍາມະການຫຼາຍໆຄົນອາດຈະເຂົ້າໃຈໃນແງ່ຂອງການຕັດສິນການແຂ່ງຂັນຂອງນັກກິລາ ແຕ່ໃນນີ້ເຮົາມາຮູ້ຈັກກັບຄໍາສັບສອງສັບນີ້ໄປພ້ອມໆກັນ.
ຫົວຂໍ້ນີ້ໄດ້ມີການຄັດຈ້ອນມາຈາກຂໍ້ມູນ ຂອງທ່ານ ມະຫາ ສິຣາ ວີຣະວົງສ໌ເພື່ອມາອະທິບາຍສອງຄຳນີ້ໃຫ້ແຈ່ມແຈ້ງຂື້ນຕື່ມເນືອງຈາກເປັນຄຳສັບທາງການ ແລະ ຫລາຍໆທ່ານກໍຄົງຍັງຢາກຮູ້ ແລະ ຢາກເຂົ້າໃຈຄວາມໝາຍຂອງສອງຄຳນີ້.
ຄໍາວ່າ ກໍາມະການ.
ມີຄວາມໝາຍວ່າ ເປັນຄໍານາມ ທີ່ບົ່ງບອກເຖິງ ບຸກຄົນທີ່ເຮັດວຽກ,ເປັນເຈົ້າໜ້າທີ່,ຜູ້ທໍາໜ້າທີ່ ໄດ້ຮັບການເລືອກ ຫຼື ແຕ່ງຕັ້ງເຂົ້າເປັນຄະນະໃນການຮັບໜ້າທີ່ ໃນການຕັດສິນບັນຫາທຸກໆຢ່າງກ່ຽວກັບວຽກງານ ເຮັດວຽກອັນໃດອັນໜຶ່ງ ເຊິ່ງໄດ້ຮັບມອບໝາຍລວມກັນເປັນໝູ່ຄະນະ ເອີ້ນວ່າ: ຄະນະກໍາມະການ ເຊັ່ນ: ຄະນະກໍາມະການກິລາ, ກໍາມະການພັກເມືອງ,ກໍາມະການງານບຸນຕ່າງໆ…
ຄໍາວ່າ ກໍາມາທິການ.
ມີຫຼາຍກໍາມາທິການ ຄວາມໝາຍວ່າ ເປັນຄໍານາມ ໝາຍເຖິງຜູ້ເຮັດວຽກລະດັບສູງ,ເຈົ້າໜ້າທີ່ຂັ້ນສູງຜູ້ເຮັດວຽກສໍາຄັນໃນລະດັບສູງສຸດ ຄືບຸກຄົນທີ່ໄດ້ຮັບເລືອກຈາກວຸດທິສະພາ ຫຼື ສະພາຜູ້ແທນລາດຊະດອນເພື່ອກະທໍາກິດຈະການ ພິຈາລະນາສອບສວນ ຫຼື ສຶກສາເລື່ອງຕ່າງໆຕາມທີ່ສະພາມອບໝາຍແລ້ວລາຍງາຍຕໍ່ສະພາ.
ຄະນະກໍາມາທິການ ມີ 2ປະເພດຄື:
- ຄະນະກໍາມາທິການສາມັນ ແລະ ຄະນະກໍາມາທິການວິສາມັນ.
- ກໍາມາທິການສາມັນ ປະກອບດ້ວຍບຸກຄົນເຊິ່ງເປັນສະມາຊິກຂອງສະພາລ້ວນໆ.
ກໍາມາທິການວິສາມັນ ປະກອບດ້ວຍບຸກຄົນຜູ້ເປັນສະມາຊິກ ແລະ ບຸກຄົນທີ່ບໍ່ໄດ້ເປັນສະມາຊິກຂອງສະພາ ລວມກັນ ຫຼື ບຸກຄົນທີ່ບໍ່ໄດ້ເປັນສະມາຊິກຂອງສະພາທັງໝົດທີ່ສະພາເລືອກ ແລະ ແຕ່ງຕັ້ງມາເປັນຄະນະກໍາມາທິການວິສາມັນ.
ສະຫລຸບ.
ກໍາມະການແຕກຕ່າງກັບ ກໍາມາທິການ ກໍາມາທິການໝາຍເຖິງກໍາມະການໃຫຍ່ມີຖານະສູງກວ່າກໍາມະການ ເຊິ່ງໄດ້ຮັບພາລະກິດອັນສູງສົ່ງຍິ່ງໃຫຍ່ໃນວຽກງານສໍາຄັນຕ່າງໆ ເຊັ່ນ:ກໍາມາທິການພິຈາລະນາງົບປະມານແຫ່ງລັດ,ກໍາມາທິການຂົນສົ່ງມວນຊົນຈະປະຊຸມເພື່ອກະກຽມການເລື່ອງເສັ້ນທາງລົດໄຟຟ້າ…
ນີ້ຄືຄວາມໝາຍ ແລະ ຄວາມແຕກຕ່າງຂອງຄໍາສັບທີ່ວ່າ: ກໍາມະການ ແລະ ກໍາມາທິການ ເຊິ່ງອາດຈະຊ່ວຍໃຫ້ຫຼາຍໆຄົນເຂົ້າໃຈຢ່າງກະຈ່າງແຈ້ງຂຶ້ນຕື່ມ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo